Mataafa Otoowwa a lammatta 14 - Mataafa Qulqulloota

Aasa nuqusa Yihuta

¹ Apiya ka to'e ka katama Taawwiti kara' mookame. Innaadi Aasa ka pakkaadi oppa nuqusume. Xelta Aasaayye, haka para kudaniti piita ka oranna kela nessatte.

² Aasa ka fuula Waaqa Poqalla tura'e, wa paxaara ka a qajeele' kode.

³ Ka poqase a kalisoota a hapta isho porrasene a sakatatta kunkunnawwa qara ca alle' pashshe ka dakaddasene a sakatatta' dishame alle' faate ka olaahiyya killootase asheerati kodame alle' quure.

⁴ Ka akka Waaqa Poqalla aappadaassoti fadan ka seeraadi isho ajajaadi tooytane'e, samayta Yihuta ajaje.

⁵ Ka katamadda Yihuta piisa karaayye porrasene a sakatatta kunkunnawwa qara ca ka porrasene a oppa tankarta qayyannaane alle' pashshe. Xelta isha mukinnooyye, mankisteetaadi ka nakayta akkatte.

⁶ Qoota piita nakayta qapnaatte malla, ikka Yihuta kara'e, katamadda kawwattan kapa qorrame qupe. Qoota Waaqa ishi nakayta daashe malla, nama takka nefo ka isha in torpinin.

⁷ Isha ka samayta Yihutaati' kide, “katamaddoosen are ca qupna ka oxinta kawwatta a karaayye kawwaya tooya ka xarrada ka teehowwa a sipla a xarrada qapton kapa tiitanna. Qootan Waaqa Poqallaanno faane malla, piisse ammikki xannoowweey! Ino ishan faane isha ka qinda piisan ino' nessuma daashe.” Ka katamaddasene qupen ikka olkela ishootta' teyte.

⁸ Aasa Yihutaata oppaayye xela oranna a kaashshanna kukutta isho oranna qapanna nama kuma dippa sessa qapa ka Piiniyaametoppaayye xela oranna kontalewwa isho paanta qapanna nama kuma dippa lakki ka kunda sette' qapa. Sene piisa xela oranna a kokokkoka.

⁹ Toobbittase Seraahi kidammo, xela oranna nama milooneta takka isho sarakelladda dippa sessa qapade ka Yihutaata torpeeta' tuule ka haka katama Maareshaati de'e.

¹⁰ Aasa ka isha torpa' sooke; ishootta lamattiiyyi katama Maaresha kapaayye naaba Sefaata kara'e porraasso' qapaden.

¹¹ Sitiiyyi Aasa ka Waaqa Poqalaadi opa ullupe ka kide, “Oo Waaqa, a harka orra kokokkoka oppaayye nukkullowwa furatta ke kayno ayno ca? Waaqinno, ken kippanneey, xeloose asse kutta maxxaaytinnin torpinaay ino qaarqaare. Oo Waaqa, atti a Waaqinno umma nama ke punni in co.”

¹² Waaqa ka fuula Aasa isho a Yihuta tura'e, xela Toobbiya torpe; xela Toobbiya ka alle' qahe.

¹³ Aasa isho xelaadi ka haka katama Keraariti'i kamma daanen; qoota fuula a Waaqa isho a xelaadi tura'e, xela a Toobbiya oppa orra kutta pirame malla, hupna oorsatta imalaalen. Xela Yihuta ka ishootta pire ka poojeta kutta ishootta qara pooje.

¹⁴ Qoota Waaqa orra katamadda a Keraari kapandesa kalo piisa a kuttati' tammaqshe malla, ikka katamaddasene piisa pashshen ka qoota wa poojama kuttumtan eeyye kara caan malla, ishootta saren.

¹⁵ Ka safara sikmaya torpeneew ka kahirra akata leka ka telalla isho kaalla poojen ka Yursaalamipa tiitaawen.