Mataafa Otoowwa a lammatta 13 - Mataafa Qulqulloota

Akka Apiya nuqusase a Yihuta Iyyorpi'aami torpe

¹ A Iyyoorpi'aami nuqusume para kudanka settattati Apiya Yihuta qara'e nuqusume.

² Ka Yursaalami' kuti'e ka para sessa mukshe; aayya opa Apiya Mikaaya kidammi. Isheetta enenta Uri'eeli a Kipi'itta. Orana ka arta Apiya isho a Iyyoorpi'aami kara' qite.

³ Apiya ka xormeeta oranna nama kuma dippa afur qapade ka oranna' tuule; Iyyorpi'aami ka xela oranna nama kuma dippa sette qapade ka tura asade.

⁴ Apiya ka piitase kunkunnawwa qapto a Efreemiiyyi irroota Semaraaymi qara' qa'ade ka kide, “Iyyorpi'aami isho Isira'eeleta piisaayye ana dakkaysada!

⁵ Hela Waaqa Poqalla a Isira'eeli akka Taawwiti isho sanynyeetaadi Isira'eeli qara haka paraparati nuqusumto'e, akka kodayteeta a pursammi in kinnin ishootta olli kodade a uptane?

⁶ Ma xoori Iyyoorpi'aami inna Naapaati isase orxayta Selemooni a inna Taawwiti kodde, poqallaadi Selemooni qara'e xa'e.

⁷ A Roopi'aami inna Selemooni nama shakka kodde ka we mureeta ka isha isi qara oorissa ettaninni in kinniniiyyi, Iyyoorpi'aami ka xolma tooma a we nessinni in kinnini lamaya isi quda' qeede ka isha kapa mure ka qara' kokkonnaade.

⁸ Ishina amma akka mankisteetase a Yaahiwwe harka sanynyeeta Taawwiti oppa kitto puttane dikatten! Qoota xela orannaati desa keeto akata lekittan ka akka Waaqaddaassin koddane'e, pahanaddasene nyalqa a okkaya a Iyyoorpi'aami warqeetoppa kodacciise kuli qaptan.

⁹ Ma xoori qeesewwasene a Waaqa sanynyeeta Arooni koddite isho Lawaatase alle' daanten ka akka samayta piita mina'e pakkaaysho oppa'e qeesewwa mattaayshina shuumatten ka nama xorma haaritta takka ka laha tappa qapado ka xawwi isi reexxa' deeno piisa ka killowwosen xaayshin Waaqa in koddininiti'i qeesitta koddini.

¹⁰ Xanno xoori Waaqinno Waaqa! Umma ino alle isha an diinne; qeesewwa Waaqa kela koda koona nefo sanynyeeta Arooni. A ishootta qaarqaarra nefo kan Lawaata.

¹¹ Ishootta ka kalisoota kupannitto isho tankarta alaawnitto teykanta ka kalaakala fuula Waaqa tura' dehanni. Ka kalisoota laaqqota a xawwi reexxamte akka taantetaadi mina'e, tarabbeesa a Waaqa reexxame qara' xaayni ka halkeetta piisa mina'e, waasene qara ipsa xaaynaane a warqeetoppa kodame qara'e, ipsada qapsiisni. Ino ka asse seera Waaqa Poqallaanno tooytanninna; ishina' xoori alle'e Waaqa diissen.

¹² Tin Waaqa ino olli ca ka isha ino marraani; qeesewwasene' xaadi kaasa qapade nefo kaasa oranna'e ishin qara' dawan. Ishina orra Isira'eelitiiyyi, olkela ishina in teytooy, Waaqa aappadaassina oli in torpan!”

¹³ Iyyoorpi'aami' xoori turanneew xelaadi a oranna qudaayye paka takka qeede ka akka xela oranna a Yihutaati tultan asadane erke ka xela oranna a ata hase akka isha olliiyyi fuule desa Yihutaata torpane' kode.

¹⁴ Xela Yihuta ete iskapa tooyyadeeyye, akka fuule desa isho tulte desa kapa murame akke ka Waaqopa ullupe; qeesewwa ka kaasa dawen.

¹⁵ Xela Yihuta ka uuyata xaashe; Waaqa ka fuula Apiya isho a Yihuta tura'e, Iyyorpi'aami isho xelaadi piisa akka putamo' kode.

¹⁶ Waaqa ka Isira'eeleta Yihutaata turopa tuukke Isira'eeleta ka Yihutaata tura alle' qahate.

¹⁷ Apiya isho xelaadi ka a kuttati ishootta miidden; xormewwa a oranna a Isira'eeli oppaayye nama kuma dippa ken ka pirame.

¹⁸ Oranose oppa'e, Isira'eeleta ka jeerte; xela Yihuta xoori qoota Waaqa Poqalla aappadaassoti kippade malla, ipute.

¹⁹ Xela Apiya ka xela Iyyoorpi'aami kamma daane ka katamadda Peti'eeli ka Yishanaani ka Efrooni isho paleewwaasso ollin qara qeede.

²⁰ Sekulipaata xelta Apiyaayye iyyorpi'aami hupna oorsatta in ettaninne. Sekkammayye, Waaqa ka isha ishshe.

²¹ Apiya' xoori qaropaaw kokkonattaan aane; isha iskatta kudanka afuri heme ka hellaa a diira kunda lakki' lakki ka a tuparra kudanka lehi xaayade.

²² Wa xelta Apiyaayye kodde ka wa kode isho wa haasawade piisa mataaffa a torra a xuumampaytase a Iiddo kara'e taafamen.