Mataafa Otoowwa a lammatta 12 - Mataafa Qulqulloota

Akka nuqusa Kipseeta Yihuta torpa tuule

¹ Ropi'aami ete mankisteetaadi qaatishe ka mukissaadi kokkonnaysheeyye, isha isho Isira'eeleta piisa ka alle'e, seera Waaqa' diishen.

² Qoota Waaqa ishin dapen malla, a nuqusumeeyye para kenattati Shiishaaqi nuqusa Kipsi ka Yursaalami torpa' tuule.

³ A isha olliiyyi Kipsiiyyi tuule, sarkeella kuma ka dippa lakki ka a fartan torpina kuma kunda lehi isho xela oranna a dikoota in qapnini a piita Lipiya ka a Suuka isho a Toobbiya' qapade

⁴ ka katamaddasene a Yihuta kawwattan kapa qorrame qara pire ka Yursaalami kaye.

⁵ Sekkammaayye xuumampaytase Shema'iyya ka Ropi'aami isho saarrasene a Yihuta a Shiishaaqi turaayye Yursaalami karopa ollopa qahe kapopa aane ka ishootta' kide, “Waaqa ikiini, ‘Ishina i'alle ana diissen; anti ka Shiishaqi tura alle ishin diisheew.’”

⁶ Nuqusase Ropi'aami isho saarrasene a Isira'eeli ka isi jeershen ka kidene, “Waaqa hanqeellitta.”

⁷ Waaqa ete akkima isi jeershen akkeeyye, nessa Waaqa ka Shemaa'iyya kapopa de'e ka kiini, “Qoota isi jeershen malla, irraqaran ishoottan paha diisheey, an pashsho. Miiriyyo nefo oranna Shishaaqi qudanne Yursaalami qara in kayo.

⁸ A koddito ma, ana piddameeta isho nuqussa piitada a pilaati piddameeta akkima oli in pahanin akka upnaadane'e, Shiishaqi'i piddaman.”

⁹ Shiishaqi nuqusa Kipsi ete Yursaalami qara pireeyye, teyanta a tika qulqulloota Waaqa isho a mankisteeta kara kitto pootade ka kontalewwasene a warqeeta a Selemooni' kodacciise a in hattinnin mali piisa haadade.

¹⁰ Ropi'aami ka pakka kontalewwasene haadamme oppa kontalewwa a pila sipla poora oppa kodacciise ka tooytampayasene a xarrada tika mankisteeta tooytina qara saarummaati atara' daashe.

¹¹ Oto nuqusa tika qulqulloota a Waaqa opa anno pisaayye, tooytampayasene ka kontalewwasene qapanni ka isha olli anni ka sekkammaayye kontalewwasene kaata tooytampaya karopa oorinni.

¹² Ropi'aami qoota isi jeershe malla, miira Waaqa ka isha qaraayye alle tiitaawe umma alle isha in patinne. Yihuta kuli kara'e, paxaarumta shakkayteeta ka teyatte.

Torra mankisteeta Ropi'aam pora a kumma'anne

¹³ Nuqusase Ropi'aami ka fayya olkela oorsade ka Yursaalami kara'e, nuqusumaadi qaraaw caade; a nuqusumeeyye paraadi kunda afuri takka; ikka katamasene a Yursaalami akka maxxa Waaqa kara halaamo isase a Waaqa katamadda Isira'eeli piisa oppaayye reexade kara kuti'e ka para kudanka tappa mukshe. Aayyaasso Naa'ima kidammi, isheetta nefo Amoonitteeta.

¹⁴ Isha qoota Waaqa fadeeta'e karittaadi in harmisannin malla, neequmta kode.

¹⁵ Nuqusase Ropi'aami parra a nuqusume kara wa kode piisa, paayyote paayyatte haka piraampiraati'i, mataaffa a xuumampayta a Shema'iyya' taafe ka mataafase a torra a meera a akkampaytase Iiddo' taafe kara'e taafamenen. Ropi'aami isho Iyyorpi'aami ka oli torpa quda'ew tawni.

¹⁶ Ropi'aami ka to'e ka katama Taawwiti kara' mookame; innaadi Apiyya ka pakkaadippa' nuqusume.