Mataafa Otoowwa a lammatta 11 - Mataafa Qulqulloota

Qaaleta a Waaqa Shema'iyya qudan haasawade

¹ Roopi'aami ete Yursaalami kayeeyye, akka aanan ka Isira'eeleta torpan ka mankisteetaadi ishi' oorshane'e kafa Yihuta isho a Piniyaami oppaayye xela oranna kuma dippa ka kunda sette ollopa oorshe.

² A koddito ma, qaaleta Waaqa ka Shema'iyya namase a Waaqa kapopa deete ka kiini,

³ “Nuqusase a Yihuta Roopi'ami inna Selemooni isho Isira'eeleta a kafa Yihuta isho a Piniyaami kara kitto piisa' kide,

⁴ Waaqa ikiini, ‘Wossen koddina ana kooniiy, hellaassin torpa'e opeela in tuulan; ma pisantiiyyi tikkaassin opa kala.’” Ikka afaa Waaqa' dakayen ka Iyyorpi'aami torpa diishen ka alle' kalen.

Akka Roopi'aami katamadda Yihuta kapa' kawwattan dawe

⁵ Roopi'aami ka Yursaalami kuti'e ka isqara nyaapa oorissa'e, Yihuta kara katamadda qupe. Katamaddoosen nefo:

⁶ Peteleheemi ka Etaami ka Teqo'a

⁷ ka Petisuuri ka Sooko ka Atulaami

⁸ ka Kaati ka Maaresha ka Sifi

⁹ ka Adoraaymi ka Laakiishi ka Aseqa

¹⁰ ka Soori'a ka Ayaalooni isho Keprooni kidammi. Katamaddasene Yihuta isho Piiniyaami kara kawwattan kapa qorrame sene.

¹¹ Sene eeyye ca akkima kawwattaaysho kokkonnaatto'e kode ka qara ajajampaya shuume ka damta ka sayteeta isho taadeta awayneeta kara' kalshe.

¹² Ka katamadda piisa kara'e, kontalewwa isho oranna tuule ka a qaran qapto ishootta kokkonnayshe ka xaadi' kodade.

Akka Isira'eeleta piisa karaayye qeesewwa isho Lawaata Yursaalamipa deete

¹³ Qeesewwa isho Lawaata ka Isira'eeli piisa kara piitaddaasso oppaayye Yihuta karopa Roopi'aami kapopa ollopa deete.

¹⁴ Iyyoorpi'aami isho hellaadi qoota kodase a qeesuma a Waaqa qara Lawaata alle daanen malla, Lawaata ka porraadi a oppa horeeta siksannitta isho teyantaadi piisa alle' diisse ka Yihuta isho Yursaalamipa alle' deete.

¹⁵ Iyyorpi'aami ka porrasene a sakatatta kunkunnawwa qara ca isho killowwasene pahana a tela isho a nyelqa okkaya isasene a isha mattaadi kodeeti'i qeesewwaadi shuume.

¹⁶ Kaffa Isira'eeli pisa oppaayye, a karittaaysho piisan Waaqa Poqalla Isira'eeli faana piisa ka Waaqa Poqalla a aappadaassoti'i' kalisoota kalissa'e Lawaata kamma Yursaalamipa aanen.

¹⁷ Ishootta nefo para sessa kara'e qoota saanta Taawwiti isho a Selemooni oppan aanen malla, mankisteeta Yihuta'e kokkonnayshen ka Ropi'aami inna Selemooni quda kodden.

Toola Ropi'aami

¹⁸ Ropi'aami iskatteeta Maahalaati kidammitto heme; aappa opa Maahalaati nefo Yaarimoti inna Taawwiti; aayyaasso nefo Apihaayli, isheetta enenta Eli'aapi oofta Isseyi.

¹⁹ Isheetta ka hellaa a diira a Yi'uushi ka Shemaariya isho Sahaami kidamma sessa ishi' xaayte.

²⁰ Ka kammaayyeew, Maa'ika enenta Apeseloomi hemeew. Ikka Apiya ka Ataayi ka Siisa isho Sheloomiti ishi' xaayteew.

²¹ Ropi'aami ka iskattaadi a pila isho lammowwaadi qaropeela Maa'ika enenta Apeseloomi akata jaalade; isha olloppa'e, iskatta kudanka sette isho lammowwa kunda lehi qapa. Ka ishootta oppaayye hellaa a diira kunda lakki sette ka hellaa a tuparra kunda lehi xaayade.

²² Ropi'aami qoota Apiya inna Maa'ika nuqusumsissa fade malla, hellaa a xaaye piisa qaropeela isha kuttishe.

²³ Ropi'aami qoota hellaadi a diira oppaayye a deemo qeede ka awraajjadda piita Yihuta isho a Piniyaami kara ca isho katamadda a kawwattan kapa qorraame kara shuume malla, ilattumaadi akkishe ka wa ishootta' parpaaccisna kuttumtan ishootta' daashe ka haantowwa lekaya ishootta' hemacciise.