Mataafa Otoowwa a lammatta 10 - Mataafa Qulqulloota

Akka Isira'eeleta Roopi'ami quda kodda tiitte

¹ Qoota Isira'eeleta piisa Roopi'aami nuqusumissa'e Sekemipa ante malla, isha ka Sekeemipa aane.

² Iyyorpi'aami inna Sapaati qoota turan Selemooni tura qahe ka piita Kipsi kara kalo malla, ete sede dakayeeyye, piita Kipsitiiyyi alle' kale.

³ Ikka kamma erken ka halen isha isho Isira'eeleta piisa ka Roopi'aami kapopa aanen ka ishi' kidene,

⁴ “Aappaayshin koda kokkokanne ino miidde; atti' xoori kodaddoosen ino qara ulsaade an ishin miidamme ino qara sholla'ayshe; in ke' piddammaay.”

⁵ Roopi'aami ka ishootta' kide, “Kuyyaata sessa kammaayye ana kapopa oora.” Orrase ka kale.

⁶ Sekkammaayye Roopi'aami ka qimootase a Isira'eeli a aappaaysho Selemooni cooyye isha kela koda koote kaassade ka kide, “Akkiman samaytoseti oorsho'e, maana ana dehaammittan?”

⁷ Ishootta ka ishi oorshen ka kidene, “Kadi orrooseti'i wa paxaara qapnaattaayye ka ishootta xasaysattaayye ka afaa fayya ishootta' haasawattaayye, ishootta awta piisa ke' piddaman.”

⁸ Roopi'aami xoori dehaamtose a qimaya'e alle' tuffade ka xeliyyasene' xaadi a ollin kukuttadene isasene amma dehaamampayaadi kodde qara dehaama kaassade

⁹ ka ishootta' kide, “Orroose kiino, ‘Kodaddoosen kokokkoka a aappaayshin inon miidde ino qara sholla'ayshe'e, maanan kida akka maana ana dehaamtan?”

¹⁰ Xeliyyasene' xaadi isha olli kukuttade ka ishi oorshen ka kidene, “Orroose kiino, ‘Kodaddoosen kokokkoka a aappaayshin inon miidde ino qara sholla'ayshe kiino'e kide, ‘Qupittiyyo a shakka surra aappinno qara kappuma' qapa;

¹¹ ha aappinno koda kokkokanne ishin miidde ma anti a qaran qapto'en ishin miidda; aappinno halankaanne ishin karafe ma anti kitattannen ishin qomsiisa!’”

¹² Iyyorpi'aami isho samaytase piisa ka akka nuqusa ishootta' lele ka kide, “Kuyyaata sessa kammaayye ana kapopa oora.” mina'e, kuyyaata sessa kammaayye Roopi'aami kapopa tiitaawen.

¹³ Nuqusa ka dehaamase a qimaya' tuffade ka afaa kokkoka ishootta oorshe.

¹⁴ Ka dehaamase a xayyoolayse teyyade ka ishootta' kide, “Aappinno koda kokkokanne ishin miidde ma, anti a qaran qapto'en ishin miidda; aappinno halankaanne ishin karafe ma anti kitattannen ishin qomsiisa!”

¹⁵ Waaqa qaaletase' xaadi a Akiiya Seelittase qudan qoota Iyyorpi'aami a inna Naapaati desa haasawade, akka dikkatto qoota piisade malla, nuqusase samayta'en dakayne.

¹⁶ Samayta Isira'eeli piisa akkima nuqusa ishootta dakaya tiite ete upnaadeneeyye, i'olli' kidene, “Isira'eleteeyye, maanan Taawwiti quda qapna? Inna Isseyi quda qoottota maana'en qapna? Tikkaassin opa kala! Atti Taawwiti tikaayti tooytaado!” Semmalla Isira'eeleta piisa ka tikaasso opa kalte.

¹⁷ A koddito ma, ikki'i Roopi'aami Isira'eeleta a katamadda Yihuta kara kalto mukinni.

¹⁸ Nuqusase Roopi'aami ka Atooraami isase karpishshadda koda hupna koona qara saarummo Isira'eeleta kapopa erke. Ishootta' xoori dakaanne isha dakken ka ishshen. Nuqusase Roopi'aami' xoori kitteeta'e kela pahe ka sarkeella qaropa fayyade ka Yursaalamipa qahe.

¹⁹ Semmalla Isira'eeleta ka haka awwiti'i, sanynyeeta Taawwiti falqa tupa kitta.