Mataafa Saamu'eeli a paayyota 5 - Mataafa Qulqulloota

Akkima taapotase a kodayteeta Waaqa piita Filisteemiti teyatte

¹ Orra filisteemi ete taapota Waaqa poojneeyye, Apeneseridesa katama Ashtooti opa haaden.

² Ka eeyye qeeden ka tika taakooni a killoota kelopan kullen, ka taakooni kapa qaatishen.

³ Orra Ashtooti ete parraytaadi paraappan xa'eyye taakooni taapota Waaqa tura'e piita pi'ite ka fuulaadi piitan xata oorisse. Ikka qeeden ka poraadippopa oorshen ka qaatishen.

⁴ Ete parraytaadi paraappan xa'eneew, taakooni taapota Waaqa tura'e piita pi'ite ka fuulaadi piitan xata oorisse. Mattaadi isho harkaadi piisa ka tupa qeqqepen. Ka kuleenta xarra qara seehen. Dakinta patta ka eeyye haste.

⁵ Qeesewwa taakooni isho orra tikoose a killoota a taakooni a Ashtooti kara kitto kelopa kullino piisa seminanne haka awweti kuleenta xarra taakooni qara yatanni in kinnin ka qaran laabbini.

⁶ Waaqa ka orra Ashtooti isho a kapandesa kalo a kuttati rakkacciise. Ka ishootta qara qappaaja qeede ka ishootta miidde.

⁷ Orra Ashtooti ete wa koddina akkeeyye ikidee “Waaqa Isira'eeli a kuttati ino ka taakooni waaqinno rakkacciisniiy, taapota Waaqa Isira'eeli inoppa taweeta isheetta faani in kitto.”

⁸ Ka semmalla mukissampaya filisteemi kamma erken ka ishootta piisa ollopa halen ka ishootta kaassaden ka kidene, “Taapootose a Waaqa Isira'eeli attan koona?” Mukissampayasene ka ishootta kidene, “Katama Kaadi opan aana.” Ikka taapotase a Waaqa Isira'eelitin Kaatipa aanen.

⁹ Ete eeyyepan aanen kammaayyeew, Waaqa katamasene qara xa'ew. Ka a kuttati ishootta yaaqyaaqsheew ka samaytase a katamooseneti, a shakka ka a qime piisa quda akka qappaaja doddo'o kode ka ishootta miidde.

¹⁰ Ikka taapotase a Waaqa katama Eqooni opa alle erkeneew. Ete taapotase a Waaqa katama Eqrooni oppa kayteeyye, samayta Eqrooni ka ullupe ka kide, “Ino ka orrinno pira'e taapota Waaqa Isira'eeli ino qaropa tawshen,”

¹¹ Ka semmalla mukissampaya Filisteemi kamma erken ka ishootta piisa ollopa halen ka kidene, “Taapota Waaqa Isira'eeli ino qara alle tawsha ikka poraadipa oorto ka ino ka orrinno in pirrin.” Qoota Waaqa a kuttati ishootta rakkacciisno malla, katamasene piisa oppa toota olkelan orra yaaqyaaqinniiy.

¹² A in leenin nefoow, qoota qappaajaseetin miidammaan malla ullupitta katamaseneti ka a kuttati opeela xa'e.