Mataafa a Nuqussa a paayyota 22 - Mataafa Qulqulloota

Mikkiyaasi Aki'api qare xuuma haasawade

¹ Soorata isho Isira'eeleta ka para sessa orana mali piren.

² Para sessattaatiiyyi, Iyyoosafiti nuqusa Yihuta ka nuqusa Isira'eeli kapopa lekkade.

³ Nuqusa Isira'eeli ka saarraadi kide, “Katama Remaati a Kele'aati akkima xanno kodden, anka haka ammati jaw kiine ka harka nuqusa Sooriya oppa qeeda diinne i'uptan.”

⁴ Ka Iyyoosafiti kaassade ka kide, “Hela Remaati a Kele'aati opa ana olli oranna ittuulta?” Iyyoosafiti ka nuqusa Isira'eeliti kide, “Ana isho ke an takkan, orriyyo orraayti mina, fartadaayyo kan fartadaatti mina.

⁵ Ma paayyota qara wa Waaqa Poqalla kiina oppa kaassado.”

⁶ Nuqusase a Isira'eeli ka xuumampayaadi nama dippa afur mina ca ollopa hale ka ishootta kide, “Remaati a Kele'aati torpeeta'e in tuulam moon alle'en diisha?” Ishootta ka ishi kidene, “Poqalla ke turopa ishotta tuukkaay, tuule.”

⁷ Iyyoosafiti ka kide, “Ishootta maliiyyi, xuumampayta Waaqa Poqalla an kaassanno in co?”

⁸ Nuqusase a Isira'eeli ka Iyyoosafiti kide, “Nama an qudan wa Waaqa kiina kaassatta ettaninno ammikki takka caaw ma, qootiyyo desa qoota wa neeqa diisheey a paxaara haasawanni in kinnin malla, in isha needda, isha nefo Mikkiyaasi inna Yimila.” Iyyoosafiti ka kide, “Nuqusa asse in kiinin.”

⁹ Nuqusase a Isira'eeli ka saarraadippa takka hale ka kide, “Mikiyaasi inna Yimila jarjartan arepa qeede.”

¹⁰ Nuqusase a Isira'eeli isho Iyyoosafiti nuqusa a Yihuta ka kaappadaasso kalsaden ka xarra Samaariya tura awtaappa alkadaasso qara qaa'en, xuumampaya piisa ka ishootta tura xuuma haasawanni.

¹¹ seteqiyaasi inna Kena'inna ka kaasa lakki a sipla kode ka Aki'api kide, “Waaqa Poqalla ikiini ‘Haka pirammaane'e, senenne Soorata tottoomta.’”

¹² Xuumampaya piisa ka afa takkan kodaden ka xuuma haasawanni ka kiini, “Waaqa Poqalla ke turopa ishootta tuukkaay, Remaati a Kele'aadi opa tuule ka pute.”

¹³ Namase Mikiyaasi hala erkame ka Mikiyaasi kide, “Amma xuumampaya piisa afa takkan kodade ka qoota nuqusati desa wa paxaara haasawanniiyyi, afaatti tooy a xaaysho qara kaleneew ka atara wa paxaara haasawado.”

¹⁴ Mikiyaasi ka kide, “Maxxa Waaqa Poqallaatinnin xaxanni. Wa Waaqa Poqalla ana kide pattan ishi haasawada.”

¹⁵ Ka nuqusase turopa dehaade; nuqusase ka ishi kide, “Mikkiyaasi Remaati a Kele'adi torpa'e, hela in tuullam moon alle'en diinna?” Isha ka ishi oorshe ka kide, “Waaqa Poqalla ke turopa tuukkaay, tuule ka pute.”

¹⁶ Nuqusase ka ishi kide, “Akka maxxa Waaqa Poqallaatin dukaata ana haasawatto ka wa pila ana a haasawannini'i, haka aytamitin sede ke lela tupa tawa?”

¹⁷ Mikkiyaasi ka ishi kide, “Ha Isira'eeli akkima kaharra sikmayta dape mina irrowwa qara pasten akke. Waaqa Poqalla ka kide, ‘Sene orra Poqla in qapniniiy, nama piisa a tikaadipa nakaytan kalo.’”

¹⁸ Nuqusase a Isira'eeli ka Iyyoosafiti kide, “An ke an kiine, ‘Isha qootiyyo desa wa neeqa diisheey wa paxaara haasawanni in co?’”

¹⁹ Mikkiyaasi ka ishi kide, “Semmalla nessa Waaqa Poqalla dakaye, a Waaqa Poqalla sufaanetaadi qara kuti'en akke. Xela moonta piisa ka akkitta ka pittittan isha kapa qaa'ade.

²⁰ Waaqa Poqalla ka kide, ‘Akka Aki'api Remaati a Kele'aati torpeeta tuulo ka eyye to'o'e, ayno isha sassapada?’ Erkampattoota takka ka we takkan kiite, takka ka a pila kiite.

²¹ Piraampira qaraayye hapura takka ka ishootta oppaadeesa sooke ka fuula Waaqa Poqalla tura qa'ade ka kide, ‘Ana isha sassapada.’

²² Waaqa Poqalla ka ishi kide, ‘Atta isha sasapatta?’ Hapurase ka kide, ‘In aana ka afa xuumampayaadi oppa hapura darada kodda.’ Waaqa Poqalla ka ishi kide, ‘Aane sassapado, ike olkela teytaay.’

²³ Semmalla tin Waaqa Poqalla, xuumampayosen xaayti piisa qara'e hapura sassapa lekkishe ka ke qara neequmta kodeeta piisade.”

²⁴ Seteeqiyaasi inna Kenaa'inna xoori i'aane ka Mikkiyaasi kandishe ka ishi kide, “Hapuroose a Waaqa Poqalla, ayshoppanne ana kapan tarpe ka asse ke haasawade?”

²⁵ Mikkiyaasi ka ishi kide, “Kuyyaata ishi dekatta kaata karopa kullito, awse upnaatta.”

²⁶ Nuqusase a Isira'eeli ka kide, “Mikkiyaasi qapa ka Amooni mukissampaytase a katama isho Yo'ashi innasene a nuqusa kapopan aana.

²⁷ Ka ishootta kida, ‘Nuqusa ikiini, “Namoose tika hida karopa kalsha ka hakan nakaytan kallo kara'e, laaqqota kokte isho pishaaw mali we ishi in daashan.”

²⁸ Mikiyaasi ka kide, “Oton turaaw ke'e nakaytan kalaayye, Waaqa Poqalla ana oppan in haasawanne.” Ka kideewwe, “Samayteeyye, ishina piisaayye sede fayya dakkaysada.”

Akkima Aki'aapi Remaati a Kele'aati kara to'e

²⁹ Nuqusase a Isira'eeli isho Iyyoosafiti nuqusase a Yihuta ka oori Remaati a Kele'aati opa tuulen.

³⁰ Nuqusase a Isira'eeli ka Iyyoosafiti kide, “Anti mehaddaayyon pursada ka nama pila pahanaada ka oranase oppopa aanaay atti mehaddaatti a nuqusa kalsado.” Ka oori mehaddaadi pursade ka nama pila pahanaade ka oranase oppopa aane.

³¹ Nuqusa Sooriya xoori, saarraadi a sarakeellaadi ajajna kunda sessa lakki ajaje ka kide, “A shakka isho a kutta olli in torpa ma, nuqusa Isira'eeli'iw torpa.”

³² Saarrasene sarakelladda ajajna ete Iyyoosafiti akkeneeyye ikidene, “Ini dukaatannen nuqusase a Isira'eeli.” Ka isha torpa'e ishopa tiitaawen. Iyyoosafiti ka ullupe.

³³ Ishootta ka oori akkima nuqusa Isira'eeli in koddinin upnaaden ka isha kamma alle ooren.

³⁴ Xela oranna Sooriya oppa takka ka lawaadi tupadesa pokke ka pora a oppa meehaadi a oranna olmina kayno oppa nuqusase a Isira'eelitin teye. Ikka nama sarakeellaadi qullo kide, in qarameey alle tiitayshe ka pora oranna kara anan sooke.” Ikka alle ishin sooke.

³⁵ Awwseti orana ka ollin koope. Nuqusase nefo fuula xela Sooriya tura'e sarakeellaadi kara isha quda qapen ka qaatishen. Diika ka porose a qarame oppa sarakeellasene karan xata urqini. Ikka kalaakalaayye to'e.

³⁶ Ete letta dummittooyye, saleeta ka xela oranna oppa xaate ka kiini, “Nama piisa a piitaadi isho katamaadipa alle kalo.”

³⁷ Nuqusase ka to'e. Ikka Samaariyaapa ishan kalen ka eyye kara isha mooken.

³⁸ Ka sarakeellaadi qeeden ka hartase a Samaariya a oppa sharmuutta iskatta pisha jaqannaan oppa jaqen. Qaaletase a Waaqa haasawade qara'e, kutta ka diikaadi hayen.

³⁹ Wa a ata hase a Aki'api kode piisa, tikase a manksteeta a hirta arpatin sire ka katamaddasene a qupe piisa mataaffa torra a nuqussa Isira'eeli oppa'e taafamen.

⁴⁰ Aki'api ka to'e. Innaadi Akasiyaasi ka pakkaadippa nuqusume.

Iyyoosafiti nuqusa Yihuta

⁴¹ Aki'api nuqusase a Isira'eeli nuqusume para afrattati, inna Aasa Iyyoosafiti ka Yihuta qara nuqusume.

⁴² Iyyoosafiti a nuqusumeeyye paraadi kunda sessa keni ka Yursaalami kuti'e ka para kunda lakki keni mukshe. Maxxa aayyaassoti Asuupa kidammi isheetta nefo enenta Shilihi.

⁴³ Isha ka saanta aappaayshoti a Aasa oppanneew aane ka fuula Waaqa tura wa paxaara kode umma kapa qinda in kiine. Ma xoori porrasene a sakatatta kunkunnawwa qara ca alle'en patinne. Orra ka porroosen oppa kalisowwa kalinni ka tankarta qayyanni.

⁴⁴ Iyyoosafiti xoori nuqusa Isira'eeli olli nakaytanne kallaade.

⁴⁵ Wa a ata hase a Iyyoosafiti kode, xormumaadi a akkishe ka akkima oranna torpe piisa, mataaffa torra a nuqussa Yihuta oppa'en taafamen.

⁴⁶ Ha Iyyoosafiti, sharmuutta diira a diira olli mukna tikka killowwa a xelta aappaayshoti a Aasaayye hase kuli alle piitoppaayye tawshe.

⁴⁷ Sitiiyyi Etoomi issinni nuqusa in qapto ma nama nuqusa Yihuta shuume isheetta mukinni.

⁴⁸ Iyyoosafiti markappa a nakata a piita Ofiiri opa anna ka warqeetan ishi kala'e kodade, ma qoota katama Etisiyyoon- kapiiri kara tura qeqqepen malla aparipa in anne.

⁴⁹ Inna Akiaapi Akkasiyaasi ka Iyyoosafiti kide, “Orriyyo a orraayti olli markapan aano.” Iyyoosafiti xoori ishi in oowsanne.

⁵⁰ Iyyoosafiti ka to'e ka katama a aakkaaysho a xatta a Taawwiti oppa turkasene a nuqussa oppa mookame. Innaadi Iyyoraami kka pakkaadippa nuqusume.

Akasiyaasi nuqusa Isira'eeli

⁵¹ A nuqusase a Yihuta Iyyoosafiti nuqusume para kudanka tappattati, inna Aki'api Akasiyaasi, Samaariya kara'e kuti'e ka Isira'eeli qara nuqusume ka para lakki mukshe.

⁵² Ka saantase a aappaayshoti isho a aayyaassoti oppanneew aaneew. Ka saantase a Iyyoripi'ami a inna Napaati a Isira'eeli juppootoppopa kate, oppan aane. Ka fuula Waaqa tura wa neeqa kode.

⁵³ Ka akkima aappaayshoti mina pa'aliti qinsade ka ishi sakatade ka Poqalla Waaqa Isira'eeli miirayshe.