Mataafa Otoowwa a paayyota 16 - Mataafa Qulqulloota1 Ete taapotase a kodayteeta a Waaqati kaleneeyye, tukkanase a Taawwiti ishi daape kela'e xaayen ka kalisoota kupannitto isho a takkumta fuula Waaqa tura kalshen. 2 Taawwiti ete kalisootase a kupannitto isho a takkumta Waaqa kalissa dikkishen kammaayye, maxxa Waaqatinni samayta sake. 3 Ka sekkammaayye a diirta ka iskatta in kiinin maliiyyi Isira'eeleta piisa'e laaqqota takka takka ka wayneeta takka takka ka so'a himinta takka takka qoote. 4 Taawwiti ka akka taapota Waaqa turan desa koda kodane'e ka Waaqa Poqalla Isira'eeli saarshan ka kalataysadan ka ulfeessane'e, Lewaatoppa orra shuume. 5 Saaraaysho Asaafi, a isha kamma saaruman co Sakkariyaasi, ishootta kelaayyeew, Yi'i'eeli ka Shemiiramooti ka Yihi'eeli ka Matitiya ka Eli'aapi ka Pennaya ka Opeeti'etoomi isho Yi'i'eeli akka kehayta isho pekena dawane'e reexamen; Asaafi ka sokojkoja dawni. 6 Qeesewwasene Pennaya isho Yahaasi'eeli akka awta piisa taapotase a kodayteeta a Waaqa tura kaasa dawane'e kitamen. Masmuureta a Taawwiti a kalata mas 105:1-15 ; 96:1-13 ; 106:1 , 47-48 7 Awsetiiyyi akka ishin Waaqa kalataysadane'e masmuureta kalata a Taawwiti Asaafi isho Lewaata daashe sede. 8 Waaqa kalataysada; ka maxxaadi hala; ka wa kode samayta piisa torra! 9 Ishi dawada ka isha saarsha; ka kodaadi a orra qawwanno piisa torra! 10 Ka maxxase xaadi qulqullaawen jeejjada! a Waaqa faana piisa a xasooden! 11 Waaqa ka hupnaadi kippada! Ka awta piisa fuuladi fada! 12 Kodaddaadi a orra qawwanna, ka daxxowwaadi isho firteetaadi a daashe matte oorsada, 13 ishina sanynyeeta a orxaytaadi a Isira'eeli koddeetiiyyi, ka ishina a reexame hellaa Yayqoopiiyyi, sede matte oorsada! 14 Isha Waaqa Poqallaanno, firteetaadi piita piisa qara kayni. 15 Kodayteetaadi haka paraparati'i dikanni, ka qaaletaadi a ajaje haka xelta kumati'i matte oorsanni. 16 Kodayteeta a Aprihaami olli kodade, ka xaxa a Hisaaqi xaxade, 17 Yayqoopi'i taanteta kode ka ishi daashe, ka Isira'eeli'i kodayteeta paraparati kode ka kokkonnayshe. 18 Ka kide, “Piita Kene'aani'in ke daasha, ikka qoottotaayti allehaatto koddita.” 19 Sede nefo a ishootta lamayaaw koddeneeyye ka shakki ka kalayta koddeneeyye 20 ka samayta takkaayye desa samayta pila opa kotaannaaneeyye; ka mankisteeta takka desa mankisteeta pila opa paqnaaneeyye; 21 Waaqa akka nama ishootta miiddo in heennaanne; ka ishootta malla nuqussa fuke. 22 Ka kide, “An daatade quda in kayan, ka xuumampayaayyo qara wa neeqa in kodan.” 23 Ishina piita qara kala piisaayye Waaqa sammara! Ka kuyyaata kuyyaatan dinissaadi salisha. 24 Ulfeenaadi samayta piisa torra, ka kodaddaadi a orra qawwanna samayta piisa salisha. 25 Waaqa ikutti, kalataadi ka koopeey, waaqadda piisa qaropeela fuurama ka isha parpaaccisni. 26 Waaqadda orra Waaqa amanni in kinnini piisa killowwaaw; Waaqa xoori moontada uume. 27 Ulfeena ka kuttuma isha tura caan, kokkonnuma isho xasa ka poraadi a kallaata kara caan. 28 Ishina lekna mankistewwaatiiyyi, ulfeena Waaqa daasha ka hupnaadi upnaada. 29 Ulfeena a maxxaadi parpaaccisnoon Waaqa' xooya! Ka kalisoota qapada ka fuulaadi turopa kulla! Ka pora a qulqullumaadi oppa Waaqa sakatada! 30 Samayta piita piisaayye Waaqa tura xarra, isha piita kode ka kokkonnayshe ka eyye dishe, ikka poraadippa lehni in kinnin. 31 Moontada a xasooden, piita kuli ka xasa qapnaatto! Samaytoppa kida, “Ha Waaqa nuqusa!” 32 Pakateeta isho wa kara ca piisa a yaaqyaaqen, lakka isho wa oppa ca piisa a xasooden! 33 Waaqa piita qara'e farata de'ay, qora kappinoppa xasanne isha tura sammaran. 34 Waaqa xoonampayta, jalalaadi nefo pirama in qapaneey, isha kalataysada! 35 Qinsada ka kida, “Waaqqo inon pahado, ka akkan maxxaayti a qulqullaawe kalataysanno'e, ka kalataaytin jeejjaanno'e, orra ke amanni in kinnini oppa ollopa ino oorsado; ka inon pahe! 36 Waaqa Poqalla a Isira'eeli, paraparaayye ka haka paraparati'i a kalataysamo!” Samayta piisa ka kide, “Ameen! a kalata Waaqa kayo!” Taanteta sakatatta a Kepa'ooni isho Yursaalami kara koddite 37 Akka parpaaccisnitto qara'e, akka kuyyaata piisa mina'e koda Waaqa kodane'e, Taawwiti Asaafi isho a isha quda ca'e fuula taapotase a kodayteeta Waaqa tura diishe. 38 Ka asseew Opeeti'etoomi inna Yidutuuni isho orra a isha quda co nama kunda lehi sette akka ishootta olliiw koda kodane eyye diisheew. Opeeti'etoomi inna Yidutuuni isho Hoosa akka xarra tooytane'e kitamen. 39 Taawwiti ka Sadooqi isho qeesewwa isha quda ca tukkanase a Waaqa kunkunnaata Kepa'ooni qara co tura ishootta diishe; 40 wa malla eyye diishe nefo, akka seerase a Waaqa Isira'eeli daashe qara taafamte mina'e, poqase a kalisoota qara kalisoota kupannitto kalinnaan qara'e akka kuyyaata mina teykanti ka kalaakala kalisoota Waaqa kalshan malla. 41 Ishootta olliiyyi, akka Waaqa kalataysadan ka kidane, “Xoonaadi haka paraparati'i.” Hemaani isho Yidutaani ka orra pila a ata hase a reexame maxxadaasso ka taafamene eyye diishe. 42 Ka akka kaasa isho sokojkoja dawane'e ka oto masmuureta dawammittooyye meeha nessada kirpa a dawamma qara saarumane'e, Hemaani isho Yidutaani kiten; hellaa a diira a Yidutaaniw xarra tooyta'e kitamen. 43 Sekkammaayye, samayta piisa ka tikkaasso opa kale; Taawwiti ka toolaadi saka'e, tikaadipa tiitaawe. |