Tito 2 - Mam of Todos Santos -- Guatemala Unicode

Ko kꞌol xnakꞌtzbil tuj tumelxix

¹ Pero tey, hermano, miꞌn txiꞌ t-xnakꞌtzaꞌna tisen nbint cyuꞌn kej lu, sino xnakꞌtzanxa cye ocslal jaxxix tyol Dios.

² Kbanx cyej xinak tij tuꞌn cyyolen chebe, bix tuꞌn t-xiꞌ cyiiꞌnxin jun cynaablxin jiquen, tuꞌntzen cyniman xjal cyyolxin, bix tuꞌn cytzyun cyiibxin twitz il, bix tuꞌn cykꞌonte cyiibxin nuk tej xnakꞌtzbil jaxxix, bix tuꞌn toc cyakꞌ xjal cyexin, bix tuꞌn tiyꞌx cyuꞌnxin oj n-oc pena cyiꞌjxin.

³ Jax cxeꞌl cyiiꞌn kej xuuj tijtl cychunkꞌlal tuj tumel twitz Dios. Miꞌn chi cub ten xtzꞌiml yol cyiꞌ xjal, bix miꞌn chi oc te cꞌal kꞌeꞌn. Cxeꞌl cyyeecꞌanxuj alcyej baꞌn cyej xuuj cwalx.

⁴ Cxeꞌl cyxnakꞌtzaꞌnxuj cyetxin tuꞌn toc takꞌ cychmiltxin cyuyax cyaltxin cyetxin,

⁵ bix tuꞌn cytzyun cyiibtxin, bix tuꞌn tten cyanemtxin sakxix, bix tuꞌn cyakꞌanantxin baꞌn tuj cyjatxin, bix tuꞌn t-xiꞌ cyyeecꞌantxin cyanemtxin cye juntl, bix tuꞌn cynimantxin tyol cychmiltxin. Ccybinchaꞌ kej txin xuuj cykilcaj lu tuꞌntzen miꞌn cyyolen xjal kaꞌ tiꞌj tyol Dios.

⁶ Jax juꞌx kej kꞌa cwalx, kbanx cyekꞌa tuꞌn cytzyunte cyiibkꞌa twitz cykilca kaꞌ.

⁷ Tencꞌaya te jun yecꞌbil cywitzkꞌa ti tten tuꞌn tbint baꞌn cyuꞌnkꞌa. Oj t-xnakꞌtzana cyekꞌa, yeecꞌanx tnimbila tiꞌj tyol Dios, bix xnakꞌtzanx tyol Dios cabalxix.

⁸ Cꞌoquel tcꞌuꞌja tiꞌj tuꞌn miꞌn tzpet jun yol yaaꞌn tumel tuj t-xnakꞌtzbila, tuꞌntzen miꞌn cyyolen xjal kaꞌ tiꞌj. Ka ma xnakꞌtzana tumel juꞌwa, kej xjal cycyꞌi jyol jaxxix, ctzaal cychꞌixew oj cyyolen kaꞌ cyiꞌja ejeeꞌy ocslal.

⁹ Yal tzunkej akꞌanal tuj taakꞌen cypatrón, kbanx cyexin tuꞌn cynimanxin cyyol cypatrónxin tuj cykilca, bix tuꞌn cyakꞌananxin baꞌn tuj cykilca akꞌuntl, tuꞌntzen cytzalaj cypatrónxin cyiꞌjxin, bix tuꞌn miꞌn tzꞌaj cytzakꞌbeꞌnxin tyol cypatrónxin.

¹⁰ Bix kbanx cyexin tuꞌn miꞌn chi alkꞌanxin tiꞌ cypatrónxin. Nuk oꞌcx tuꞌn t-xiꞌ cyiiꞌnxin cynaablxin jiquenxix, tuꞌntzen toc ke tcꞌuꞌj cypatrónxin cyiꞌjxin. Ka ma bint cykilcaj lu cyuꞌnxin, cchicꞌajaxeltzen ka mejorxix jxnakꞌtzbil tiꞌ Dios, Clol ke.

¹¹ Hermano, il tiꞌj tuꞌn t-xiꞌ tkbaꞌna cye ocslal tuꞌn t-xiꞌ cyiiꞌn cychunkꞌlal tuj tumel, cuma ma tzaj tyeecꞌan Dios t-xtalbil cye cykil xjal. Tuꞌnj t-xtalbilxin ma tzaj tsmaꞌnxin Cristo twitz txꞌotxꞌ, tuꞌntzen kclet.

¹² Bix tuꞌnj t-xtalbilxin ma tzaj tkꞌoꞌnxin xnakꞌtzbil ke ti tten tuꞌn tcyaj kkꞌoꞌn jyaaꞌn baꞌn twitzxin bix tuꞌn miꞌntl tzꞌoc tachen kcꞌuꞌj tiꞌj nuk tikꞌch at twitz txꞌotxꞌ. Nxnakꞌtzanxin ke tuꞌn ktzyunte kiib twitzj il, bix tuꞌn t-xiꞌ kiiꞌn knaabl jiquenxix, bix ti tten tuꞌn kel baꞌn twitzxin joocꞌtzen etoꞌx twitz txꞌotxꞌ.

¹³ Bix cxeꞌl kiiꞌn kchunkꞌlal juꞌwa, cuma nko ayon tiꞌj jun kꞌij te nimxsen tzalajebl, jkꞌij oj tul meltzꞌaj Jclol ke tuya nimxsen tipemal, jxin Jesucristo, jawnex Diosxin.

¹⁴ E xiꞌ tkꞌon tiibxin tuꞌn tcyimxin te kxel, tuꞌntzen kclet tuj tkꞌab il bix tuꞌn ttxjet kanem. E tbinchaxin jlu tuꞌn koc te t-xjalxin sakxix, jun ttanemxin cyaj tuya cykil cycꞌuꞌj tuꞌn cybinchan jbaꞌn.

¹⁵ Cykilcaj lu ma txiꞌ nkbaꞌna tey, xnakꞌtzanx cye ocslal. Cyiwsanx cycꞌuꞌjxin. At tipemala tuꞌn t-xiꞌ tkbaꞌna at cyilxin, cuma t-akꞌanal Diostey. Miꞌn tzꞌel xeꞌta oj cycyꞌi xjal t-xnakꞌtzbila.