Mateo 16 - Mam of Todos Santos -- Guatemala Unicode

Ke xjal ncykane jun yecꞌbil te Jesús

¹ E pontzen tuya Jesús tzunkej xjal nimalxse tuj cyley, ejeeꞌj xjal fariseo, cyuya jun cloj xjal saduceo, bix akꞌkexin niyꞌbelecte tnaabl Jesús tuꞌntzen tcub tzꞌakxin tuj cyyolxin. E xiꞌ cykanenxin tuꞌn t-xiꞌ tyeecꞌanxin tipemalxin tuꞌn tchicꞌajax ka juꞌ otk tzajxin tuya Dios tuj cyaꞌj.

² Pero aj ttzakꞌbeꞌn Jesús cyexin: —Oj n-ex kꞌij, bix cyak t-xeeꞌ cyaꞌj, tzin cykbaꞌna: “Mintiiꞌ jbal nchiꞌj, cuma chicꞌaj t-xeeꞌ cyaꞌj,” tz̈ikey.

³ Bix oj kskix, ka cyak t-xeeꞌ cyaꞌj, tzin cykbaꞌna: “Tzul jbal jaꞌlewe, cuma cyak t-xeeꞌ cyaꞌj, bix at kꞌek muj,” tz̈ikey, bix jax cyuꞌna. At cynaabla tuꞌn tel cyniꞌya tiꞌj techel twitz cyaꞌj, ¿pero titzen tten min n-el cyniꞌya tiꞌj ti nbaj te Dios cyxola tuj tyem te jaꞌlewe?

⁴ Key xjal judío te jaꞌlewe, kaꞌkey bix ma tzꞌel cypaꞌn cyiiba tiꞌj Dios. Min chin cyocslay, sino nuk eteꞌcꞌa kanlte weya mastl yecꞌbil. Pero jtechel tzin cykanena, mlay kꞌoj cyey. Oj pjel wiꞌja tisenxj e baj tiꞌj tyolel Dios Jonás, jatzen cꞌajbel te yecꞌbil cyey―tz̈i Jesús, bix exxin cyxolxin.

Cyxnakꞌtzbil fariseo yaaꞌn tuj tumel

⁵ Iyꞌxtzen Jesús cyuya t-xnakꞌatzxin jlajxe tnijabel aꞌ. Pero tej cyponxin, min e cynaꞌn t-xnakꞌatzxin tuꞌn t-xiꞌ cyiiꞌnxin cywaxin.

⁶ Bix e xiꞌ tkbaꞌnxin cyexin: —Cycꞌojlam cyiiba tuyaj cypan aj fariseo bix xsunj cypan aj saduceo―tz̈ixin tuj ewjel chꞌin tiꞌj cyxnakꞌtzbil fariseo bix saduceo.

⁷ Pero min el cyniyꞌxin tiꞌj tyolxin, bix akꞌkexin yolel cyxolxxin: —Min sul kiiꞌn kwa, pero tcyꞌixin tuꞌn lkꞌet pan cye fariseo oj ttzaj klokꞌoꞌn―tz̈ikexin.

⁸ Pero el tniyꞌ Jesús tiꞌj ti otk tzꞌeꞌla tyolxin tuj cywitzxin, bix e xiꞌ tkbaꞌnxin cyexin: —Key xjal nuk chꞌin n-oc ke cycꞌuꞌja wiꞌja, ¿tiken nchi yolena cyxolxa tiꞌj mintiiꞌ cyway?

⁹ ¿Mimpa ma tzꞌel cyniꞌya tiꞌj baꞌn t-xiꞌ nkꞌoꞌna cyway? ¿Mimpa naꞌn cyuꞌna tej tcub npaꞌna jjweꞌ pan t-xol jweꞌ mil xinak, bix jteꞌ chiꞌl ttxꞌakan pan e jaw cychmoꞌna tej cybaj waaꞌn xjal?

¹⁰ ¿Bix mimpa naꞌn cyuꞌna tej tcub npaꞌna jwuuk pan t-xol cyaja mil xinak, bix jteꞌ chiꞌl ttxꞌakan pan e jaw cychmoꞌna?

¹¹ ¿Tikentzen min s-el cyniꞌya tiꞌj yaaꞌn tiꞌj cyway xiꞌ nkbaꞌna cyey? Juntl maj cxeꞌl nkbaꞌna cyey, cycꞌojlam cyiiba tuyaj cypan aj fariseo bix xsunj cypan aj saduceo―tz̈ixin.

¹² Eltzen cyniyꞌ t-xnakꞌatzxin tiꞌj min e tkbaxin tuꞌn cycꞌojlan cyiibxin tuyaj cypan aj fariseo bix aj saduceo, sino tuya tej cyxnakꞌtzbilxin.

Tej tkbante Pedro ka ja Jesús Tcwal Dios, Jscyꞌoꞌn tuꞌn Dios

¹³ Tejtzen tpon Jesús tuj tnom te Cesarea te Filipo, e xiꞌ tkanenxin cye t-xnakꞌatzxin: —¿Alcye kena tuj cywitz xjal? ¿Ti toc cyuꞌn xjal tiꞌj xjal Smaꞌn tuꞌn Dios tuꞌn ntena cyuya xjal?

¹⁴ Bix aj cytzakꞌbeꞌnxin: —At xjal nkbante ka jay Juan Bautista. At juntl wik nkbante ka jay jtyolel Dios Elías. At juuntl tzin cykbaꞌn ka jay Jeremías. Bix at juuntl tzin cykbaꞌn ja loy juntl tyolel Dios te ootxa―tz̈ikexin.

¹⁵ Bix aj tkanen Jesús: —Yajtzen cyey, ¿altzen kena tuj cywitza?

¹⁶ Bix aj ttzakꞌbeꞌn jxin Simón Pedro: —Ja teja Scyꞌoꞌn tuꞌn Dios te cawel, jay Tcwal Dios iꞌtz―tz̈ixin.

¹⁷ Bix e xiꞌ tkbaꞌn Jesús te Pedro: —Dios ma tzaj tkꞌoꞌn t-xtalbil tey, Simón, tcwal Jonás, cuma ja tumel lu yaaꞌn ma kꞌoj tey cyuꞌn xjal. Nuk oꞌcx Nmana tuj cyaꞌj ma tzaj tyeecꞌan jlu tey.

¹⁸ Cxeꞌl nkbaꞌna tey, jay Pedro, bix “xak” japenina tbiy. Cꞌoquela tisen jun xak cꞌajbel te t-xeeꞌ jun jaaꞌ, bix ja jaaꞌ lu kej xjal chi oquel lpe wiꞌja. Bix mlay caman taaw il cyiꞌj nxjala.

¹⁹ Cxeꞌl nkꞌoꞌna tey tal jaaꞌ ttzi tcawbil Dios tuj cyaꞌj. Jay kbalte ti pjel cyxol ntanema. Alcyej ctkbaꞌy yaaꞌn baꞌn tuꞌn tbint cyxol ntanema twitz txꞌotxꞌ, qꞌueleltzen baꞌn tuj nwitza tuj cyaꞌj. Jax juꞌx alcyej ctkbaꞌy baꞌn tuꞌn tbint cyxol ntanema twitz txꞌotxꞌ, chin cuyalatzen tuj cyaꞌj―tz̈ixin te Pedro,

²⁰ bix e xiꞌ tkbaꞌnxin cye t-xnakꞌatzxin tuꞌn miꞌn jaaꞌ tzꞌoca cykbaꞌnxin ka jaxin Jscyꞌoꞌn tuꞌn Dios.

Tej tyole Jesús tiꞌj tcyamecy

²¹ Cyiꞌj ja tyem lu, akꞌ Jesús xnakꞌtzalec cye t-xnakꞌatzxin il tiꞌj tuꞌn t-xiꞌxin tuj Jerusalén, tuꞌntzen tiyꞌx nim qꞌuixcꞌaj tuꞌnxin cyuꞌn nejenel cye xjal bix cyuꞌn nejenel cye pala bix cyuꞌn txꞌolbal ley. E tkbaxin tuꞌn tbyet-xin, bix cjawetz itzꞌjxin te toxen kꞌij tbyetlenxitlxin.

²² Pero min el tyol Jesús baꞌn tuj twitz Pedro, bix ex ttxcoꞌnxin ja Jesús cyjunalxin, bix akꞌ Pedro ocsalec tcꞌuꞌj Jesús tuꞌn miꞌn tyolenxin juꞌwa. E xiꞌ tkbaꞌnxin: —Taat, miꞌnxit tbyeta. Cutz̈it ka miꞌn bint jlu tiꞌja―tz̈i Pedro.

²³ Pero aj tcyeꞌyen Jesús bix e xiꞌ tkbaꞌnxin te Pedro: —¡Ctela nwitza, Satanás! Pedro, n-oc tona tey ja Satanás. Tcyꞌi Satanás japan baj waakꞌena twitz txꞌotxꞌ. Jatzen tyolja tuyaj cyajbil xjal lepchec tiꞌj Satanás, yaaꞌn tuyaj tajbil Dios―tz̈i Jesús texin.

²⁴ Bix e xiꞌ tkbaꞌntl Jesús cye t-xnakꞌatz: —Alcyej taj tzꞌoc lpe wiꞌja, cykꞌoncjtzen tikꞌch cyaja, ojxe tcyaj cykꞌoꞌna tzalu twitz txꞌotxꞌ. Cykꞌaꞌy cyiiba te cyamecy tuꞌn lepchec wiꞌja, tisenj weya twitz cruz chin byetela.

²⁵ Ja tzunj xjal tcyꞌi tzꞌoc lpe wiꞌja cuma taj tzꞌoc tkꞌon tiib tiꞌj ti taj, cxeꞌl t-xooꞌn tchunkꞌlal. Pero ja tzunj xjal cyjel tkꞌoꞌn tchunkꞌlal te twitz txꞌotxꞌ tuꞌnj lepchec wiꞌja, ctcamantzen tchunkꞌlal te junx maj.

²⁶ ¿Ti cꞌajbela cykilca twitz txꞌotxꞌ te jun xjal ka ma cyaj tkꞌoꞌn tchunkꞌlal te junx maj tuꞌn ttzyet tuꞌn? ¿Bix ma jteꞌtzen ctchjaꞌ jun xjal twiꞌ tchunkꞌlal te junx maj, nuket jacꞌa tlokꞌ?

²⁷ Chin ul meltzꞌaja twitz txꞌotxꞌ tuya tipemal Nmana bix cyuya tsanjel Dios tuj cyaꞌj, bix ctzaal nkꞌoꞌna, inayena, jxjal Smaꞌn tuꞌn Dios tuꞌn ntena cyuya xjal, teeylex juun laꞌ alcye xbint tuꞌn.

²⁸ Jaxxix cxeꞌl nkbaꞌna cyey, at juun cyey tcub tzalu min otk cyim ojxe toc cycyeꞌyena techel ti tten oj tul jxjal Smaꞌn tuꞌn Dios tuꞌn tcawen―tz̈i Jesús.