Apocalipsis 22 - Mam of Todos Santos -- Guatemala Unicode

¹ Bix e tzaj tyeecꞌan ángel jun nimaꞌ weya n-etz twitz tkꞌukbil Dios bix tuyaj Tal Carnel, j-aꞌ te chunkꞌlal te junx maj. Nkoptzꞌaj aꞌ tisen viiyre.

² Nbet nimaꞌ tmij be tej tnom. Bix tuj cycaꞌbel ttziiꞌ nimaꞌ tcub jun wiyꞌ tzeeꞌ te chunkꞌlal te junx maj. Tzin tkꞌoꞌn twitz cablaaj maj tuj jnabkꞌi. Cykilca xjaw tzin tkꞌoꞌn twitz. Bix t-xak tzeeꞌ najben te kꞌanel cye cykilca xjal.

³ Mintiiꞌtl castiwa. Bix jawnex tkꞌukbil Dios bix Jtal Carnel ctemel tuj tnom. Bix chi ajbel t-xjal te.

⁴ Cꞌoquel cycyeꞌyen twitz, bix cꞌoquel tbi tibaj cywitz.

⁵ Mintiiꞌtl koniyan. Bix mintiiꞌtl il tiꞌj tuꞌn cyajben cantil bix kꞌij cye xjal, cuma jax Kman Dios ctemel tuꞌn tkꞌon spiꞌyen cye xjal. Bix chi cawel xjal tuya Dios te junx maj.

Tz̈i Cristo cyjulu chin ul meltzꞌaj naja

⁶ Bix e tzaj tkbaꞌn ángel weya: —Jaxxix kej yol lu, bix baꞌn tuꞌn tke cycꞌuꞌja cyiꞌj. Ja te Dios, Jkaaw, jatzenj Dios e tzaj tkꞌoꞌn tyol cye tyolel nejl tuꞌnj Espíritu Santo, ma tzaj tsmaꞌn tsanjel tuj cyaꞌj jaꞌlewe tuꞌn ttzaj tyeecꞌan cye t-xjal j-at tuꞌn tul.

⁷ Ma txiꞌ tkbaꞌn Jesucristo: “Chin ul naja,” tz̈i. At t-xtalbil Dios cyibaj kej xjal nxiꞌ cyniman kej yol ma cub ttzꞌiꞌbena tuj uꞌj―tz̈i ángel weya.

⁸ Inayena, Juan, e nbiꞌya bix e wila cykilcaj lu, bix tej t-xiꞌ nbiꞌna bix e wila, in cub mutzkꞌaja t-xeeꞌ tken j-ángel otk tzaj tyeecꞌan jlu weya.

⁹ Pero e tzaj tkbaꞌn weya: —Miꞌn tbinchaya juꞌwa, cuma nuk jun t-akꞌanal Dios kena tisen jay bix tisen ke niyꞌtl ocslal nxiꞌ cykꞌumen tyol Dios bix tisen kej nchi niman kej yol kꞌoꞌn tey tuꞌn Dios. Nuk oꞌcx nimsanwe Dios―tz̈i ángel weya.

¹⁰ Bix e tzaj tkbaꞌntl ángel weya: —Miꞌn cub tewena ja uꞌja lu jaaꞌ ma cub ttzꞌiꞌbena tyol Dios, cuma tzul tyem tuꞌn tjapan baj cykilcaj ma cub ttzꞌiꞌbena.

¹¹ Bix oj tjapan baj cykilcaj, kej xjal aj il, tuꞌn cyten aj il. Bix kej xjal tzꞌil, tuꞌn cyten tzꞌilx. Pero kej xjal jiquen, tuꞌn cybinchante jtzꞌaklxix. Bix kej xjal sakxix, tuꞌn cyajben oꞌcx te Dios―tz̈i ángel weya.

¹² Ma txiꞌ tkbaꞌn Cristo cyjulu: “Jeyꞌ, chin ul meltzꞌaj naja. Bix tzul wiiꞌna chojbil te teeylex juun laꞌ alcyej xbint tuꞌn.

¹³ Inayena tuj tneel bix mancꞌbil, t-xeeꞌ tneel bix bajsbil, tisen kej letra A bix Z.

¹⁴ At t-xtalbil Dios cyibaj kej xjal n-el cytxjoꞌn tiꞌj cyxbalen, tuꞌntzen at cyoclen tiꞌj twitzj tzeeꞌ te chunkꞌlal te junx maj, bix tuꞌn cyocx ttzi pwertel te tnom.

¹⁵ Pero kej xjal at tzꞌil cyiꞌj, ke chmambaj, ke aj pajlel, ke byol xjal, kej nchi suuken t-xeeꞌ tken sant, bix cykilca xjal cyaj tuꞌn cyẍtakꞌen, mintiiꞌ cyoclen tuꞌn cyocx tuj tnom.

¹⁶ Inayena, Jesús, ma tzaj nsmaꞌna n-ángela tuꞌn ttzaj tkꞌumen cyey ocslal cykilcaj lu tiꞌj ti pjel. Inayena tcwal jrey David, jcheꞌw njawen te skixa ntxakakan,” tz̈i Cristo.

¹⁷ Tzin tkbaꞌn Espíritu Santo tuyax cykilca ocslal, jt-xuꞌl Jtal Carnel, cyej xjal yaaꞌn ocslal: “Cytzaja.” Bix kej xjal n-oc cybiꞌn ja yol lu, chi tzajxit. Chi tzajxit kej xjal at cyajbil tuꞌn cycꞌan j-aꞌ te chunkꞌlal te junx maj. Chi cꞌanxit. Mintiiꞌ twiꞌ.

¹⁸ Cxeꞌl nkbaꞌna cyej xjal nxiꞌ cybiꞌn kej tyol Dios ma cub ntzꞌiꞌbena tuj ja uꞌj lu, ka at jun xjal ma tzꞌoc kꞌoꞌn mi nuk juntl yol tibaj jyol tzꞌiꞌben tuj ja uꞌja, ctzaal tkꞌoꞌn Dios te kej xitbil tzꞌiꞌben tuj ja uꞌj lu.

¹⁹ Bix ka at jun xjal ma tzꞌel kꞌinte mi nuk jun tyol Dios tzꞌiꞌben tuj ja uꞌj lu, qꞌueleltzen tiiꞌn Dios toclen tiꞌj jtzeeꞌ te chunkꞌlal te junx maj, bix mintiiꞌtl toclen tuꞌn tocx tuj nintzaj tnom xjan.

²⁰ Jxjal ma tzaj tkꞌoꞌn kej yol tzꞌiꞌben tuj ja uꞌj lu, ja Jesús, tzin tkbaꞌn: “Chin ul meltzꞌaj naja.” Juꞌxit ttena. Ctzaja, Kaaw Jesús.

²¹ Tenxittzen t-xtalbil Kaaw Jesucristo tibaj cykilcakey. Oꞌcx nyolja.