Sofonías 1 - Biblia Mam de Quetzaltenango

Tq'ijlalil ttx'u'jil Qman Dyos

¹ A pakb'ab'l ja'lu tzaj tma'n Qman Dyos te Soponiy toj tq'ijlalil Josiy, tk'wal Amon nimaqkawiltoq toj Juda. Ate Soponiy tk'wal Kusi, atzunte Kusi tk'wal Kedaliy, ate Kedaliy tk'wal Amariy ex ate Amariy tk'wal Esekyiy.

² A ntma'n Qman Dyos ja'lu: Kb'el nxitu'ne' tkyaqilju' ati twitz tx'otx'.

³ Kche kb'el nxitu'ne' xjal exqe'ju' txkup, ex kche b'el nnajsa'ne' pich' exqe'ju' kyiẍ, kb'el nq'o'ne' trakpuje'n toj kb'eju' b'inchal myab'a'n ex kb'el nnajsa'ne' xjal twitz tx'otx'. Atzu'n ntma'n Qman Dyos ja'lu:

⁴ Kb'el ntz'e'ysa'ne' twitzju' tnam Juda ex kykyaqilju' najlqe' toj Jerusalen. Kb'el nnajsa'ne' tik'lenju' dyos B'aal tb'i toju' najb'il lu, Ex ikx kb'iju' kpale kb'el najset.

⁵ Che kb'el nxitu'ne' xjal nche' jax tib'aj ja, tu'n kyk'ulun kye che'w, exqe'ju' nche kub' meje ntzaj kyna'n nb'iye' ex tb'iju' dyos Milkom.

⁶ Ex kche b'el nxitu'nju'ye' nel kypa'n kyib' wi'je', aye'ju' min nche' jyo'n ex minti' nche' ul yolil wuk'i'le'.

⁷ ¡Che' numeku'ye' twitz Qman Dyos, qu'n aju' tq'ijlalil Qman Dyos nqaku' ta'! ¡Ate Qman Dyos matxi' kub' tq'o'n jun chojb'il ex matxi' che b'aj t-xjansa'nju' ttxokyin!

⁸ Toju' tq'ijlalil chojb'il kb'el ntz'e'ysa'ne' kwitzju' nejenel —chi Qman Dyos—, exqe'ju' tk'wal nimaqkawil ex kykyaqilju' nok kxb'alun junxi'tl.

⁹ Ex kb'el ntz'e'ysa'ne' kwitzju' nche okx lipan tib'aju' tjpel ja toju' tq'ijlalil tzul, exqe'ju' nche b'ajb'iyun toj ktx'u'jil ex nche b'ajsb'un toj tja tajaw aq'untl.

¹⁰ Atzun ntma'n Qman Dyos ja'lu: Tojtzunju' q'ij lu kche b'injtzel sich' te qanb'il o'nb'il tzajx tk'etzju' tjpel kye kyiẍ tb'i. Kche ẍchilju' xjal toju' tkab' najb'il ex nim tq'ojq'ojel qotx' kwi'ju' ttxa'nwitz kb'injtzel.

¹¹ ¡Che' ẍch'inqe'ye' aye'ye', najliqe'ye' toju' najb'il Morter tb'i, Qu'n kykyaqilju' xk'aẍlel che kyimel, tkyaqilju' nche ch'exb'en pwaq tk'i' sb'ub'l kche b'ajel!

¹² Tojtzunju' tq'ijlalil lu kb'ajel nka'yine' toj Jerusalen tu'n jun t-spik'umal. Ex kb'el ntz'e'ysa'ne' kwitzju' xjal mixti' tzik'a' kyk'u'j nakuj te b'in punli, ex tjunalx nkub' t-xima'n kjalu: ¡Ate Qman Dyos mixti'xte' ktb'incha', nipe' b'a'n ex taq'wix!

¹³ Qu'mtzun, che b'je'lex elq'a'n tk'uwen ex che b'el xitju' tja. che jawil kyb'incha'n kyja extzun lay che najan kyoj; che awal ub'a extzun lay che k'wan b'in ti'j.

¹⁴ ¡Matxi' tzul lq'eju' tq'ijlalil Qman Dyos! ¡Nqaku' ta', tzul ojqelxi'x! Aju' tq'ojq'ojel tq'ij Qman Dyos ajtul tk'ayilxi'xlo: ¡aye'pena' majx kuwqe'xi'x kche ẍch'il!

¹⁵ Jun q'ijte' lu te ttx'u'jil Dyos: te k'ixk'oj, ex te yajb'il, te xitb'il ex te b'ajsb'il, te qxopin ex qlolj, te q'eqmuj ex sjumj b'a'nxi'x;

¹⁶ Jun q'ij tu'n tq'ajset chun ex te kub'sa'n. Kyi'ju' nimaqtnam kuwsa'n kyi'j exqe' ja nimaq kywe'.

¹⁷ Chi Qman Dyos Kja'lu: Tzul yajb'il kyib'aj xjal wu'ne'. Kche b'etel naku'j moẍqe', Qu'n mache b'inchan il nwitze'. K'elel chitju' kychk'el naku'j quq, ex kb'el ch'uqeju' kychib'jil naku'j ttxa alu'mj.

¹⁸ Tojtzunju' tq'ij ttx'u'jil Qman Dyos, lay che kletju' xjal tu'n kysaqpwaq ex kyq'anpwaq, qu'n naku'j q'aq'ju' ttx'u'jil Qman Dyos kb'ajel twanju' tnam tkyaqil. ¡Che b'ajel mankunju' xjal najlqe' twitz tx'otx' toj jun kmujx!