Proverbios 1 - Biblia Mam de Quetzaltenango

Kyoklen q'unb'en

¹ Aye' q'unb'en ja'lu tma Salomon nimaqkawil aj Israel, tk'wal Dab'i.

² A kyajb'enju': tu'n kyq'on nab'l, tu'n qelb'an, ex tu'n tel kynik'tzilju' b'a'n nab'l.

³ Tu'n qanq'i'n tuk'i'l nab'l, ex tu'n qok tnik'alqi'j, tz'aqli ex tu'n lalun qo eltxalpuj.

⁴ Tu'n tten kynab'lju' ku'xun na'mx ttenxi'x kynab'l, tu'n kyel k'atz ex tu'n tb'ent kyximan b'a'nxi'x

⁵ Alkyete ati tnab'l ex b'a'n t-ximante, che kxeltb'i'n, ktenb'elxi'xtzun tnab'ltz ex k'elel tnik'.

⁶ tu'n kykaneju' q'unb'en kyu'n ati kynab'l, exju' kyyol, techlal, ex tu'n tpon toj kynab'l.

⁷ Inten qnab'l qama qnima Qman Dyos, inel kyik'o'nkye xnakju' nab'l ex xnaq'tzb'il.

Nab'l kye ku'xun

⁸ Nky'ajul, b'inxa nab'l nxinq'o'ne' teya ex lalun tzik'tna'lju' t-xnaq'tzb'il ttxuya tu'na,

⁹ qu'n che okyelkye' te jun tuya tb'anilqexi'x te achb'il tqula.

¹⁰ Qa kyajb'ilju' b'inchal il tu'n tkub' sb'u'na kyu'n, ¡lalun taja nky'ajul!

¹¹ Qaj nkyma'nku' teya: Kuttzaja quk'i'le'; noqx qak'an qq'oku' xpatxab' toj b'e tu'n tkyim jun b'a'nqa mixti' til.

¹² Che b'elexkye' xjal tnik'alkyi'j toj qlaq kse'nqe' kyimni nche'x tb'elq'u'n kamik toj muqb'il.

¹³ Ktenb'el txqan qq'inumal, ¡knojel tkyaqil toj qja tu'n qeleq'!

¹⁴ Qlana, toka quk'i'le', ex tkyaqilju' ti'xti' kb'ajel qsipa'n qxolilex, qa chechi.

¹⁵ ¡Laluntzun txi'ya kyuk'i'l nky'ajul! Pa'mil tib'a ti'ju' kyb'e taq'wix,

¹⁶ qu'n nnoktilil kyu'n tu'n kyb'inchan il; ¡nnoktilil kyu'n tu'n tkub' qojl chik'!

¹⁷ Mixti'x tajb'en jun xpatxab' qa q'ancha'l kye pich',

¹⁸ aye'xkye' xjal lu nche kub' q'onte xpatxab' toj kyb'e xob'ajilx ta'ju' kychwinqlal kyu'nx.

¹⁹ Ikytzun nche b'aja' jamjolju': axju' kyjamjoni'n nkub'yonkye.

Txokb'il tu'n nab'l

²⁰ Inkub'sanju' nab'l tk'i' tq'ojq'ojel twi' kyoj ninb'e ex kyoj xky'ichb'e;

²¹ npakb'an kytziju' tnam jachaqja nkychmo'na' kyib' xjal toj nintnam.

²² E' ku'xun mixti' b'a'n kyu'ne', twi'xmayil ex xnakqe'ye', ¿ma kukxtzun mache'xa'ju'ye' mixti' kynab'le', ma kukxtzun kytzalaju'ye' toju' xmayb'il, jtojtzun tz'ok kynab'le'?

²³ Kyb'intzpe'ju'ye' ntzak'b'ile' atzun nq'onxwe' nxew kyeye'; ex kxe'l nyek'u'nju'ye' nxime' kyeye'.

²⁴ Oje che ntxokxi'ye', ex oje che nk'elxi'ye' tu'n kytzaje', aye'tzunkye' min nkyb'i'ne'.

²⁵ Inpe' el kyik'o'ne' nab'l xinq'o'ne'; min nkyq'a' tzak'u' kyib'e' weye'.

²⁶ ¡Kpomil tq'ijlalil chin tzele' kyi'je' ajkykub' b'o'lje'! ¡Chin jawiltzun xmayintze' kyi'je' ajkyb'aj ẍb'aje'ye' tu'n xob'il,

²⁷ ajttzaju' xob'el ex yajb'il, b'isb'ajil ex k'ixk'oj, kse'n jun saqchanpach, nb'aj t-xitu'n tkyaqil!

²⁸ Atzun q'iju' chin kytxka'ye', laytzun chin tzaq'wiwe'; chin kyjyo'tzuntze', layx chin knete' kyu'ne';

²⁹ qu'n nelkyik'u'nju'ye' nab'l ex min kyajb'ile' tu'n kynimane' te Qman Dyos.

³⁰ Min kyajb'ile' tu'n kyk'monteju'ye' nab'l; ex nel kyik'o'nju'ye' tzak'b'il.

³¹ ¡Aye'xe' cheb'o'ljel tu'n kyb'inchb'ene'! ¡ex aye'xe' che nik'b'elte kyxime' myab'a'n!

³² Tu'nx kynab'lju' mixti' b'a'n kyu'n che kyimela', exqe' xnak che kb'el b'o'lj tu'nju' min nok toj kywi';

³³ Atzunju' machin kub' tb'i'ne', k'anq'il toj nak'b'il ex lay tzaj tchi jun xob'ajil ti'j. Chiju' nab'l.