Números 9 - Biblia Mam de Quetzaltenango

Ik'sb'ilte Tq'ij Tzaqpib'l

¹ Tzaj yolin Qman Dyos te Moyses toju' chq'ajlaj Sinayi tb'ajlenxi' jun ab'q'i kyetzlen aj Israel Ejipt, toj tnejel xjaw teju' ab'q'i, tma kjalu:

² Ati tu'n kyik'sante aj Israel q'ij te Tzaqpib'l toju' tq'ijlalil q'ma'ntl,

³ ajtok qale toj tkyajlajoji'n q'ij teju' xjaw lu, kb'el kyik'sa'ne' kse'nxju' nuk'b'il tz'ib'a'n, chij.

⁴ Tchaq'tzun Moysestz kye aj Israel tu'n tkub' kyik'sa'nju' q'ij te tzaqpib'l,

⁵ ex kub'kyik'sa'n toj tkyajlajoji'n q'ij teju' xjaw lu tej tok qale toju' chq'ajlaj Sinayi, kyb'incha kse'nxju' tchaq' Qman Dyos te Moyses.

⁶ Ate'toqtzun junjun ichan mixti' b'ent kyik'santeju' q'ij te Tzaqpib'l toju' q'ij lu, qu'n tz'ilqe'toq tu'n tpaj xi' kytzyu'n jun kyimni. Textzunju' q'ij lu exi' jyolkye Moyses ex Aaron,

⁷ ex xikyma'n te Moyses ikjalu: —Matxi qtzyu'ne' jun kyimni, qu'mtzun tz'ilqo'ye'. ¿Ma laytzun tz'ajli tu'n t-xi' qiq'i'ne' qoyaje' twitz Qman Dyos toju' q'ij q'ma'ntl junx kyuk'i'lju' txqantl aj Israel? chechij.

⁸ Atzunte Moyses xittzaq'we'n kye ikjalu: —Kyyome' nej tzmaxi'j aj nk'monteye' tzaq'web'l tu'n Qman Dyos kyi'je', chij.

^9-10 Tzajtzun tma'n Qman Dyos te Moyses tu'n t-xitma'n kye aj Israel kjalu: Ati tu'n kyik'sante'ye' Q'ij te Tzaqpib'l kykyaqilxe' kyuk'i'lju' kyyajajile' te ninb'ilweye'. Aye'tzu'n tz'ilqe' tu'n tpaj matxi kytzyu'n jun kyimni, mujqa mache'x toj kyb'e najchaq,

¹¹ kb'el kyik'sa'n ajtok qale toj tkyajlajoji'n tajlalju' tkab' xjaw. Kxel kych'yo'nju' rit tuk'i'l k'a itzaj ex wab'j mixti' ttx'amal,

¹² mixti' tu'n tkyaj kyklo'n te juntl q'ij ex mixti' tu'n tkub' kytoqi'n jun b'aq. Kb'el kyik'sa'nju' Q'ij te Tzaqpib'l kse'nxju' nuk'b'il matxi' b'ajx nq'o'ne'.

¹³ Alkyetzunte min xtik'saju' Q'ij te Tzaqpib'l extzun mya tz'il ex min xini toj tb'e najchaq, ati tu'n tex iq'et kyxolju' twanaqil. Mina'jon xtaq'ju' toyaj weye' ayine' Dyos Manb'aj toju' tq'ijlalil q'ma'ntl, kb'el tz'e'yset twitz tu'n tpaju' til.

¹⁴ Exqe' najchaq xjal ate'qe' kyxole' ati tu'n kyik'santeju' Tq'ij Tzaqpib'l te ninb'ilweye' kse'nxju' nuk'b'il matxi' b'ajx nq'o'ne'. Aye'x nuk'b'ilju' che ajb'el kye te najchaq xjal ex kyeju' itz'jniqe' tojxju' tx'otx', chi Dyos.

Muj tib'aj tjaju' yol kyejni b'entti'j

¹⁵ Kub' jupe' muj tib'aju' ja xjan toju' q'ij tej tjaw b'incha'n, aju' ja teju' yol kyejni b'entti'j tu'n Qman Dyos. Ajtzun qok yupj intoq jawb'ent jun tnej q'aq' tib'aju' ja xjan ex inten tzmaxi'j ajqsqix.

¹⁶ Ikytoqtzun in b'aj ju' kukxju': intoq kub' jupe' muj tib'aju' ja xjan te q'ijl, atzu'n te qonik'an jun tnej q'aq'.

¹⁷ Aj tjawju' muj tib'aju' ja xjan, intoq che ik'b'etju' aj Israel, jatzun makub'a' tena'ju' muj, atzuntzu' inche kub' tena'puntl.

¹⁸ Intoq che ik'b'etju' aj Israel ajtmante Dyos, mujqa intoq che kub'ten ja matmaya' Qman Dyos, axtzuntzu' nche kyeja' ten tkyaqilu' tq'ijlalil qa atiju' muj tib'aju' ja xjan.

¹⁹ Qama kyej tenju' muj nimtoj tib'aju' ja xjan, axtoqtzu' ta'qe' aj Israel tu'n kyajb'en te Qman Dyos.

²⁰ Qatzun naqjte'x q'ij nkyajtenju' muj tib'aju' ja xjan, tu'n tchaq'b'il Qman Dyos nkub' b'e kyu'n ex tu'n tchaq'b'il nche kub' tentl.

²¹ Ati maj naqtoq jun qonik'an in kyej tenju' muj, ex intoq jaw te prim; intoq che ik'b'ettzuntz. Qa q'ijl mujqa qonik'an, aj tjawju' muj, intoq kub' b'e kyu'n.

²² Qatzun makub' ten kab'e' q'iju' muj, mujqa jun xjaw mujqa jun ab'q'i tib'aju' ja xjan, intoq che kyejten aj Israel ex min nxikyljo'n kyb'e. Naqtzun qa xjawju' muj, intoq xikyljo'n aj Israel kyb'e.

²³ Ajtmante Qman Dyos, intoq che kub'ten, ex ajtmantetl Qman Dyos, intoq kub' b'e kyu'n. Nche ajb'enxi' te Qman Dyos, kse'nxju' tchaq' te Moyses.