Números 5 - Biblia Mam de Quetzaltenango

Chaq'b'il tu'n kyex xla'jetju' tz'ilqe'

¹ Tzaj tma'n Qman Dyos te Moyses kjalu:

² Q'manxa kye aj Israel tu'n kyex kyxla'ja'ne' kykyaqilju' xjal yab'qe' tu'n xlemtx'a'k mujqa nqojli chik' kyi'j, mujqa mache kyej tz'ilix tu'ntpaj matz'ok kytzyu'n jun kyimni.

³ Tu'n kyex kyq'o'ne' ti'jxi'ju' najb'il, ichan mujqa qya. Tu'n lalun ten tz'il toju' najb'il janajlqina'ye' kyxole', chi Dyos.

⁴ Xikyb'i'n aj Israel tchaq' Qman Dyos te Moyses, eb'je'x kyiq'i'nju' xjal lu ti'jxi'ju' najb'il.

Kawb'il tu'n tq'et t-xel jun ti'xti' mab'o'lj

^5-6 Tzaj tma'n Qman Dyos te Moyses tu'n t-xitma'n kye aj Israel kjalu: Qa ati jun ichan mujqa jun qya myab'a'n tten nwitze' ex matb'incha jun taq'wix te juntl xjal, il ntb'incha'n

⁷ ati tu'n toktq'o'n ti'j. Expe' ati tu'n t-xi' tq'o'n tu'me'l t-xel teju' xjal alqi'j xb'inchana' il, kse'nxju' xtb'incha tk'i'tzun jun tjwe'yi'n tnejtl.

⁸ Qatzun oje kyimju' xjal xb'inchanjtz taq'wix ti'j exqa mixti' jun twitze'l nqaku' jatu'n txa' q'etju' tu'me'l t-xel te, atzu' ktzajel q'eta' weye' tu'n tajb'en teju' pale, tib'ajxi'tlju' rit kb'eltq'o'n tu'n tkub' tq'o'nju' pale tu'n najset tilju' xjal lu.

⁹ Te palete' tkyaqilju' o'nb'il ex oyaj kb'el kyq'o'n aj Israel nwitze' ex kpomel kyiq'i'n twitz pale.

¹⁰ Tkyaqilju' makub' q'o'n nwitze' ex mapon q'i'n teju' pale, tete' paleju', chi Dyos.

Kawb'il tib'aj xky'aqli'n

^11-12 Tzaj tma'n Qman Dyos te Moyses tu'nt-xitma'n kye aj Israel kjalu: Qa ati jun qya makub' t-sb'u'n tchmil

¹³ ex makub' kẍe tuk'i'l juntl ichan ex min b'i'n tu'nju' tchmil, maskye matz'ilix tu'nju' tb'inchb'aj lu toj ewaj, naq ktxu'n tib' qu'n mixti'x jun twitzlalil sel knet tu'n tpaj mixti' sel yal toju' tb'inchb'aj.

¹⁴ Qatzun maxky'aqlinju' chmilb'aj ti'ju' t-xu'jil. Mujqa matz'okten jun chmilb'aj xky'aqlil extzunqa mixti' ntb'incha'nju' t-xu'jil.

¹⁵ Alkyexku' mab'aj kyxolju' kab'e' tu'me'l lu, ati tu'n t-xitiq'i'n ichanju' t-xu'jil twitz pale, ex kxe'l tiq'in kyaje' lib'r tk'i' nik'jan arin ti'j seb'ad te jun oyaj. Naq aju' lay txitqo'n aseyt ex sturak tib'aju' arin, qu'n jun oyajte' tu'ntpaj xky'aqli'n, jun oyaj tu'n tel q'ancha'lixju' il

¹⁶ Kxel tma'nju' pale tu'n ttzaj lq'eju' qya, kb'el tq'o'ntzuntz nwitze'.

¹⁷ Ktzajeltzun tiq'i'n ch'i'n a' xjansa'n toj jun tx'otx' xar ex kjawil tiq'i'n ch'i'n quq toju' ja xjan, kxel t-smo'ntzuntz toj.

¹⁸ Ex ktzajel tiq'i'nju' qya tu'n tkub' we' nwitze', kxel tchitq'u'n twi' ex kb'el tq'o'nju' oyaj tu'n tpaj xky'aqli'n toj tq'ob' tu'n tq'ancha'lix jun il; atzunte' pale ktzajel ttzyu'nju' a' k'a iqa'n qanb'en taq'wix tu'n.

¹⁹ Ktb'incha'tzuntz tu'n ttziyanteju' qya, kxe'l tma'n te kjalu: Qa b'ajx txa' kytzyu'nkyib'e' tuk'i'l juntl ichan ex b'ajx kub'a' tjyo'n juntl ichana twitz tchmila, ex b'ajx kub'a' tkuẍb'a'ntib'a tuk'i'l juntl ichan tu'n ttz'ilixa tu'n, mixtzunti' kb'ajeltetza aj t-xi' tk'wa'nju'ya a' k'a lu iqa'n qanb'en taq'wix tu'n.

²⁰ Qatzun matxi' kub'tjyo'n juntl ichana twitz tchmila, qa matxi' kub'kẍeya tuk'i'l juntl ex matxi' ttz'ilsatib'a tu'ntpaj xkub' tkuẍb'a'ntib'a tuk'i'l juntl ichan,

²¹ tz'okxtzuntza te jun yek'b'il tjaq' qanb'en taq'wix tu'n Qman Dyos kywitz tnam, tu'n t-xi' malju' tk'u'ja, ex k'elelju' tala.

²² Atzun tz'e'ysb'il twitzju'ya tzul aj t-xi' tk'wa'nju'ya a' lu iqa'n qanb'en taq'wix tu'n, chiku'ju' pale, atzu'n qya kxe'l ttzaq'we'n: B'ent-xwit ikju', chiku'.

²³ Kb'eltzun ttz'ib'a'n paleju' qanb'en taq'wix lu ex k'elel ttxjo'n tu'nju' a' k'a.

²⁴ Kxe'l tq'o'ntzuntz teju' qya tu'n t-xitk'wan, tu'ntzun tk'ayix toj tk'u'j tu'n,

²⁵ ex kxel ttzyu'nju' oyaj tu'n tpaj xky'aqli'n toj tq'ob'ju' qya tu'ntzun tkub' tq'o'n nwitze', kb'el tq'o'ntzuntz tib'aju' q'olb'eb'l,

²⁶ ex ktzajel tiq'i'n jun jot ti'ju' oyaj twitz awal k'ok'e'kywitz, kb'el ttz'e'ysa'ntzuntz tib'aju' q'olb'eb'l te jun oyaj te nab'ab'l. T-xilenxi'tzun tq'o'n paleju' a' k'a teju' qya tu'n t-xitk'wan,

²⁷ qa matxi'toq kub'tjyo'n juntl ichan twitz tchmil, kb'ajel k'ayix toj tk'u'ju' qya tu'nju' a' lu iqa'n qanb'en taq'wix tu'n, kxel malju' tk'u'j ex k'elelju' tal, k'okeltzun qyatz te jun yek'b'il te qanb'en taq'wix toju' ttanam.

²⁸ Qatzun mixti'te qya til mixti'te k'ik'ela' ex k-alal.

²⁹ A kawb'il ja'lu tib'aj jun qya qa makub'tjyo'n juntl ichan twitz tchmil ex maxky'aqlin tchmil ti'j,

³⁰ mujqa jun chmilb'aj naqx maxky'aqli'n ti'j t-xu'jil. Ktzajel tiq'i'n ichan t-xu'jil nwitze', ex ktb'incha' pale ti'ju' qya kse'nx ntma'n kawb'il lu.

³¹ Mixtzunti'te chmilb'ajtz til, qatzun matz'elyalju' qya toj til, ktk'ma'ju' tz'e'ysb'il twitz, chi Qman Dyos.