Números 3 - Biblia Mam de Quetzaltenango

Kyajb'eb'l aj Leb'i

¹ Aye' tyajajil Moyses ja'lu ex tyajajil Aaron tej ttzaj yolin Qman Dyos te Moyses twi' witz Sinayi:

² Aye' tk'wal Aaron: Nadab' ju' tzikb'aj, Ab'yu, Eleasar ex Itamar.

³ Kykyajil e'xjanset ex e'ok toj kyoklen tu'n kyajb'en te pale,

⁴ aye'tzunkye' Nadab' ex Ab'yu e'kyim twitz Qman Dyos, qu'n kub' kyq'o'n jun q'aq' junxiku' twitz toju' chq'ajlaj Sinayi. Mixti' ten kyk'wal. Aye'tzunkye Eleasar ex Itamar e'ajb'en te pale tjaq' tkawb'il Aaron, ju' kyman.

⁵ Tzaj tma'n Qman Dyos te Moyses kjalu:

⁶ Txkonqe'tza tyajajil Leb'i tu'ntzun kyq'onte kyib' tjaq' tkawb'ilju' pale Aaron ex tu'n kyajb'en te.

⁷ Kche ajb'el te Aaron ex te tkyaqilju' tnam twitzju' Ja te Mujb'ab'ltib'il, ex aye' kche ajb'el toju' ja xjan.

⁸ Ex che kxe'l kyka'yi'n ti'xti' kche ajb'el toju' Ja te Mujb'ab'ltib'il, ex che ajb'elkye' aj Israel toju' ajb'eb'l toju' ja xjan.

⁹ Pa'nqe'milju'ya aj Leb'i kyi'ju' txqantl aj Israel, tu'ntzun kyajb'en o'kxtzu' te Aaron ex kyeju' tyajajil,

¹⁰ atzunju' ajb'eb'l te pale q'onkja toj tq'ob' Aaron ex toj kyq'ob'ju' tyajajil. Qatzun a'lo' jun matb'inchaju' taq'un pale extzun mya pale, ati tu'n tkyim, chi Dyos.

Te Qman Dyos qe' aj Leb'i

¹¹ Tzaj tma'n Qman Dyos te Moyses kjalu:

¹² Matxi' che jawnsk'o'ne' aj Leb'i kyxol aj Israel te kyxelju' tnejel kyk'wal kykyaqil aj Israel. We qe'we'ye',

¹³ qu'n we qe'ju'ye' tnejel k'wal. Tej kyb'ajkyimju' tnejel kyk'wal aj Ejipt wu'ne', e'kyaj nklo'ne' tnejil kyk'wal aj Israel weye' exqe' tnejel kyal alu'mj. Qu'mtzun weqe'ye'. Ayine' Dyos Manb'aj, chi Dyos.

Jaw kyajlal aj Leb'i

¹⁴ Tzaj tma'n Qman Dyos te Moyses toju' chq'ajlaj Sinayi, kjalu:

¹⁵ Q'inktza jun kyajlal aj Leb'i kse'nx kyb'aj toj junjun ja ex toj k'loji'n kywitze'l kyib', tz'ib'anqeku'xa kykyaqil aj Leb'i q'aqe', ktzajelx kyi'ju' matxi' che el jun xjaw, chij.

¹⁶ Jawtzun tiq'i'n Moyses kyajlal kse'nxju' tchaq' Qman Dyos te.

¹⁷ Aye' tk'wal Leb'i ja'lu: Kerson, Koat ex Merari.

¹⁸ Aye' tyajajil Kerson ja'lu, kywitze'l kyib': Lib'ni ex Semey.

¹⁹ Aye' tyajajil Koat ja'lu, kywitze'l kyib': Amram, Isar, Eb'ron ex Usyel.

²⁰ Aye' tyajajil Merari ja'lu, kywitze'l kyib': Mali ex Musi. Kykyaqil ja'lu tyajajil Leb'i, kse'n ttxolil toj kyja.

²¹ Aye' tyajajil Kerson, Lib'ni ex Simey.

²² Wajxaqlajk'al o'lajnaq (7,500) kyb'aju' q'a tz'ib'et, tzajx kyuk'i'lju' matoq che el jun xjaw.

²³ Aye'ju' jun tnej lu kywitze'l kyib' atzu' ekub'a' najan tkub'exq'ij ti'jxi'ju' ja xjan.

²⁴ Atoq Elyasap tk'wal Lael nejenel kyeju' tyajajil Kerson.

²⁵ Toj kyq'ob'toq ta'ju' ja xjan tu'n t-xi' kyka'yi'n toju' Ja te Mujb'ab'ltib'il, exju' ja xb'alun, exju' tz'u'n tib'aj, exju' xb'alun ttziju' ja,

²⁶ exqe'ju' xb'alun te twi' pe'n, exju' xb'alun te ttziju' pe'n jpulte ti'ju' ja xjan ex q'olb'eb'l, exqe'ju' aqwil inche ajb'en te.

²⁷ Aye' tyajajil Koat ja'lu: Amram, Isar, Eb'ron ex Usyel,

²⁸ junmutx' o'lajnaq kyb'aju' q'a tz'ib'et, tzajx kyuk'i'lju' matoq che el jun xjaw. Toj kyq'ob'u' k'loj kywitze'l kyib' lu ta'ju' ja xjan tu'n t-xi' kyka'yi'n

²⁹ ex atzu' e'kub'a' najan toj tnayajkya'j teju' ja xjan.

³⁰ Atoq Elisapan tk'wal Usyel nejenel kyeju' k'loj lu.

³¹ Tojtoq kyq'ob'ju' k'loj lu ta'ju' kax k'ub'lteju' yol kyejni b'entti'j tu'n t-xi' kyka'yi'n, exju' mes, kykb'el kandil, e' q'olb'eb'l, e'ti'xti' xjanqe' tu'n kyajb'en toju' ja xjan, xb'alun ex kykyaqilyu' inche ajb'en.

³² Atoq Eleasar tk'walju' pale Aaron, nejenel nim toklen kye aj Leb'i, ex atoq taq'unju' xq'uqilkyeju' ka'yilte ja xjan.

³³ Aye' tyajajil Merari ja'lu, Mali ex Musi.

³⁴ O'lajk'al lajnaq (6,200) kyb'aju' q'a tz'ib'et, tzajx kyuk'ilju' ma'toq che el jun xjaw.

³⁵ Atoq Suryel tk'wal Ab'yayil nejenel kye, atzu' e kub'a najan toj tb'a'nq'ob'kya'j teju' ja xjan.

³⁶ Tojtoq kyq'ob' tyajajil Merari ta'qe' ttz'lanilju' ja xjan tu'n t-xi' kyka'yi'n, kyuk'i'lju' tqul, e'tqan, e' kyq'uqb'ilju' tqan ex tkyaqilju' ati kyajb'en toj,

³⁷ ikqe'xju' tqan ti'jileju' tpen, e' kyq'uqb'il tqan, e' t-stakyil ex taqwilil.

³⁸ Xi' najlqe'toq Moyses tuk'i'l Aaron exqe' tk'wal Aaron toj tjawetzq'ij twitzju' ja xjan ex twitzju' Ja te Mujb'ab'ltib'il, intoq kyxq'uqi'n ja xjan toj kyb'iju' txqantl aj Israel. Qa ati jun matb'inchaju' taq'un pale extzun mya pale, intoq kub' b'yo'n.

³⁹ Tej tjaw kyiq'i'n Moyses tuk'i'l Aaron kyajlalju' aj Leb'i kse'nx ttxolil kyyajajil, kse'nxju' tchaq' Qman Dyos te, japun toj kab'mutx' o'lajk'al (22,000) q'a tzajx kyuk'i'lju' matoq che el jun xjaw.

Kywi' tnejel tyk'wal aj Israel

⁴⁰ Tzaj tma'n Qman Dyos te Moyses kjalu: Iq'i'nktza jun kyajlalju' tnejel kyk'wal aj Israel, tzajx kyuk'i'lju' matxi' che el jun xjaw, tz'ib'anku'xa kyb'i.

⁴¹ Ex pa'nqe'kja aj Leb'i weye' te kyxelju' tnejel kyk'wal aj Israel, ayine' Dyos Manb'aj. Ex ikx pa'nqe'kja kyalu'n aj Leb'i weye' te kyxelju' tnejel kyal kyalu'n aj Israel, chi Dyos.

⁴² Jawtiq'i'n Moyses kyajlalju' tnejel kyk'wal aj Israel, kse'nxju' tchaq' Qman Dyos te,

⁴³ kab'mutx' o'lajk'al oxlajnaq oxlajoj (22,273) q'a tz'ib'et, tzajx kyuk'i'lju' matxitoq che el jun xjaw.

⁴⁴ Tzajtzun tma'n Qman Dyos te Moyses kjalu:

⁴⁵ Q'inqe'tza aj Leb'i te kyxelju' tnejel kyk'wal aj Israel exqe' kyalu'n aj Leb'i te kyxelju' kyalu'n aj Israel, qu'n weqe'we' aj Leb'i. Ayine' Dyos Manb'aj.

^46-47 Tu'ntzunju' nimxi'x kyb'aju' tnejel kyk'wal aj Israel kyekywitz aj Leb'i, qaninxa jun oyaj kye te jwe' saqpwaq ti'j junjun tnejel k'wa'lb'aj, aju' saqpwaq ch'inxmi tz'aqla' nik'jan ons talal, kse'nx malb'il in ajb'en toju' ja xjan, tu'ntzun tb'ant kylq'etju' oxlajnaq oxe' (263) tnejel kyk'wal tib'ajxi' kyajlal aj Leb'i,

⁴⁸ q'onxtzu'na medi lu te Aaron ex kyeju' tk'wal te chojb'il kyi'ju' tnejel k'wa'lb'aj lu, chi Dyos.

⁴⁹ Jaw tb'u'yi'n Moyses pwaq te chojb'il kywi' tnejel kyk'wal aj Israel nche ik' tib'aju' kyajlal aj Leb'i,

⁵⁰ oxk'al wajxaqnaq jwe' (1,365) saqpwaq jaw tb'uyi'n, kse'nx talalju' pwaq toju' ja xjan.

⁵¹ Xitq'o'ntzuntz te Aaron ex kye'ju' tk'wal, kse'nxju' tchaq' Qman Dyos te.