Números 28 - Biblia Mam de Quetzaltenango

Oyaj tu'n tkub' tkyaqil q'ij

¹ Tzaj yolin Qman Dyos te Moyses ex tma kjalu:

² Q'onxa chaq'b'il kye aj Israel tu'n ttzaj kyiq'i'n kyoyaj wab'j ex kyoyaj tz'e'ysa'n kukxju' tojku'xi'x tq'ijlalil kyoju' ninq'ij nim kyoklen, te jun oyaj tb'anil tk'ok'jal weye'.

³ Ex q'manxa kye qa aye' kyoyaju'ye' tu'n tkub' kytz'e'ysa'ne' te ninb'ilweye' ilxi'xti'j tkyaqil q'ij: kab'e' qpoj tman rit te jun ab'q'i mixti' kytzakajil.

⁴ Kb'el q'etju' jun te chojb'il prim atzun juntl te qale.

⁵ Atzu'n oyaj kyi'ju' twitz awal k'ok'e', kyaje' lib'r tk'i' nik'jan tb'anil arin xyuq'i'n toj jun litr aseyt olib'o.

⁶ (Atzun chojb'ilju' intz'e'yset kukxju' twi'ju' witz Sinayi, te jun oyaj k'ok'j te Qman Dyos)

⁷ Atzun jun litrju' oyaj b'in tu'n junjun qpoj tman rit. Tu'n tkub' qetju' b'in lu toju' ja xjan te ninb'ilweye'.

⁸ Kb'el q'etju' tkab' qpoj tman rit te chojb'il ajtok qale, ex jun oyaj kyi'ju' twitz awal k'ok'e' tmoj ex jun oyaj b'in, kse'nxju' kb'el q'et te prim. Jun oyajte' lu tb'anilxi'x tk'ok'jal, inkub' tz'e'yset te ninb'ilweye', ayine' Dyos Manb'aj, chi Dyos.

Oyaj toju' q'ij te ojlab'l

⁹ Ati tu'n tkub' kyq'o'ne' kab'e' qpoj tman rit te jun ab'q'iqe' mixti' kytzakajil te chojb'il kyoju' q'ij te ojlab'l, ex ch'inxmi b'eljoj lib'r arin tb'anilxi'x xyuq'i'n tuk'i'l aseyt kyi'ju' twitz awal k'ok'e'kwitz, tuk'i'lju' oyaj b'in.

¹⁰ Kb'el q'etju' chojb'il k'ok'sb'il lu kyoju' q'ij te ojlab'l tuk'i'lxi'ju' oyaj b'in, tib'ajxi'tlju' chojb'il k'ok'sb'il inkub' q'et atl junjun q'ij.

Oyaj junjun xjaw

¹¹ Kb'el kyq'o'ne' kab'e' qpoj tman wakx, jun rit ex wuq qpoj tman rit te jun ab'q'iqe' mixti' kytzakajil, te jun chojb'il k'ok'sb'il nwitze' toj tnejel q'ij te junjun xjaw.

¹² Kb'el kyq'o'ne' masch'i'n oxlajoj lib'r tb'anil arin xyuq'i'n tuk'i'l aseyt tu'n junjun qpoj tman wakx, ch'inxmi b'eljoj lib'r arin xyuq'i'n tuk'i'l aseyt tu'n junjun rit,

¹³ atzun kyaje' lib'r tk'i' nik'jan arin xyuq'i'n tuk'i'l aseyt tu'n junjun qpoj tman rit. Jun chojb'il k'ok'sb'il te' tb'anil tk'ok'jal in tz'e'yset te ninb'ilweye'.

¹⁴ Kab'e' litrju' oyaj b'in tu'n junjun qpoj tman wakx, jun litr tk'i' nik'jan tu'nju' rit ex jun litr tu'n junjun qpoj tman rit. Aye'tzun chojb'il k'ok'sb'ilu' ati tu'n kyq'onteye' tkyaqil xjaw toj ab'q'i.

¹⁵ Tib'ajxi'tltzunju' chojb'il k'ok'sb'il inkub' tkyaqil q'ij, ati tu'n tkub' kyq'o'ne' jun tman chib' te chojb'il tu'n tpaj il tuk'i'lxi'ju' oyaj b'in inkub' tmoj.

Oyaj te Tq'ij Tzaqpib'l

¹⁶ Kb'el ik'setju' q'ij te tzaqpib'l te ninb'ilweye' toj kyajlajoj tajlalju' tnejel xjaw te ab'q'i.

¹⁷ Atzu'n t-o'lajoji'n q'ij jun ninq'ij. Wuq q'ij tu'n kywan wab'je' mixti' ttx'amal.

¹⁸ Tojtzunju' tnejel q'ij teju' wuq q'ij kb'el ik'set jun b'uyjtib'il xjan. Mixti' tu'n kyb'inchanteye' jun aq'untl toju' q'ij lu.

¹⁹ Kb'el kyq'o'ne' kab'e' qpoj tman wakx, jun rit ex wuq qpoj tman rit te jun ab'q'iqe' mixti' kytzakajil, te jun chojb'il k'ok'sb'il nwitze'.

²⁰ Ex kb'el kyq'o'ne' oyaj arin xyuq'i'n tuk'i'l aseyt tmoj ikjalu: masch'i'n oxlajoj lib'r arin tu'n junjun qpoj tman wakx, ch'inxmi b'eljoj lib'r tu'n junjun rit,

²¹ ex kyaje' lib'r tk'i' nik'jan tu'n junjun qpoj tman rit.

²² Ex kb'el kyq'o'ne' jun chib' te chojb'il tu'n tnajset kyile'.

²³ Tkyaqil ja'lu kxel kyq'o'ne' tib'ajxi'ju' chojb'il k'ok'sb'il ju' kb'el kyq'o'ne' tkyaqil q'ij te prim.

²⁴ Iktzun tu'n kyb'inchanteju'ye' junjun q'ij toju' wuq q'ij ninq'ij, te jun oyaj tb'anil tk'ok'jal tz'e'ysa'n te ninb'ilweye'. Ati tu'n tkub' kyq'o'ne' tuk'i'lju' oyaj b'in inkub' tmoj, tib'ajxi'lju' chojb'il k'ok'sb'il kb'el kyq'o'ne' junjun q'ij.

²⁵ Ex k'okyel kyq'o'ne' juntl b'uyjtib'il xjan toj twuqi'n q'ij. Mixti' tu'n kyb'inchante jun aq'untle' toju' q'ij lu.

Oyaj tnejel twitz awal

²⁶ Ex ikx k'okyel jun b'uyjtib'il xjan kyu'ne' toju' ninq'ij to smani'n, ajttzaj kyq'o'ne' twitz awal k'ok'e'kywitz weye' ti'ju' twitz kyawale' toj tq'ij tnejel twitz awal. Mixti' tu'n kyb'inchante jun aq'untle' toju' q'ij lu.

²⁷ Ktzajel kyq'o'ne' kab'e' tal tman wakx, jun rit ex wuq qpoj tman rit te jun ab'q'iqe', te jun chojb'il k'ok'sb'il weye'.

²⁸ Exju' oyaj arin xyuq'i'n tuk'i'l aseyt, masch'i'n oxlajoj lib'r tu'n junjun qpoj tman wakx, atzun ch'inxmi b'eljoj lib'r tu'nju' rit

²⁹ atzun kyaje' lib'r tk'i' nik'jan tu'n junjun qpoj tman rit.

³⁰ Ex kb'el kyq'o'ne' jun chib' te chojb'il tu'n tnajset kyile'.

³¹ Kb'el kyq'o'nju'ye' chojb'il k'ok'sb'il lu tuk'i'lju' oyaj twitz awal k'ok'e'kywitz ex b'in inche kub' tmoj, tib'ajxi'tlu' chojb'il k'ok'sb'il inkub' junjun q'ij. Mixti' kytzakajilju' alu'mj che kb'el kyq'o'ne'.