Números 22 - Biblia Mam de Quetzaltenango

Tchaq' nimaqkawil B'alak ttxokli B'alaam

¹ Xikyljo'n aj Israel kyb'e ex e'kub' tenpuntl toju' plan tx'otx' te Moab', toj tjawetzq'ij teju' a' Jordan, jlaj Jeriko.

² Til B'alak tk'wal Sipor titi' ojetoq kyb'incha aj Israel kyi'ju' amorey.

³ Ikqe'xju' xjal aj Moab' eb'ajxob' tej kyka'yinte nimtoq txqan kyb'aju' aj Israel.

⁴ Kymatzun xjaltz aj Moab' kyeju' tijwnaq te Madyan ikjalu: Kb'ajelte' qtx'otx' kyu'n kykyaqilju' xjal lu, kse'n k'ul toj kojb'il inb'aj tu'n wakx, chechij. Atoq B'alak nimaqkawil toj Madyan toju' tq'ijlalil lu,

⁵ xitchq'o'n ttxokli B'alaam, tk'wal B'eor, ju' atitoq Petor tk'etzju' nin a' Euprates, toju' tx'otx' Amab'. Xitma'n nimaqkawil B'alak kyeju' t-sanjel tu'n t-xikyma'n te B'alaam ikjalu: Matxi' tz'etz jun tnam Ejipt, matxi'xi'x che kub'chmet toj tkyaqilju' tx'otx', atzu'n ja'lo matxi' che ul kanun nk'etze'.

⁶ Qu'mtzun lwix kuttzaja ex qaninxa taq'wix kyib'aju' tnam lu, qu'n kuwqe'xi'x kyeqwitze'. Qapetzun ikykb'ela'kyi'ju' wu'ne' ex tu'n kyex nq'o'ne' ti'jxi'ju' tx'otx'. B'i'n wu'ne' nche japunju' qanb'en b'a'n mujqa qanb'en toq'wix nche tb'incha'na, chechiku'ye' te, chij.

⁷ Exi'tzu'n tijwnaq aj Moab' ex aj Madyan tuk'i'l pwaq tu'n tchjetju' qanb'il taq'wix, tetzunj kypon ja ta'toq B'alaam, xikyma'nju' t-sanjel B'alak te.

⁸ Atzunte B'alaam xitma'n kye ikjalu: —Kukykyaje' tzalu teju' qonik'an ja'lu, kxel nq'o'ntzun tzaq'web'ltze' kyeye' kse'nxju' ktzajel tma'n Qman Dyos weye', chij. E kyejtzun ten tijwnaq te Moab' tuk'i'l.

⁹ Kub'tzun tyek'u'ntib' Qman Dyos twitz B'alaam ex tzaj tqani'n te ikjalu: —¿Alkyeqe'ju' xjal ate'qe' tuk'i'la lu? chij.

¹⁰ Xi'tzun ttzaq'we'n B'alaam te ikjalu: —A B'alak tk'wal Sipor, nimaqkawil toj Moab', saj chq'onkye tu'n kytzaj q'malte weye'

¹¹ qa matxi' kub'chmet jun tnam etzni Ejipt toj tkyaqilju' tx'otx'. Atzunte B'alak tajb'il tu'n nxi'ye' qanil taq'wix kyib'aj, tu'n tlonte qa ikykb'ela'kyi'ju' tu'n ex tu'n kyex tq'o'n ti'jxi' ttx'otx', chij.

¹² Tzajtzun tma'n Qman Dyos te B'alaam kjalu: —Lalun txi'ya kyuk'i'l ex lalun tqani taq'wixa kyib'aju' tnam lu, qu'n oje kub' nky'i'wla'nwe' tnam lu, chi Dyos.

¹³ Tetzunj tjawe' B'alaam te juntl q'ij, xitma'n kyeju' nejenel e'tzaj tchq'o'n B'alak kjalu: —Kutanj kyi'je' toj kytx'otx'e'. Mintzaj tq'o'n Qman Dyos anb'il weye' tu'n nxi'ye' kyuk'i'le', chij kye.

¹⁴ Anjtzun kyi'ju' nejenel te Moab' tk'etz B'alak ex xikyma'n te kjalu: —Min xtaj te B'alaam tu'n ttzaj quk'i'le', chechij.

¹⁵ Atzunte B'alak ilxi'xti'j tu'n, e'xitchq'o'n junjuntl nejenel nimxi'x kyb'aj ex nimxi'x kyoklen kyekywitzju' e'xitchq'o'n tnejel.

¹⁶ Exi'tzuntz tk'etz B'alaam ex xikyma'n te ikjalu: —Chi B'alak, tk'wal Sipor, saj tma'n: B'inchama xtalb'il lalun kub' t-xk'a'yu'n tib'a tu'n ttzaja.

¹⁷ Kjawil nnima'ntzuntza b'a'nxi'x ex knb'incha'ye' tkyaqilju' matqaniya weye'; kuttzaja, b'inchama xtalb'il tu'n tqaninteya taq'wix tib'aju' tnam lu, chij teya, chechij te.

¹⁸ Atzunte B'alaam xittzaq'we'n kye ikjalu: —Maskye matzaj tq'o'n B'alak tkyaqilju' q'anpwaq ex saqpwaqju' ati toju' tja te kawb'il, mixti' tu'n nb'inchante junwe' ti'xti' nim toklen mujqa b'o's, qa min chq'o'n tu'n Qman Dyos Ndyose'.

¹⁹ Kutzun kykyaje' teju' qonik'an ja'lu, atzun wile' ti'ti' ktzajel tma'n Qman Dyos weye' toju' maj lu, chij kye.

²⁰ Tetzun qonik'an kub' tyek'u'ntib' Qman Dyos te B'alaam ex tzaj tma'n te kjalu: —Ma'na' che kyaju' ichan lu tuk'i'la, we'ktza ex kutxi'ya kyuk'i'l, ex o'kxte kxel tb'incha'nju'ya o'kxu' kxe'l nma'ne' teya, chi Dyos.

Okyal tanjl Qman Dyos twitz B'alaam

²¹ Tetzunj tjawe' B'alaam te juntl q'ij, jaw tq'o'n tiqb'ilju' tb'ur ex xi'tzuntz kyuk'i'lju' nejenel te Moab'.

²² Iqa'n toqtzun B'alaam tu'n tb'ur lepchqe'toq kab'e' tmajin ti'j. Tzajtzun ttx'u'jil Qman Dyos ti'j qu'n matxitoq txi', kub' tq'o'n tib'ju' tanjl Qman Dyos mqolteju' tb'e tu'n tmalun tzik'.

²³ Tej tka'yinteju' b'ur atitoq tanjl Qman Dyos toj nky'ajchaq b'e tuk'i'l jun k'uẍtx'e'nb'il toj tq'ob', eltpa'ntib' ti'ju' b'e ex okx tq'o'ntib' tojxi' tx'otx'; atzunte B'alaam oktjuma'n tu'n t-xi' jumajtl toju' b'e.

²⁴ Kub'tzun we'tlju' tanjl Qman Dyos janik'a' b'e txol awal b'incha'ntoq tapi tu'n ab'j toj kykab'il plaj.

²⁵ Tej tka'yintetl b'ur tanjl Qman Dyos, xitqejb'a'n tib' twitzju' tapi ab'j b'incha'n, oktjtz'o'n tkux B'alaam twitzju' ab'j. Atzunte B'alaam oktjuma'n jumajtl.

²⁶ Atzu'n tanjl Qman Dyos xinej kywitz ex kub' we' jab'o's toqju' b'e, ja mixjaloja tu'n txa' qpa'nqib' toj jun plajtl.

²⁷ Tej tka'yinte b'ur tanjl Qman Dyos, kub' t-xon tib' twitz tx'otx'. Atzunte B'alaam tzaj ttx'u'jil ti'j ex oktjuma'n tu'n jun tze.

²⁸ Tetzu'n kmuj lu tb'incha Qman Dyos tu'n tyolinju' b'ur, tu'n t-xitma'n te B'alaam kjalu: —¿Ti'tzu'n matxi nb'inchaye' teya? Toxmaji'n wok tb'yo'nju'ya ja'lo, chij.

²⁹ —Naqna' nxmayina wi'je', noqwit ati jun kchil toj nq'ob'e', jaku' kub' nb'yo'na ja'loxi'x, chi B'alaam te.

³⁰ Atzunte' b'ur xitma'n te kjalu: —Ayine' tb'ura, matxi' chejina wi'je' toj tkyaqilju' tchwinqlala ex kanli twitza b'ajx nb'inchaye' teya ikju', chij. —B'ayte' ikju', chi B'alaam xittzaq'we'n.

³¹ Tb'inchatzun Qman Dyostz tu'n tka'yinte B'alaamju' tanjl atitoq toj nky'ajchaq b'e tuk'i'l jun k'uẍtx'e'nb'il toj tq'ob'. Kub'tzun meje B'alaamtz majx ku'punju' tplaj twitz tx'otx',

³² tzajtzun tma'n tanjl Qman Dyos te kjalu: —¿Tiqu'n soka' tb'yo'n oxmaja tb'ura? Ayinwe' ẍin ule' mqolteya, qu'n myab'a'nju' tb'eya toj nwitze'.

³³ Machin tilju'ye' tb'ura ex lwiy sel tpa'ntib' wi'je' toju' oxmaj, noqwit min sel tpa'ntib' wi'je', matxi'wtlo kub' nb'yo'na, atzunju' tb'ura ma'wtlo kyej anq'in wu'ne', chij.

³⁴ Atzunte B'alaam xittzaq'we'n teju' tanjl Qman Dyos kjalu: —Matxi' chin b'inchan ile', mixtoqti' b'i'n wu'ne' qa atiya tzalu jpulte nb'eye'. Qatzun myab'a'n toj twitza tu'n nxi'ye', k'anjel wi'je', chij.

³⁵ Tzajtzun ttzaq'we'n tanjl Qman Dyos te kjalu: —B'a'n tu'n t-xi'ya kyuk'i'lju' ichan lu, naq aju' o'kx kxel tma'nju'ya aju' kxe'l nma'ne' teya, chij. Xi' B'alaam kyuk'i'lju' nejenel e'xitchq'o'n B'alak,

K'monjtz B'alaam tu'n B'alak

³⁶ tetzunj tb'inte B'alak qa xi'toq tpon B'alaam, etz k'lulte toj jun nintnam te Moab', ttziju' nin a' Arnon, jata' tnqachilju' ttx'otx',

³⁷ ex xitma'n te kjalu: —Matxinchq'o'ne' ttxokliya tu'n ttzaja ilxi'xti'j, ¿tiqu'ntzun min tajb'iltoqa tu'n ttzaja? ¿ma intoq t-xima'na qa mixti' ninb'ilteya qu'ne'? chij.

³⁸ Atzunte B'alaam xittzaq'we'n te kjalu: —Luqine' lu, matxi' chin ule' nelteya. Naqtzun aju' mixti' woklene' tu'n nyoline' tu'nx nnab'le'; o'kxwe' b'a'n tu'n t-xi' nma'n aju' ktzajel tma'n Dyos weye', chij te.

³⁹ Xi'tzun B'alaamtz tuk'i'l B'alak Kyiryat-usot,

⁴⁰ jaxa' tma'na' B'alak tu'n kykub' b'yo'n ttxu wakx ex ttxu rit, tu'n kyxi' iq'i'n te B'alaam ex kyeju' nejenel intoq che b'et tuk'i'l.

⁴¹ Tetzun juntl q'ij te prim, pon B'alak tk'etz B'alaam ex jax tiq'i'ntzuntz B'amot-b'aal, jaka'yeta' kyxmuj aj Israel tu'n.