Números 19 - Biblia Mam de Quetzaltenango

Nuk'b'il tu'n kyẍtilsetu' tz'ilqe'

¹ Tzaj tma'n Qman Dyos kye Moyses ex Aaron kjalu:

² Ayine' Dyos Manb'aj, nxinq'o'ne' chaq'b'il lu tu'n t-xi' kyma'ne' kye aj Israel tu'n ttzaj kyiq'i'n jun ttxu wakx kyeqti'j kyeye', mixti' jun ttzakajil ex b'ajx tz'oka' k'lo'n tze ti'j twi'.

³ Kxel kyq'o'ntzuntze' teju' pale Eleasar, k'elex tiq'i'ntzuntz ti'jxi'ju' najb'il, kxe'l tma'n tu'n tkub' b'yo'n twitz.

⁴ Kjawil tiq'i'n pale Eleasar ch'i'n chik' tu'n twi'tq'ob', ex kxe'l twitxk'a'n wuq maj ti'ju' Ja te Mujb'ab'ltib'il.

⁵ Kb'el tz'e'ysa'ntzun ttxu wakxtz twitz, ex kb'el tz'e'ysa'nju' ttz'umal, tchib'jil, tchk'el, exju' ttxa.

⁶ Ktzajel tiq'i'ntzun paletz tze k'ute, jun tqan k'ak'ul ex xb'alun kyeq, kche okyex tq'o'ntzuntz tkyaqil toju' q'aq' ja intz'e'ya'ju' wakx;

⁷ kttx'ja'tzun t-xb'aluntz ex k-ichil, b'a'n tu'n tokxtzuntz toju' najb'il, maskye kjelten tz'il tzmaxi'j te qale.

⁸ Exju' ichan xkub' tz'e'ysanteju' ttxu wakx, kttx'ja' t-xb'alun, ex k-ichil, ex kjelten tz'il tzmaxi'j te qale.

⁹ Juntl ichan ẍtilsa'ntib' kse'nxu' nuk'b'il, kjawil b'uyinte ttza'jilju' ttxu wakx, kb'el tq'o'ntzuntz toj jun najb'il ẍtilun ti'jxi'ju' najb'il. K'ajb'elju' tza'j lu kye aj Israel tu'n tb'inchetju' a' te ẍtilsab'l. Tkyaqilju' lu jun chojb'il tu'n tpaj il.

¹⁰ Kttx'ja'ju' xjal xjaw b'uyinteju' tza'j t-xb'alun ex kjelten tz'il tzmaxi'j te qale. Jun kawb'ilte' lu majx kjelten, k'ajb'el kyeye' aj Israel ex kyeju' najchaq xjal najliqe' kyxole'.

¹¹ Alkyete matxi' ttzyu'n alkyexku' jun kyimni, kjelten wuq q'ij tz'il.

¹² Kttxja'tib' toj toxi'n q'ij ex toj twuqi'n q'ij tu'nju' a' te ẍtilsab'l, kjel tentzuntz ẍtilun. Qatzun minti' xt-ẍtilsatib' toj toxi'n q'ij ex toj twuqi'n q'ij, lay kyejten ẍtilun.

¹³ Qa ati jun xjal matz'oktmko'n jun kyimni ex min xt-ẍtilsatib', inkub' ttz'ilsa'nju' ja xjan weye', qu'mtzun ati tu'n tkub' najset kyxol aj Israel. Qu'n minti' xwitxk'et tu'nju' a' te ẍtilsab'l, tzilxte'.

¹⁴ A nuk'b'il ja'lu qa ati jun makyim toj jun pach xb'alun: Kykyaqilju' ate'qe' toju' pach ex kykyaqilju' mache okx toj, che kjel tz'ilix wuq q'ij.

¹⁵ Kykyaqilju' kykb'el a' min tkub' kyjpel mujqa mya jpu'nqe' b'a'nxi'x, che kjelten tz'il.

¹⁶ Kykyaqilju' matxi kytzyu'n jun xjal kyajni b'yo'n mujqa makyim tu'n yab'il, mujqa tb'aqil xjal kyajni kyim, mujqa jun muqb'il toj kojb'il, wuq q'ij kjelten tz'il.

¹⁷ kyi'jtzunju' tz'il lu, ktzajel iq'et ch'i'n tza'j ti'ju' ttza'jilu' wakx kub'ni tz'e'yset tu'n tpaj il, kb'elex q'et toj jun tkb'el, kb'elex kyq'o'ntzuntze' toj jun k'wil tu'n tku'x a' tib'aj tzajnix toj t-xiklil.

¹⁸ Juntzun ichan jsoq' ktzajel tiq'i'n jun tqan k'ak'ul, kb'elex tak'sa'n toju' a' ex kxel twitxk'a'ntzuntz ti'ju' ja ex kyib'aju' toj tuja, ex kyi'ju' xjal ate' atzu', ex ti'ju' matxi ttzyu'n t-xmilal mujqa tb'aqilju' xjal kub'ni b'yo'n mujqa kyim tu'n yab'il, mujqa aju' muqb'il.

¹⁹ Ati tu'n twitxk'etju' xjal tz'il toj toxi'n q'ij ex toj twuqi'n q'ij tu'n jun xjal jsoq'. Matxitoq ẍtilsettzuntz toj twuqi'n q'ij. Atzunju' xjal tz'il kttx'ja' t-xb'alun ex k-ichil, ex kjelten tz'il tzmaxij te qale.

²⁰ Qa ati jun xjal tz'il ex min xt-ẍtilsa'ntib', ati tu'n tex iq'et toju' ttanam, qu'n inkub' ttz'ilsa'nju' ja xjan weye'. Qu'n minti' xwitxk'et tu'nju' a' te ẍtilsab'l, tz'ilxte'.

²¹ Jun kawb'ilte' lu majx kjelten. Alkye mawitxk'ante juntl tuk'i'lju' a' te ẍtilsab'l, ati tu'n ttxjonteju' t-xb'alun. Alkye matxi tzyunteju' a' te ẍtilsab'l, kjelten tz'il tzmaxi'j ajqok yupj.

²² Tkyaqilju' matz'okmko'n tu'n jun xjal tz'il kjelten tz'il, ex alkye matxi tzyunte jun xjal tz'il kjelten tz'il, tzmaxi'j ajqok yupj, chi Qman Dyos kye.