Números 15 - Biblia Mam de Quetzaltenango

Kawb'il kyib'aju' chojb'il

^1-2 Tzaj tma'n Qman Dyos te Moyses tu'n t-xitma'n kye aj Israel kjalu: Ajkyokxe' toju' tx'otx' kxe'l nq'o'ne' kyeye' tu'n kynajane' toj,

³ ex ajttzaj kyq'o'ne' jun tman wakx mujqa jun rit tu'n tkub' kytz'e'ysa'ne' te ninb'ilweye' te jun chojb'il mujqa chojb'il k'ok'sb'il, qa tu'n tjapun jun kyyole' tziya'ntl kyu'ne', jun oyaj tu'n tb'is kyk'u'je', mujqa te jun ninq'ij,

⁴ aju' makub'q'onte oyaj lu, ati tu'n tkub' tq'o'ntl kyaje' lib'r tk'i' nik'jan tb'anil arin xyuq'i'n tuk'i'l jun litr aseyt.

⁵ Expe' ikx ati tu'n tkub' tq'o'n jun oyaj ta'l ub'a, jun litr kb'el tib'aj junjun qpoj tman rit.

⁶ Qatzun tman ritju' chojb'il, kb'eltq'o'n ch'inxmi b'eljoj lib'rtl arin xyuq'i'n tuk'i'l masch'i'n jun litr aseyt

⁷ ex masch'i'n jun litr ta'l ub'a, te jun oyaj k'ok'j weye'.

⁸ Qatzun qpoj tman wakxju' chojb'il makub', te jun chojb'il k'ok'sb'il mujqa jun chojb'il te b'inchjtib'il, mujqa tu'n tjapun jun yol tziya'ntl,

⁹ kb'eltq'o'n masch'i'n oxlajoj (13.2) lib'rtl arin xyuq'i'n tuk'i'l kab'e' litr aseyt,

¹⁰ tuk'i'l kab'e' litr ta'l ub'a, te jun oyaj tz'e'ysa'n tb'anil tk'ok'jal weye'.

¹¹ Atzun tu'n tb'inchetju' ti'j junjun tman wakx, junjun tman rit, junjun qpoj tman rit, mujqa junjun qpoj tman chib' ajtkub' q'o'n.

¹² Kb'el q'etju' oyaj kse'nxju' q'ma'ntl ti'jile junjun alu'mj ajtkub' q'et, kse'nxju' kyajlal alu'mj.

¹³ Ati tu'n kyjapunju' nuk'b'il lu kyu'n kykyaqil aj Israel ajtkub' kyq'o'n jun kyoyaj tz'e'ysa'n tb'anil tk'ok'jal nwitze'.

¹⁴ Qatzun jun te najchaq xjal, qa jun ajb'etu'n mujqa majx najli kyxole', tajb'il tu'n tq'onte jun toyaj weye' tz'e'ysa'n tb'anil tk'ok'jal, aye'x nuk'b'ilju' ati tu'n tjapun kyu'n kse'nxju' kye'.

¹⁵ Aye'xkye nuk'b'ilju' kche ajb'el kyeye' ex kyeju' te najchaq xjal; majx kjelten te jun kawb'il tu'n tajb'en kyeye' ex kjel kyma'ne' kye kyk'wale' toj wiqi'nwiq.

¹⁶ Junx kawb'il ex junx nuk'b'il k-ajb'el kyeye' ex kyeju' te najchaq xjal, chi Dyos te Moyses.

^17-18 Tzaj tma'n Qman Dyos te Moyses tu'n t-xitma'm kye aj Israel kjalu: Ajkyokxe' toju' tx'otx' ja che kxe'la' wiq'i'ne',

¹⁹ ex ajttzyet kywanteju'ye' triy intzaj toj, ati tu'n tel kypa'ne' ch'i'n tu'n tkub' kyq'o'ne' nwitze'.

²⁰ Kse'n intzaj kyq'o'ne' tnejel tnej triy aj tb'je'l kytriyi'ne', ikxtzu'n ti'ju' tnejel q'otj makyb'inchaye', kb'el kyb'incha'ne' wab'j te oyaj weye'.

²¹ Ati tu'n kyb'inchanteju'ye' oyaj lu kukxju'.

²² Qatzun naqx myanim matzik' tna'l kyu'ne' tu'n kyb'inchanteye' junju' xnchaq'e' te Moyses

²³ kxe'l qex toju' q'ij aj t-xi' q'ma'n kyeye' tu'n tjapun kyu'ne' ex kyu'nju' kyyajajile', ati tu'n kyb'inchanteju'ye' lu:

²⁴ Qa kykyaqilju' tnam ẍe kyej myab'a'n wuk'i'le' ex mya xima'nju' kyu'n, kykyaqilju' tnam kb'el kyq'o'n jun qpoj tman wakx te jun chojb'il k'ok'sb'il tb'anil tk'ok'jal weye', kyuk'i'lxi'ju' oyaj twitz awal k'ok'e' ex ta'l ub'a kse'nxju' nchaq'e'; expe' kb'el kyq'o'ne' jun chib' te chojb'il tu'n tpaj il.

²⁵ Oktzun ktb'incha' pale aq'untl nwitze' tu'n kyk'monte tkyaqil tnam Israel najsb'ilte kyil, ex kb'el nnajsa'ne' kyil, qu'n naq tu'n tpaju' sik'tna'l kyu'n ẍe kyaja' toq'wix wuk'i'le' ex matzaj kyiq'i'nju' kyoyaj weye' ex chojb'il tu'n tpaj il.

²⁶ Kb'el nnajsa'ne' kyil tkyaqilju' tnam Israel kyuk'i'lju' te najchaq xjal najliqe' kyxole', qa naq tu'n tpaju' matzik' tna'l kyu'n tnam.

²⁷ Qatzun naq junju' xjal xkyaj toq'wix tu'n tpaj matzik' tna'l tu'n, aju' xjal lu kb'eltq'o'n jun qpoj ttxu chib' te jun ab'q'i te chojb'il tu'n tpaj il.

²⁸ Kxel tb'incha'n paleju' aq'untl nwitze' tu'n tk'met najsb'il tilju' xjal lu tu'n tpaj matzik' tna'l tu'n, ex kb'el nnajsane'.

²⁹ Ax nuk'b'ilju' k'ajb'el kye' aj Israel ex kyeju' te najchaq xjal najliqe' kyxole', qa naq tu'n tpaju' matzik' tna'l ẍe kyaja' toq'wix.

³⁰ Qatzun jun xjal mab'inchan il ex xima'na tu'n, aj Israel mujqa jun najchaq xjal, il xtb'incha nwitze'. Qu'mtzun mixti' tu'n ttentlju' xjal lu kyxolju' ttanam,

³¹ qu'n matz'el tik'o'nju' nyole' ex min ẍe japunju' nnuk'b'ile' tu'n; majx k'elex iq'et kyxol kykyaqilju' ttanam ex kjeltenju' til tib'ajx, chi Qman Dyos.

Tz'e'ysb'il witzb'aj qa min xjapunju' q'ij te ojlab'l

³² Tej ate'toq aj Israel toj chq'ajlaj, knet jun ichan kyu'n intoq b'uyin si toju' q'ij te ojlab'l.

³³ Aye'tzunju' e'okyalsante xikyiq'i'n kywitz Moyses ex Aaron, ex kywitz kykyaqilju' tnam,

³⁴ ex okx kyjpu'n, qu'n na'mtoq tb'entti'j titi' kb'inchetel ti'j.

³⁵ Tzajtzun tma'n Qman Dyostz te Moyses kjalu: Ati tu'n tkub' b'yette' ichan lu. Kykyaqil aj Israel che b'ajel xonte toj ab'j ti'jxi'ju' xmuj, chij.

³⁶ Etztzun q'i'ntz kyu'n aj Israel ti'jxi' kyxmuj, e'oktentzuntz xolte toj ab'j tzmaxi' tkyim, kse'nxju' tchaq' Qman Dyos te Moyses.

Ttxa'n kyxb'alun aj Israel

^37-38 Tzaj tma'n Qman Dyos te Moyses tu'n t-xitma'n kye aj Israel kjalu: K'okyel kyb'incha'ne' kytxa'nju' kyxb'alune' exqe'ju' kyyajajile'. K'okyel kyb'incha'ne' ttxa'n tu'n q'in morad.

³⁹ Ajtzun t-xi' kyka'yi'ne' ttxa'n, che tzajel kyna'ne' tkyaqilju' chaq'b'il b'ajx nma'ne' kyeye', ex che kyb'incha'ye' tu'ntzun lalun che anq'intle' kse'nxju' kynab'le' ex kyajb'ile', qu'n kyu'ntzunju' jaku' tz'ela' kypa'n kyib'e' wi'je'.

⁴⁰ Ktzajel kyna'ntzuntze' tkyaqilju' nchaq'b'ile' ex kche kyb'incha'ye', ex kyxjansa' kyib'e' weye'.

⁴¹ Ayine' Dyos Manb'aj, inetz iq'inkyeye' toj Ejipt tu'n kyk'ulune' weye', chi Dyos.