Números 12 - Biblia Mam de Quetzaltenango

E'yolin Mariy tuk'i'l Aaron ti'j Moyses

¹ E' aq'wi Mariy tuk'i'l Aaron yolil taq'wix ti'j Moyses, qu'n mje tuk'i'l jun qya aj Etyope.

² Expe' kyma kjalu: Myana' o'kx tuk'i'l Moyses matxi' yolina' te Qman Dyos; ex ikx matxi' yolin quk'i'le', chechij. Ex tb'i Qman Dyos kyol.

³ O'kxtoq te Moyses jun ichan me'sxi'x twitz tx'otx'.

⁴ Qu'mtzun tzaj tma'n Qman Dyos kye Moyses tuk'i'l Aaron ex Mariy tu'n kyxi' kyoxil toju' Ja te Mujb'ab'ltib'il. Exi'tzuntz kyoxil atzu'.

⁵ Ku'tztzun Qman Dyostz toj jun tnej muj jupli ex kub'ten ttziju' Ja; exi' ttxko'ntzun Aarontz tuk'i'l Mariy, tetzunj kypon twitz

⁶ tzaj tma'n Qman Dyos kye kjalu: kyb'intzju'ye' kxe'l nma'ne' kyeye' lu: Qa ati jun nsanjelale' kyxole', inchin yoline' tuk'i'l toj naku'j witzik' ex inchin yoline' tuk'i'l toj witzik';

⁷ atzu'n tuk'i'lju' nmajine' Moyses mikxa' nb'incha'nju'ye'. Nxi'x japunte tu'n kyekywitz kykyaqilju' nmajine',

⁸ mojli qwitze' inchin yoline' tuk'i'l ex toj jun yol chik'lixi'x. Qatzun inchin tka'yi'ne', ¿tiqu'ntzun inche yolina'ye' taq'wix ti'j?, chi Dyos.

⁹ Tzaj ttx'u'jil Qman Dyos b'a'nxi'x kyi'j, xi'tzuntz.

¹⁰ Naqtzun in jawju' muj tib'aju' Ja, etz b'ent xlemtx'a'k ti'j Mariy, majx kyej saqaxju' tchib'jil. Tetzunj t-xi' ka'yin Aaron te Mariy, til qa matxitoq kub' b'ent toj xlemtx'a'k,

¹¹ xitma'ntzuntz te Moyses kjalu: B'inchama xtalb'il, lan kub' ttz'e'ysa'na qwitze' tu'nju' qile' lu, qu'n mixti' qnab'le' xqb'inchaye'.

¹² Lalun taja tu'n tkyejten kse'n jun ne'ẍ kyimnitl ajtitz'ji, ju' in itz'ji tuk'i'lu' tchib'jil naqx in t'uqjtl, chij.

¹³ Kub'santzun Moysestz te Qman Dyos ex tma: Nman Dyos, b'inchama t-xtalb'il, q'anama, chij.

¹⁴ Atzunte Qman Dyos tzaj ttzaq'we'n te kjalu: Naqwit tz'ok tzub'a'n toj twitz tu'n tman, kb'el ch'ixwi wuq q'ij. Kyq'omix wuq q'ije' ti'jxi'ju' najb'il, yajxi'tzuntel b'a'n tu'n tanjtztlti'j kyxole', chij.

¹⁵ Exq'i'ntzun wuq q'ij Mariy ti'jxi'ju' najb'il. Tojtzunju' tq'ijlalil lu minti' e' ik'b'etju' tnam atzu'.

¹⁶ Tetzunj tpon jumajtlju' Mariy kyuk'i'l, e'ik'tzun b'ettz e'tzajx Aserot, ex e'kub' tenpuntl toju' chq'ajlaj Paran.