Números 10 - Biblia Mam de Quetzaltenango

Chun saqpwaqqe'

¹ Tzaj tma'n Qman Dyos te Moyses kjalu:

² B'inchanku'ya kab'e' chun saqpwaqqe' tx'no'nqe' tu'n pojb'il, che ajb'el tu'na txokb'ilkye xjal ex tu'n t-xi' q'et techlal tu'n kyik'b'et.

³ Ajtzun kyq'ajtzetju' kab'e' chun, kykyaqilju' tnam kyb'uyi'kyib' twitza ttziju' Ja te Mujb'ab'ltib'il tuk'i'l Dyos.

⁴ Qatzun naq jun xxi'q'ajtzet, o'qe'kxju' nejenel kye junjun tnej kyyajajil kyb'uyi'kyib'.

⁵ Qatzun mujliju' kyq'ojq'ojel chun kyuk'i'l sich' kuw, kche ik'el b'etju' ate'qe' toj tjawetzq'ij,

⁶ tojtzun tkab' tq'ojq'ojel chun kche ik'el b'etju' ate'qe' toj tnayajkya'j. Qa mujliju' kyq'ojq'ojel chun kyuk'i'l sich', a intma'nju' tu'n kyik'b'ete'.

⁷ Qatzun naq o'kxju' kyq'ojq'ojel chun, a intma'nju' tu'n kyb'uyinte kyib' xjal.

⁸ Aye'ju' pale tyajajil Aaron kche q'ajtzalkyeju' chun. Jun kawb'ilte' lu majx kjelten kyeye'.

⁹ Qama tz'ok tzaqpaj jun ajq'oj q'ojil kyi'je' toju' kytx'otx'e' ex ati tu'n kyexe' q'ojil, kyq'ajtzanqe'xe' chun ex che ẍch'inqe'ye' kuw. Kche tzajel nna'ntzuntze' ex kche kletele' wu'ne' kyeju' kyajq'oje', ayine' Dyos Manb'aj.

¹⁰ Ex che kyq'ajtzanqe'xju'ye' chun kyoj q'ij te tzalajb'il, kse'nqe' ninq'ij mujqa q'ij te ak'a'j xjaw, aj t-xi' kyq'o'ne' chojb'il k'ok'sb'il ex chojb'il te b'inchjtib'il. Oktzun che tzajel nna'ne'. Ayine' Dyos Manb'aj, chi Dyos te Moyses.

Tej kyik'b'et aj Israel toj chq'ajlaj Sinayi

¹¹ Toj tjunaqi'n (20) q'ij teju' tkab' xjaw te tkab' ab'q'i, jawju' muj tib'aju' ja xjan teju' yol kyajni b'antti'j.

¹² Kub' b'e kyu'n aj Israel, e'ik'b'et toju' chq'ajlaj Sinayi. Atzu' we'ya'ju' muj toj chq'ajlaj Paran.

¹³ Kse'nx ojetoq tchaq' Qman Dyos te Moyses,

¹⁴ nejlqe' xjal te q'oj nche b'et tjaq' tb'ander Juda, atoq Naason tk'wal Aminadab' nejenel kye.

¹⁵ Nejlitoq Natanael tk'wal Swar kywitzju' xjal te q'oj kye tyajajil Isakar.

¹⁶ Nejlitoq Elyab' tk'wal Elon kywitzju' xjal te q'oj kye tyajajil Sab'ulon.

¹⁷ Kub'tzun kyxitu'nju' ja xjan, ex e ik'b'etju' tyajajil Kerson ex tyajajil Merari, aye' iqalte' ja xjan.

¹⁸ Kyi'jxi'tzuntl, lepchqe'xtoqju' xjal te q'oj inche b'et tjaq' tb'ander Rub'en, ju' atoq Elisur tk'wal Sedewr nejenel kye.

¹⁹ Nejlitoq Selumyel tk'wal Surisaday kywitzju' xjal te q'oj kye tyajajil Simeon.

²⁰ Nejlitoq Elyasap tk'wal Rewel kywitzju' xjal te q'oj kye tyajajil Gad.

²¹ Kyi'jxi'tltzun lepchqe'xtoqju' tyajajil Koat, aye' iqalkyeju' ti'xti' xjanqe'. Ajtzun kypon matxi'toq b'aj b'incha'nju' ja xjan.

²² Kyi'jxi'tl ja'lu lepchqe'xtoqju' xjal te q'oj inche b'et tjaq' tb'ander Eprayin, ju' atoq Elisama tk'wal Amyud nejenel kye.

²³ Nejlitoq Kamalyel tk'wal Pedasur kywitzju' xjal te q'oj kye tyajajil Manases.

²⁴ Nejlitoq Ab'idan tk'wal Gedeoni kywitzju' xjal te q'oj kye tyajajil B'enjamin.

²⁵ Tetzun b'asb'il, kyi'jxi'ju' txqantl xjal te q'oj, lepchqe'xju' inche b'et tjaq' tb'ander Dan, ju' atoq Ayeser tk'wal Amisaday nejenel kye.

²⁶ Nejlitoq Pakyel tk'wal Okran kywitzju' xjal te q'oj kye tyajajil Aser.

²⁷ Nejlitoq Ayra tk'wal Enan kywitzju' xjal te q'oj kye tyajajil Neptali.

²⁸ Atzun nuk'b'enkye xjalju' te q'oj kxol aj Israel tej tkub' b'e kyu'n.

Xitk'le'n Moyses tb'alok

²⁹ Jun q'ij xitma'n Moyses teju' tb'alok Ob'ab', tk'wal Rewel ju' aj madyan: —Maqo'xqe' toju' tx'otx' oje tma Qman Dyos tu'n ttzaj tq'o'n qeye'. Qo'ya quk'i'le' ex kqb'incha'qe' b'a'n teya, qu'n oje tma Qman Dyos tu'n tb'inchante b'a'n kye aj Israel, chij.

³⁰ Atzunte Ob'ab' xittzaq'we'n te ikjalu: —Lay, awe' wajb'il tu'n tanjwi'je' toj ntx'otx'e' ja ta'qe' nwitze'le', chij.

³¹ Lalun txi'ya, chi Moyses te. Tojtzqi'nta b'a'nxi'x ja b'a'n tu'n qkub' tena' toj chq'ajlaj, ex b'a'n tu'n tkub'neja qwitze'.

³² Qama tzaja quk'i'le', kkotzila quk'i'le' ti'ju' tb'anil ktzajel tq'o'n Qman Dyos qeye', chi Moyses te.

³³ E'ik'tzuntz tk'etzu' witz te Qman Dyos, oxe' q'ij eb'et. Nejlitoqju' kax k'ub'lteju' yol kyejni b'entti'j tu'n Qman Dyos kywitz, jyolte jun najb'il jatu'n kyojlana'.

³⁴ Naq inb'ent kyik'b'et te q'ijtl, intoq b'etju' muj te Qman Dyos kyib'aj.

³⁵ Ajtik' iqa'nju' kax, intoq tma'n Moyses ikjalu: ¡Iq'i'nktz tib'a Na'n Dyos! ¡Che kub'xwit sputju' tajq'oja! ¡Che kub'xwit oqju' inche el ik'unteya aj t-xi' ka'yi'na kyu'n! chij.

³⁶ Ajtzun twe'ju' kax, intoq tma'n Moyses ikjalu: ¡Kutzaja ja'lo Nman Dyos, kyuk'i'lju' txqan kyxjal aj Israel te q'oj! chij.