Marcos 1 - Biblia Mam de Quetzaltenango

Npakb'an Xwan jawsal a' toj chq'ajlaj

¹ Iktu'me'l ja'lu tej ttzaj qeju' tpakb'al b'a'n nyolin ti'j Krist Tk'wal Dyos.

² Kse'n tz'ib'a'n toju' tuj Isayiy t-sanjelal Dyos kjalu: Kxe'l nnejb'a'ne' nsanjelale' twitza tu'n tb'inchanteju' tb'eya.

³ Njaw tq'ojq'ojel twi' jun xjal kuw toj chq'ajlaj, intma'n: Kyb'inchame' tb'e Qman Dyos; kb'inchame' tb'e tzinun ti'j, chij.

⁴ Pontzun Xwan jawsal a' toj chq'ajlaj; intoq tpakb'a'n kye kkyaqil xjal qa ilti'j tu'n tanjtzti'j kyanmi ex tu'n tjaw a' kwi', tu'ntzun tkub' tnajsa'n Dyos kyil.

⁵ Kkyaqiltzu'n xjal najlqe' toj Juda ex toju' nintnam Jerusalen, intoq che pon b'ilte tpakb'ab'l Xwan. Intoq jawtz kma'n kyil, ex intoq jaw a' kywi' tu'n Xwan toju' nin a' Jordan.

⁶ Tzmal kamey toq t-xb'alun Xwan b'incha'n, ex tz'u'n tok te k'alb'il tk'u'j; atzu'n twa aju' ẍt'ikt'u'l ex ta'lkab' toj aq.

⁷ Intoq tma'n toju' tpakb'ab'l kjalu: Ati jun lepchitz wi'je' nimxi'x tipumal kye nwitze', mixpeti'x japumniwe' woklen tu'n tel npoq'i'ne' kyaq'e'l t-xajab'.

⁸ Majaw nq'o'nwe' a' kwi'ye' tu'n a'; atzunte a jawsb'il a' kywi'ye' tu'n aju' ajkyk'monteye' Xewb'aj Xjan, chi Xwan.

Jaw a' twi' Jesus

⁹ Kyojtzu'n q'ij tej intoq jaw a' kywi' xjal tu'n Xwan, etz Jesus toj Nasaret toj tx'otx' Kaliley, pon ex jaw tq'o'n Xwan a' twi' toju' nin a' Jordan.

¹⁰ Textzu'n kmuj tjatz Jesus toju' a', til tjqetju' kya'j ex xi'toq tkb'u'l Xewb'aj Xjan tib'aj nakuj jun paloms.

¹¹ Ex tzaj jun tq'ojq'ojel wi'yj toj kya'j, tma: Ateju'ya Nk'wale' k'u'jla'nxi'x wu'ne', ex jawni nk'o'ne', chij.

Ok Jesus toj joyb'ilti'j tu'n tajaw il

¹² Xi'tzun q'i'n Jesus tu'n Xewb'aj Xjan toj chq'ajlaj.

¹³ Ten kab'naq (40) q'ij ex qonik'an Jesus atzu', najan kxol tojk'ul txkup, oktzuntz toj joyb'ilti'j tu'n tajaw il, ex eb'ju'l anjl ajb'el te.

Tzyet taq'un Jesus toj Kaliley

¹⁴ Tokxlenxi'tzun jpu'n Xwan toj kars, pon Jesus Kaliley pakb'alteju' tpakb'al b'a'n ti'ju' tkawb'il Dyos.

¹⁵ Intoq tma'n: Matxi' tzul tq'ijlalil tu'n tkawin Dyos, kutantzti'j kyanmiye' ex kyokslame' tpakb'al b'a'n, chij.

E'ttxok Jesus kyaje' xjal tzyul kyiẍ

¹⁶ Intoq b'et Jesus ttzi njab' toj Kaliley. Tetzunj tlonte Simon tuk'i'l Leẍ ju' titz'in, tzyul kyiẍqe', intoq ku'x kq'o'n pa tzyub'l kyiẍ toju' a'.

¹⁷ Xitma'n Jesus kye: —Che lpetze' wi'je', lay che tzyuntl kyiẍe', xjal qe'tl che ulel kyiq'i'ne' wuk'i'le', chij kye.

¹⁸ Lwiyxi'xtzun b'aj kyej kq'o'n kypa tzuyb'il kyiẍ, ex eb'ajxlpe ti'j Jesus.

¹⁹ Tej t-xilq'e ch'i'ntl Jesus, tilu' Santyay tuk'i'l Xwan ju' titz'in mo ttzik, tk'wal Seb'edeyqe', ate'toq tojun b'ark, intoq che xk'ojin kpa tzuyb'il kyiẍ.

²⁰ E'tzaj txko'n tu'n Jesus, kyejtzun kq'o'n kma'n kyuk'i'lju' kmajin toju' b'ark, exi' lpetzuntz ti'j Jesus.

Jun ichan tzyu'ntoq tu'n tajaw il

²¹ Epon toju' tnam Kaparnawum, okx Jesus toju' ja te k'u'lb'il toj q'ij te ojlab'l ex aq'wi xnaq'tzalkye xjal.

²² Inxi'xtoq che lab'ti xjal ti'ju' xnaq'tzb'il ntq'o'n; qu'n intoq xnaq'tzan tuk'i'l nim toklen, mikxa' se'n nkq'o'n xnaq'tzal kawb'il.

²³ Atitoqtzun jun ichan toju' ja te k'u'lb'il, tzyu'n tu'n tajaw il, jawẍch'in, tma:

²⁴ —¿Titi' toklena qi'je' Jesus aj Nasaret? ¿Matzula xitulqeye'? Wojtzqi'nata, anateju'ya Xjan Tk'wal Dyos, chij.

²⁵ Atzunte Jesus xitma'n te tajaw il kjalu: —¡Kuttziya, ex tzaqpinkja ichan lu! chij.

²⁶ Jawtzun lu'lunju' xjal ex majxkub' tz'aq tu'n tajaw il, ex jawẍch'in tajaw il kuw ex kyej ttzaqpi'n xjal.

²⁷ Kkyaqiltzu'n xjal eb'jaw sak'puj tu'n ja'lu ex intoq kma'n kxolx: —¿Tiloti' ja'lu? ¡Intq'o'n jun ak'a'j xnaq'tzb'il, extzun tuk'i'l toklen! ¡Expe' ntq'o'n chaq'b'il kye tajaw il, ex nxi' knima'n! chechij.

²⁸ Lwiyxi'xtzun kub' puqli tyolji Jesus toj tkyaqil tx'otx' Kaliley.

Q'anetju' tji Luch qya tu'n Jesus

²⁹ Tetzunj kyetz toju' ja te k'u'lb'il, exi' Jesus kyuk'i'l Santyay ex Xwan kyja Simon ex Leẍ.

³⁰ Kuẍli toqju' qya, tji Simon yab'toq tu'n kyaq. Xi'tzun kyma'n te Jesus,

³¹ xi'tzun lq'e Jesus tk'etz, xittzyu'n tq'ob' ex jaw twab'a'n; textzu'n kmuj lu elju' kyeqti'j ex q'anet, aq'witzuntz b'inchalte kwa ex e'wa'n tu'n.

Nim yab' eq'anet tu'n Jesus

³² Texlenxi'tzun q'ij matxi'toq qo ok yupj, eb'ju'l q'i'n kkyaqilju' xjal yab'qe' exqe' tzyu'nqe' tu'n tajaw il tk'etz Jesus,

³³ ex kkyaqilju' xjal toju' tnam pon kychmo'n kyib' ttziju' ja.

³⁴ Nim xjal eq'anet tu'n Jesus te chukchaq yab'il, ex nim tajaw il eb'je'x t-xla'ja'n; extzun min taj tu'n kyolinju' tajaw il, qu'n kyojtzqi'ntoq alkye Jesus.

Pakb'an Jesus toj Kaliley

³⁵ Jawe' Jesus b'a'n prim na'mtoq qsqix, extzuntz ti'jxi' nintnam, xi' na'l Dyos jamixti'qe' xjal.

³⁶ Exi' Simon kyuk'i'lju' tuk'i'l jyolte Jesus,

³⁷ tetzunj tokyal kyu'n, xikma'n te: —Kkyaqil xjal nche jyon ti'ja, chechij.

³⁸ Atzunte Jesus xitma'n kye: —Qo'qe' kyoju' txqantl najb'il nqaku'; ex ati tu'n t-xi'npakb'a'ne' tyol Dyos kye xjal atzu', qu'n a ẍin etza'ju'ye', chij.

³⁹ B'aj tb'eti'n Jesus toj tkyaqil tx'otx' Kaliley, intoq xitma'n tpakb'al b'a'n kyojile ja te k'u'lb'il toj junjun tnam, intoq che ex t-xla'ja'n tajaw il ex nche tzaqpet xjal tu'n.

Q'anet jun xjal te xlemtx'a'k tu'n Jesus

⁴⁰ Ul jun xjal tk'etz Jesus yab'toq tu'n xlemtx'a'k, kub' meje twitz Jesus ex xitma'n te: —Qape' jaku' tb'inchaya xtalb'il, tu'n nq'anete' tu'na, chij.

⁴¹ Tzajtzun q'aq'an tk'u'j Jesus ti'j, oktmko'n ex xitma'n te: —Awajb'ilju'ye'. ¡Kq'anetela teju' xlemtx'a'k! chij.

⁴² Textzu'n kmuj lu b'anixju' xjal ex majx elju' xlemtx'a'k ti'j.

⁴³ Xi'tzun tma'n Jesus te tu'n tanj, ex xi'xi'xtab'tzi'n te kjalu:

⁴⁴ —Lantzun txi' tma'na lu kye xjal, naq o'kx kutxi'ya ex yek'u'ktib'a te kpale aj Juda, ex q'onxa oyaj tchaq' Moyses, tu'ntzun kymante pale qa matxi' q'aneta, chij.

⁴⁵ Atzunte' ichan xi' ex okten yolilteju' matxitoq tb'incha Jesus kye kkyaqil xjal. Tu'ntzun tpaju' min tyek'utltib' Jesus toj juntl tnam, axtoqtzu' nkyeja' ten ti'jxi' tnam jamixti'qe' xjal; aye'tzunkye xjal intoq che tzaj toj tkyaqil plaj ex intoq che ul tk'etz Jesus.