Jonás 4 - Biblia Mam de Quetzaltenango

Tzaj ttx'u'jil Jonas ti'j Dyos

¹ Tzaj ttx'u'jil Jonas tu'n tpaju' tb'incha Qman Dyos ikju', ex min kub' toj twitz.

² Qu'mtzun kub'ten na'l Dyos ex xitma'n te: —Nman Dyos, ikyna'tzun nmaju'ye' lu tej tinqinxtoqe' toj ntx'otx'e' qa ikytoq kb'ajelju'. Qu'npe'na' lwiy nxi' oqe' toj tx'otx' Spanya, qu'n b'i'nxi'x wu'ne' lwiy ntzaj q'aq'an tk'u'ja, ex mya lwiy ntzaj ttx'u'jila, ex b'i'n wu'ne' nimxi'x tk'u'jlalila, qu'n ntpakb'a'n jun tz'e'ysb'ilwitzb'aja, ex lwiy najtzti'j tk'u'ja.

³ Qu'mtzun Nman Dyos, nchin kub'sane' teya tu'n nkub' tb'yo'na. Ate b'a'nju' tu'n nkyime' kyetwitz tu'n wanq'ine', chij.

⁴ Atzunte Qman Dyos tzaj ttzaq'we'n te: —¿Ma atzun b'a'n toj twitza tu'n ttx'u'jina? chij.

⁵ Etztzun Jonas toju' nintnam ex kub'ten toj tjawetzq'ij teju' nintnam; kub' tb'incha'n jun t-xmuj atzu' ex kub' qe tjaq'ju' tewun, intoq nayon titi' kb'ajel ti'ju' nintnam.

⁶ Atzunte Qman Dyos tb'incha tu'n ttzaj ch'iy junwi' tze tu'n ttenxi'xtl t-xlekun Jonas, tu'ntzun tten b'a'nxch'i'ntl. Nxi'xtoq tzalaj Jonas ti'ju tal wi' tze lu.

⁷ Tetzunj qsqix te juntl q'ij, tb'incha Qman Dyos tu'n tokten jun xton walteju' wi' tze, ex kub' tzqij tu'n.

⁸ Tetzunj tjawu'l q'ij, tzaj tq'o'n Qman Dyos jun kyq'iq' moq'moj toj tjawetzq'ij, tu'ntzun yalxju' q'ij toj twi' Jonas, tna' Jonas qa majxtoq kb'el numj ex tajb'iltoq tu'n tkyim. —Masb'a'n tu'n nkyime' kyetwitz tu'n wanq'ine', chij intoq tma'n.

⁹ Atzunte Qman Dyos xittzaq'we'n te: —¿Ma b'a'n toj twitza tu'n ttzaj ttx'u'jila naq tu'nju' makub' tzqiju' wi' tze? —¡B'a'na'tzun nela' toj nwitze'! ¡Naq ch'i'naqx min chin kyimaye' tu'n ntx'u'jile'!, chi Jonas xittzaq'we'n te Dyos.

¹⁰ Atzunte Qman Dyos xitma'n te: In pena' nexch'yonta jun tal wi' tze toj tk'u'j, extzun myaya xi' awante ex mya tu'na xch'iya'; toj junx qonik'an xch'iya' ex toj juntl xkub'a' tzqij.

¹¹ ¿Ma laytzun b'ajxwe' nk'u'j ti'ju' Ninib'e, jun nintnam nintzku' ja ta'qe' kab'mutx' lajk'al (20,000) xjal mixti' b'i'n kyu'n se'n tu'n kykleta', ex nim txqan kyalu'n? chi Dyos.