Jonás 3 - Biblia Mam de Quetzaltenango

Anjtzti'j kyanmi xjal toj Ninib'e

¹ Tzaj yolin jumajtl Qman Dyos te Jonas, ex xitma'n te:

² Kuxtxi'ya toju' nintnam Ninib'e ex pakb'anxa kye aju' kxe'l nma'ne' teya.

^3-4 Xi'tzun Jonas Ninib'e, kse'nxju' tchaq' Qman Dyos te. Nintnam toqte Ninib'e, te oxe' q'ij qb'e tu'n tb'aj qb'eti'n. Okx Jonas toju' nintnam, b'et jun q'ij q'malte tuk'i'l tq'ojq'ojel twi' kuw: ¡Kb'el xitu'nte' Ninib'e ajtjapun kab'naq q'ij! chij.

⁵ Aye'tzu'n xjal toju' nintnam, nimaq kyoklen ex ch'i'n kyoklen, eb'aj okslan te Qman Dyos, etz jun tqanil kyu'n tu'n kymewayin ex okkyq'o'n kyi'j jochin te b'is.

⁶ Tetzunj tpon tqanil teju' nimaqkawil te Ninib'e, ex ikxte jawe' toju' tq'uqb'il te tkawb'il, eb'je'l tiq'i'nju' ti'j te oklenj, ex oktq'o'n ti'j jochin te b'is ex kub' qe toj tza'j.

⁷ Etztzun tq'o'n nimaqkawil jun chaq'b'il toj tkyaqilju' nintnam, kjalu: Mix-a'lo' jun tu'n twan. Ex mixti' tu'n txi' q'et kwaju' wakx ex rit.

⁸ Kyq'onk kyi'je' jochin ex che kyktxunqe'me' kyalu'ne' tu'n xb'alun jochin te yek'b'il k'ixk'oj, ex che kub'sane' twitz Qman Dyos tuk'i'l tkyaqil kyipumale'. Kytzaqpinkju'ye' taq'wix nkyb'incha'ne' ja'lo teyile junjun;

⁹ qape' jaku' kub' tnajsa'n Qman Dyos qil ex qaj nkub'ku' tk'u'j, laytzun qokyimtzu', chij.

¹⁰ Tzaj tka'yi'n Qman Dyosu' ntoq kyb'incha'n xjal aj Ninib'e exqa ntoq kyej kytzaqpi'n kyb'inchb'aj taq'wix, kub't-xima'n tu'n lalun tzaj tq'o'ntlju' taq'wix kyib'aj kse'n ojetoq tma kye.