Jonás 2 - Biblia Mam de Quetzaltenango

Tna'j Dyos Jonas

¹ Kub'santzun Jonas te Qman Dyos, tzmax toj tk'u'ju' kyiẍ,

² tma: Nkub'sane' teya Nman Dyos toju' yajb'ilweye', atzunta ntzaj ttzaq'we'na, Tzmax t-xexi' muqb'il te kamik nkub'saniye' teya, ex ntzaj ttzaq'we'na.

³ Nku'x t-xona tzmax t-xe ninnjab', ex majx nkyej mulq'aje' tjaq' tnimal a'. E ik'ju' nimaq ttolob' a' wib'aje' aju' tzaj tq'o'na.

⁴ Oje nna'ye' qa matoq chinetz tiq'i'na twitza; ex majxkub' nximane' qa layxtoq tz'ok nka'yi'ntlju'ye' tjaya xjan.

⁵ Majx nkyej mulq'aje' tjaq'ju' a'; majx nku'x naje' t-xe ninnjab'; b'aj tb'alq'intib'ju' k'ul ti'j nwi'ye' toj a'.

⁶ Nku'x mulq'aje' tzmax t-xexi' ninnjab'; ¡kub' nximane' qa majxtoq chin kjeltene' toj tejumajx! Atzunta Nman Dyos machin tkola teju' kamik.

⁷ Tej nna'nteye' ch'inxtltoq nkyime'; tzaj nna'na, Nman Dyos; japun nna'j dyose' teya toju' tjaya xjan.

⁸ Aye'ju' kukx kyk'ulun kyeju' witzileb' minti' nche okslantl teya;

⁹ ayi'ntzuwe' tuk'i'l b'itz te aq'b'il chjonte, che kb'el nq'o'ne' chojb'il twitza; che kjapumelju' nyole' xintziya'ne' teya. ¡O'kxna'ta Nman Dyos, nkolon!

¹⁰ Tchaq'tzun Qman Dyos teju' kyiẍ tu'n tjatz t-xa'n Jonas tib'aj tx'otx'.