Filemón 1 - Biblia Mam de Quetzaltenango

¹ Ayine' Pawl, jpu'nqine' tu'n tpaj Qajaw Jesukrist extzunju' qitz'in Timotey inxi' qq'olb'e'na Pilemon, ex inxi'x qk'u'jla'na qu'n quk'il qib' tuk'ila toj aq'untl,

² ex inche'x qq'olb'e'ne' okslal nkyb'uyi'n kyib' tjaya, ex ikx qanab' Apya, ex Arkyip quk'i'l toj tzq'un Dyos.

³ Awt Qman Dyos ex Qajaw Jesukrist che q'onte xtalb'il nak'b'il kyeye'.

Tk'u'jlalil Pilemon ex tokslab'l

⁴ Inxi' nq'o'ne' chjonte te Dyos kukxju' ajttzaj nna'na toj nna'j Dyose',

⁵ qu'n inb'i'ne' tqanil ti'ju' tk'u'jlalila exju' tokslab'la ti'j Qajaw Jesukrist ex kyi'j kkyaqil okslal.

⁶ Inchin kub'sane' twitz Dyos tu'n tokqe tk'u'ja ti'j ex tu'n tojtzqinteya t-xtalb'il Dyos exju' b'a'n tu'nel tk'u'jlalil Jesukrist.

⁷ Inxi'x chin tzalaje' ex maqe nk'u'je' tu'nju' tk'ujlalila, qu'n intq'uqb'a'na kyk'u'j kykyaqil okslal.

Kub'san Pawl ti'j Onesimo lq'o'n majen

⁸ Qu'mtzun, maskye ati woklene' toj Qajaw Jesukrist, tu'n txinma'ne' teya titi' kxe'l tb'incha'na,

⁹ wajb'ile' tu'n nkub'sane' twitza tu'nju' ink'u'jla'na. Ayine' Pab'l matxi' chin tijine' ex jpu'nqine' ja'lo tu'n tpaj Qajaw Jesukrist,

¹⁰ Inxi' nqani'n jun xtalb'il teya ti'j Onesimo, qu'n matxi' tz'ok te nk'wale' toj okslab'l tzalu toj kars.

¹¹ Mixti'xi'x ajb'en Onesimo teya tnejel, atzun ja'lo nimxi'x tajb'en teya ex weye'.

¹² Kxel wanjsa'ntl ti'je' tk'etza: k'moma b'a'nxi'x nakuxwitloj ayinku'ye' chin pomil tk'etza.

¹³ Atoq wajb'iljuye' tu'n tkyej ten tzalu nk'etze', tu'n tajb'en weye' te t-xela toju' kars, qu'n jpu'nqine' tu'n tpaj Qajaw Jesukrist.

¹⁴ Naq aju' min wajb'ile' tu'n nb'inchanteye' qa myaya inq'mante, tu'ntzun lalun kub' njtz'o'na tu'n tb'inchan xtalb'ila weye', masb'a'n aya kq'malte qa b'a'n toj twitza.

¹⁵ Qapelo matz'el tpa'ntib' jte' q'i'j Onesimo ti'ja, tu'ntzun tk'monteya ja'lo tejumajx,

¹⁶ mya jun lq'o'n majintl, b'a'nxi'xtl k'okyela' teya, naku'j titz'ina k'u'jlanxi'x tu'na. Ati penawe' nk'u'j ti'j, mitzulo yata atixi'x tk'u'ja ti'j, mya o'kx tu'nju' tmajena, ex ikx tu'nju' okslal ti'j Qajaw Jesukrist.

¹⁷ Qatzun qa qitz'inqib' toj okslab'l toj twitza, k'moma Onesimo nakuxwitloj ayine'.

¹⁸ Qatzun ati jun taq'wix xtb'incha teya, mujqa ati tk'as teya, xi' peyintza'ya weye'.

¹⁹ Ayine' Pab'l ẍinkub' tz'ib'ante u'j lu tu'nku' nq'ob'e': Ayine' chin chjolte. Maskyetzun ikxta nim tk'asa weye', ex lay txinma'nwe' teya tu'n toka te nmajine'.

²⁰ Qu'mtzun witz'in, b'inchama xtalb'il weye' naq tu'n tk'u'jlalila ti'j Qajaw Jesukrist; q'uqb'ama nk'u'je' tu'nju' okslalqo' te Qajaw Jesukrist.

²¹ Ma txintz'ib'a'ne' teya, qu'n q'uqli nk'u'je' ti'ja qa ktb'incha'ya, kpe' ktb'incha'ya nimxi'x kyetwitzju' nxinma'ne' teya.

²² Ex ikx kxe'l nma'ne' teya tu'n tb'aj tnk'u'na jun ja weye' ja chin tenb'ila'ye'; qu'n q'uqli nk'u'je' qa ktzajel ttzaq'we'n Dyos nna'j Dyose' ex ktq'a' anb'il weye' tu'n npone' xb'et-salkyeye'.

Q'olb'eb'l yol te b'ajsb'il

²³ Inxiq'olb'e'na tu'n Epapras, wuk'i'le' toj kars tu'n tpaj Qajaw Jesukrist,

²⁴ ex inxiq'olb'e'na kyu'n Markos, Aristark, Demas ex Lukas, aye' junx inche aq'unan wu'k'ile' toj taq'un Dyos.

²⁵ Awt t-xtalb'il Qajaw Jesukrist ten toj kyanmiye'. Ikxwitju'.