Éxodo 8 - Biblia Mam de Quetzaltenango

¹ Tzaj tma'n Qman Dyos te Moyses: —Kutxi'ya twitzju' nimaqkawil, q'manxa qa inxi' nmane' te kjalu: tzaqpinqe'xju'ya ntaname' tu'n kxi' k'ulul nwitze'.

² Qatzun min ẍe'x ttzaqpi'na, che ktzajel nq'o'ne' cha'x xtx'o te yajb'il toj tkyaqil Ejipt.

³ Kche q'uẍtel cha'x xtx'o toj nin a', che jawitztzuntz ex kche okyix toj tjaya ja inwtana'ya, tib'aj tkuẍb'ila, toj kyjaju' nche kawin tuk'i'la, toj kyja twnaqila, ex kche okyix kyoju' chuj te twaya, ex kyoju' ja inxyuq'ita'.

⁴ Kche jawil t'ikpuj ti'ja, kyi'ju' inche kawin tuk'i'la ex kyi'j kykyaqilju' twnaqila, chitzun Dyos, chiku'ya te, chij te Moyses.

⁵ Tzaj tma'ntl Qman Dyos te Moyses: —Q'manxa te Aaron tu'n t-xi' tnuqpi'n tq'ob' tuk'i'lxi'ju' ttze kyib'aj nin a', tal a' ex njab', tu'ntzun kyjatz cha'x xtx'o kyoj ex tu'n tkub' noj tkyaqil Ejipt kyu'n, chij.

⁶ Xitzun tnuqpi'n Aaron tq'ob' kyib'aj tkyaqil a' toj Ejipt, eb'jatztzun cha'x xtx'otzu' kyoj, ex majxkub' noj toj tkyaqil Ejipt kyu'n.

⁷ Ikxtlkye ajpkab'ju' kyxol aj Ejipt, b'jawb'ent txqantl cha'x xtx'o kyu'n toj tkyaqil Ejipt tu'nxju' kyopis.

⁸ Atzunte nimaqkawil' e'ttxoku' Moyses ex Aaron, ex xitma'n kye: —Che kub'sanqe'ye' twitzju' Dyos Manb'aj tu'n kyel tiq'i'n cha'x xtx'o wi'je' ex kyi'ju' nwnaqile', kxe'l nq'o'nwe' anb'il kyeju' kywnaqile' tu'n kyxi' q'ol chojb'il twitzu' Dyos Manb'aj, chij.

⁹ Atzunte Moyses xittzaq'we'n te: —Q'mantzna'ya jtoj tu'n nkub'sane' twitz Dyos Manb'aj tu'n kyel tlaq'b'a'nju' xtx'o ti'ja, kyi'ju' nche kawin tuk'i'la, kyi'ju' twnaqila ex toju' tjaya, tu'n kykyajten o'kxtzu' toj a', chij.

¹⁰ Atzunte nimaqkawil tma: —Najchi'j, chij. Atzunte Moyses xittzaq'we'n te: —B'a'na'tzun, tu'ntzun teltnik'a qa mix-a'lo' juntl kse'n Dyos Manb'aj Qdyose'.

¹¹ K'elil kypa'n kyib'ju' cha'x xtx'o ti'ju' tjaya ex o'kxtzu' che kjela'ten toj a'. Lay che yajuntl ti'ja, kyi'ju' inche kawin tuk'i'la ex kyi'ju' twnaqila, chij.

¹² Etztzun Moysestz tuk'i'l Aaron toju' tja nimaqkawil. Xitzun tqani'n Moyses te Qman Dyos tu'n tel kypa'n kyib'ju' cha'x xtx'o e'tzaj tq'o'n tib'aju' nimaqkawil.

¹³ Tb'inchatzun Qman Dyos kse'nx xitqani'n Moyses te. E'kyimju' cha'x xtx'o ate'toq kyoj kyja xjal ex twi'kypen, exqe ate'toq toj kojb'il.

¹⁴ Aye'tzunju' xjal b'aj kb'u'yi'nju' xtx'o kyimniqe'tl junx ex majx b'ajkub' tzuwix toj tkyaqil Ejipt.

¹⁵ Tetzunj tlonte nimaqkawil matxi'toq klet ti'j, kub' tch'uẍsa'n jumajtltib' ex min xitb'i'ntl kyyol Moyses ex Aaron kse'nx tma Qman Dyos.

E'b'jawb'ent msaq te yajb'il

¹⁶ Tzaj tma'n Qman Dyos te Moyses: —Q'manxa te Aaron tu'n tkub' tjuma'nju' quq tu'nju' ttze, tu'ntzun kyjawb'ent msaq toj tkyaqil Ejipt, chij.

¹⁷ Kyb'inchatzuntz ikju'. Kub' tjuma'n Aaron ju' quq twitz tx'otx' tu'nju' ttze, tkyaqiltzunju' quq toj Ejipt b'jawb'ent te msaq, eb'jo'k lak'pujtzuntz kyi'j xjal ex kyi'j alu'mj.

¹⁸ Ex ikxtlkye' ajpkab' xikb'incha'n tu'nxju' kyopis tu'n kyjawb'ent msaq, ex mixti' b'ent kyu'n. Inxi'xtoqtzun che yajti xjal ex alu'mj kyu'nju' msaq.

¹⁹ Xitzun kyma'n ajpkab' teju' nimaqkawil: —¡Tu'nku' Dyos Manb'aj te'lu! chechij. Atzunte nimaqkawil kub' tch'uẍsa'ntltib', ex min xi'tojtwinqil kse'nxju' tma Qman Dyos.

E'b'jawb'ent ta'jinchej te yajb'il

²⁰ Tzaj tma'n Qman Dyos te Moyses: —Kxe'lte' nimaqkawil te prim najchi'j ttzi a'. Qu'mtzun we'ktza chi'j b'a'n prim ex kxe'la q'malteju' tqanil lu wu'ne' te: Tzaqpinqe'xa ntaname' tu'n kxi' k'ulul nwitze'.

²¹ Qatzun minti' ẍe'x ttzaqpi'na, kche tzajel nq'o'ne' ta'jinchej tib'aja, kyib'aju' inche kawin tuk'i'la, kyib'aju' twnaqila ex kyoju' tjaya. Kykyaqilju' kyja aj Ejipt kb'ajel noj kyu'n ta'jinchej, ex kb'ajel noju' twitz tx'otx' kyu'n.

²² Ajttzaj ja'lu k'elil npa'nju'ye' najb'il Kosen, ja najlqe' ntaname'. Lay jawb'ent jun ta'jinchej atzu', tu'ntzun teltnik'a qa ayine' Dyos Manb'aj, atinqine' Ejipt.

²³ Lay nb'inchaye' kyi'ju ntaname' kse'n knb'incha'ye' kyi'ju' ttanama. Najchi'j nb'inchaju'ye' lu, chitzun Dyos, chiku'ya te, chij te Moyses.

²⁴ Iktzu'n tb'incha Qman Dyos: E' b'ju'l txqan ta'jinchej ex eb'jo'kx toju' tja nimaqkawil, toj kyjaju' nche kawin tuk'i'l. Ex kub' noj tkyaqilju' tx'otx' Ejipt kyu'n. Majxkub' yajtiju' tx'otx' Ejipt kyu'nju' ta'jinchej.

²⁵ Atzunte nimaqkawil xittxko'n Moyses ex Aaron, xitma'ntzuntz kye: —Kuxna kyxi'ye' q'ol chojb'il teju' Kydyose', naq o'kx lalun che'xe' ti'jxi' tx'otx' Ejipt, chij.

²⁶ Atzunte Moyses xittzaq'we'n te: —Myana' b'a'nte' ikju', qu'n aye' alu'mj nche kub' qq'o'ne' te chojb'il twitz Dyos Manb'aj Qdyose', xjanqe' toj kywitz aj Ejipt. Qama tz'ok kyka'yi'n aj Ejipt ajtkub' qb'yo'ne' jun alu'mj nche k'ulun te, oklo qo' b'el kyb'yo'ne' tu'n ab'j.

²⁷ Ilti'j tu'n qxi'ye' toj chq'ajlaj oxe' q'ij qb'eye' tu'n qpone' atzu', tu'ntzun tkub' qq'o'ne' chojb'il twitz Dyos Manb'aj Qdyose' kse'nxju' ktma qeye', chij.

²⁸ Atzunte nimaqkawil tma: —Okna' kxe'l nq'o'ne' anb'il kyeye' tu'n kyxi'ye' q'ol chojb'il te Dyos Manb'aj toj chq'ajlaj, naq o'kx lalun che'x lq'exi'xe' najchaq. Ex che na'nqe' Dyose' wi'je', chij.

²⁹ Atzunte Moyses xittzaq'we'n te: —Naqa ẍin exe' twitza ja'lo, kxe'l nqanine' te Dyos Manb'aj tu'n kyel tpa'nju' ta'jinchej ti'ja najchi'j, kyi'ju' inche kawin tuk'i'la ex kyi'ju' twnaqila, naq o'kx lalun qo' kub' t-sb'u'ntla, ex lalun maquntla kye aj Israel tu'n kyxi' q'ol chojb'il te Dyos Manb'aj, chij.

³⁰ Naqxi'x nb'ent tetz Moyses toj tja nimaqkawil, kub'ten na'l Dyos,

³¹ tb'inchatzun Qman Dyos kse'nxju' xitqani'n Moyses te': b'je'l tpa'nju' ta'jinchej ti'ju' nimaqkawil, kyi'ju' inche kawin tuk'i'l ex kyi'ju' twnaqil.

³² Atzunte nimaqkawil kub' tch'uẍsa'n jumajtltib', ex min e'etz ttzaqpi'n aj Israel.