Éxodo 40 - Biblia Mam de Quetzaltenango

Xjansetju' ja xjan

¹ Tzaj yolin Qman Dyos te Moyses ex tma:

² Toj tnejel q'ij te tnejil xjaw, kjawil tb'incha'nju'ya ja xjan exju' Ja te Mujb'ab'ltib'il.

³ Ex q'onkxju'ya kax k'ub'lteju' yol kyejni b'entti'j toj, jpunka ti'j tu'nju' xb'alun te aq'pub'l.

⁴ Ex q'onkxju'ya mes toj tuk'i'lju' kykb'el kandil. B'inchanku'ya mes b'a'nxi'x ex q'onqe'ku'ya kandil tib'aju' kqan.

⁵ Ex q'onkxju'ya q'olb'eb'l q'anpwaq te tz'e'ysb'il sturak twitzju' kax k'ub'lteju' nyole' kyejni b'entti'j, ex q'onkju'ya xb'alun te ttziju' ja xjan.

⁶ Ex q'onku'ju'ya q'olb'eb'l te chojb'il ttziju' ja xjan, aju' Ja te Mujb'ab'ltib'il.

⁷ Ex q'onku'ju'ya tkb'el a' te tx'ajb'il kxolju' Ja te Mujb'ab'ltib'il tuk'i'lju' q'olb'eb'l, ex nojsanku'xa tu'n a'.

⁸ Ex q'onqe'kju'ya xb'alun ti'jileju' pe'n, ex q'onkju'ya xb'alun te ttziju' pe'n.

⁹ Q'intztzu'na aseyt te xjansb'il ex qonjxa tib'aju' ja xjan, ex kyib'aj kykyaqilju' ate'qe' toj. Kb'el t-xjansa'ntzuntza ikju' kyuk'i'l kykyaqilju' kche ajb'el toj, kjel tentzuntz te jun najb'il xjan.

¹⁰ Ex qonku'ya aseyt te xjansb'il tib'aju' q'olb'eb'l te chojb'il ex kyib'aju' kche ajb'el te, tu'ntzun tok te jun q'olb'eb'l xjanxi'x.

¹¹ Qonku'ya aseyt tib'aju' tkb'el a' te tx'ajb'il tuk'i'lju' tq'uqlil, tu'ntzun ja'lu kxjansetel tu'na.

¹² Iq'inqe'tztzuna Aaron kyuk'i'lju' tk'wal ttziju' Ja te Mujb'ab'ltib'il tu'n kyichin te xjanb'ilkye,

¹³ ex tu'n toktq'o'n Aaron ju' t-xb'alun nim toklen. Ex q'onjxa aseyt te xjansb'il toj twi' tu'ntzun t-xjanset te pale nwitze'.

¹⁴ Ex txkonqe'tzju'ya tk'wal ex q'onkju'ya kxb'alun ku'j.

¹⁵ Ex qonjxa aseyt toj kwi', kse'n aj tjax tq'o'na toj twi' Aaron tu'ntzun kyok te pale nwitze'. Ajtzun tjax qetju' aseyt toj kwi', kjeltzun kyoklentz te pale nwitze' tejumajx exqe' kyyajajil toj tkyaqil tab'q'iyil, chi Dyos te Moyses.

¹⁶ Atzunte Moyses tb'incha tkyaqil kse'nxju' tchaq' Qman Dyos te.

¹⁷ Iktzu'n jaw b'incha'na' ja xjan toju' tnejel q'ij teju' tnejil xjaw te tkab' ab'q'i kyb'jetzlenxi' aj Israel Ejipt.

¹⁸ Jawtb'incha'n Moyses ja xjan ex e'kub'tq'o'n tq'uqlil, eb'aj tnk'u'nju' tz'lan, e'oktq'o'n tqul, ex e'kub' twab'a'nju' tqan.

¹⁹ Ex jaw tb'incha'nju' ja xb'alun tuk'i'lju' twi' te kutxb'ilteju' ja xjan, kse'nxju' tchaq' Qman Dyos te.

^20-21 Tzajtzun tiq'i'n Moyses kab'e' tz'len ab'j jatz'ib'a'nqe'ka' kawb'il, e'ku'x tq'o'ntzuntz toju' kax k'ub'lteju' yol kyeni b'entti'j; ex e'oktq'o'n kab'e' tqulju' kax ex kub' tq'o'n tjpel, xitiq'i'ntzuntz toju' ja xjan; oktq'o'nju' xb'alun te aq'pub'l e'wb'ilteju' kax kse'nxju' tchaq' Qman Dyos te.

²² Okxtq'o'nju' mes toju' Ja te Mujb'ab'ltib'il, kub' tq'o'n toju' plaj te tnayaju' ja xjan, ti'jxi'ju' xb'alun te aq'pub'l.

²³ Kub' tq'o'nju' wab'j tib'aju' mes tu'n t-xjanset twitz Qman Dyos, kse'nx tchaq' Qman Dyos te.

²⁴ Ex okxtq'o'n kykb'el kandil toju' Ja te Mujb'ab'ltib'il twitzju' mes, toju' plaj te tb'a'nq'ob'ju' ja xjan,

²⁵ ex e'okttxqo'nju' kandil twitz Qman Dyos, kse'nxju' tchaq' Qman Dyos te.

²⁶ Okxtq'o'nju' q'olb'eb'l q'anpwaq toju' Ja te Mujb'ab'ltib'il twitzju' xb'alun te aq'pub'l,

²⁷ ex kub' ttz'e'ysa'nju' sturak k'ok'j tib'aj, kse'nxju' tchaq' Qman Dyos te.

²⁸ Oktzun tq'o'n Moyses xb'alun ttziju' ja xjan;

²⁹ ex kub' tq'o'nju' q'olb'eb'l te chojb'il nqayin ttziju' ja xjan, aju' Ja te Mujb'ab'ltib'il, e'kub' ttz'e'ysa'ntzun alu'mjtz ex oyaj twitz awal tib'aj, kse'nxju' tchaq' Qman Dyos te.

³⁰ Kub' tq'o'nju' tkb'el a' kxolju' Ja te Mujb'ab'ltib'il tuk'i'lju' q'olb'eb'l, ex ku'x tnojsa'ntzuntz tu'n a' te tx'ajb'il.

³¹ Atzuntzu' intoq jatza' kyiq'i'na' Moyses, Aaron exqe'ju' tk'wal a' te tx'ajb'il kq'ob' ex kqan.

³² Intoq che tx'ajun aj kyokx toju' Ja te Mujb'ab'ltib'il ex ajkyxi' lq'e tk'etzju' q'olb'eb'l, kse'nxju' tchaq' Qman Dyos te Moyses.

³³ Tetzun b'ajsb'il, jawtb'incha'n Moyses ti'jile pe'n ti'jileju' ja xjan exju' q'olb'eb'l, ex oktq'o'nju' xb'alun te ttziju' pe'n. Tetzunj tb'aj b'entju' aq'untl tu'n Moyses,

Muj tib'aju' ja te mujb'ab'ltib'il

³⁴ kub' jupeju' muj tib'aju' Ja te Mujb'ab'ltib'il ex kub' noj toju' ja xjan tu'n tajwalil Qman Dyos.

³⁵ Mixtoqtzunti' tu'me'l tu'n tokx Moyses toju' Ja te Mujb'ab'ltib'il qu'n matxi'toq kub' jupeju' muj tib'aj ex matxi'toq kub' noju' ja xjan tu'n tajwalil Qman Dyos.

³⁶ Ajtzun tjawju' muj tib'aju' ja xjan injaw kyiq'i'n aj Israel kynajb'il, ex intoq xikyljo'n kyb'e,

³⁷ qatzun minti' in jawju' muj ex mixti' injaw kyiq'i'nju' kynajb'il, qu'n tzmaxi' inche ik'b'etju' aj tjawju' muj.

³⁸ Te q'ijtl atitoqju' muj te Qman Dyos tib'aju' ja xjan, atzu'n qonik'an q'aq' atitoq tib'aj, kywitzku' aj Israel toj tkyaqilju' kyb'e.