Éxodo 4 - Biblia Mam de Quetzaltenango

¹ —Atzunte Moyses xittzaq'we'n kjalu: Lay chinx kyb'i'ne' ex lay txi' kyoksla'n aj t-xi' nma'ne' kye, a pe'lo ktzajel kma'nju' weye': Naq tak'a'nta', mixti' xkub' tyek'u'nte Qman Dyos tib' twitza, chechilo, chij.

² —¿Titi'tzunju' tzyu'n tu'na? chi Qman Dyos te. —Jun ntzeye', chi Moyses.

³ —Xonku'ya twitz tx'otx', chi Qman Dyos te. Ku, chi Moyses kub' t-xon. Textzu'n kmuj lu jawb'entju' ttze te kan, ju'm tel oq Moyses tk'etz.

⁴ Atzunte Qman Dyos tzaj tma'n te: —Tzyumju'ya tje ex iq'i'nktza, chij. Xitzun tnuqpi'n Moyses tq'ob' tzyulte. Tetzunj tjaw ttzyu'n jawb'ent jumajtl te tze.

⁵ Atzun techlal ja'lu tu'n t-xi' kyoksla'n qama kub' nyek'u'n wib'e' twitza, ayine' Dyos Manb'aj Kydyos ojtxi' tyajilb'ena Ab'raam, Isaak ex Jakob', chi Qman Dyos te.

⁶ Tzajtzun tma'ntl Qman Dyos te: —Atzu'n ja'lo q'onkxa tq'ob'a ttzitk'u'ja, chij. Okxtzun tq'o'n Moyses tq'ob' ttzitk'u'j, tetzunj tetztiq'i'ntl o'kx tok tka'yi'n txqan xlemtx'a'k ti'j, saq ka'yin naku'j txun che'w.

⁷ Tzajtzun tma'ntl Qman Dyos te: —Q'onkx jumajtlju'ya tq'ob'a ttzitk'u'ja, chij. Atzunte Moyses okxtq'o'ntl tq'ob' ttzitk'u'j. Tetzunj tetztiq'i'ntl matxi'toq b'anixju' tq'ob' kse'nxju' tten tnejel.

⁸ Tzajtzun tma'ntl Qman Dyos te: —Qa min xxi'oksla'na kyu'n exqa min xib'i'na tu'nju' tnejel techlal, tu'ntzunju' tkab' techlal kxe'l kyoksla'n.

⁹ Qatzun qa mixti'x xxi' oksla'na exqa minti' xib'i'na kyu'nju' kab'e' techlal lu, iq'i'nktza a' toj nin a' ex qonku'ya twitz tx'otx'. Naqtzun nb'ent tkub' tqo'na kjawilb'ent te chik', chij.

¹⁰ Atzunte Moyses xitma'n te Dyos. —¡Taye!, min nb'ent nyoline' lwiy kse'nte jun xjal tx'o'le'tel tyol ex mya tzmawt ja'lo tej saj yolina teju' tmajina lu, qu'n ntzajlenxwe' inchin takpuje' ajnyoline', chij.

¹¹ Atzunte Qman Dyos tzaj tma'n te: —¿Altzunkye kyej q'onte ttziju' xjal tu'n tyolin? ¿Altzunkye kyej q'onteju' me exju' chkyin, exju' xjal b'a'n twitz mujqa moẍ, qa myayine'?

¹² Qu'mtzun kutxi'ya, okna' chin tenb'ilwe' tuk'i'la ajtyolina, ex ayine' chin kb'el q'onte yol toj tnab'la titi' kxe'l tma'na, chij.

¹³ Atzunte Moyses xitma'ntl: —¡Taye, ate b'a'n chq'onx juntla! chij.

¹⁴ Atzunte Qman Dyos tzaj toj twitz ti'j Moyses ex tma: —¡Lute' ttzika Aaron, ju' aj Leb'i, ati Ejipt! Ojtzqi'nxi'x wu'ne' nb'ent tyolin b'a'nxi'x. Expe' k'elitz k'lulteya toj b'e, kjawil tzalaj ajtok tka'yi'n twitza.

¹⁵ Yolintzuna tuk'i'l, q'manxa te tkyaqilju' matxi' b'ajx nma'ne' teya, ex kchin tenb'ilwe' kyuk'i'le' ajkyyoline', ex che kxe'l nxnaq'tza'ne' ti'ju' kb'incha'ye'.

¹⁶ Aya kxe'l q'mante te Aaron naku'xwitloj ayine' inchin yolin tuk'i'l. Atzuntlte Aaron kyolil te t-xela kyeju' tnam ti'ju' yol kxe'l nma'ne' teya.

¹⁷ Ex iq'inxju'ya ttzeya, qu'n atzun k'ajb'elju' tu'na tu'n kb'inchet ti'xti' te lab'te'n, chij.

Anjti'j Moyses Ejipt

¹⁸ Atzunte Moses anjti'j tja Jetro ju' tji, xitma'ntzuntz te: —K'anjeltlwe'wi'j Ejipt ka'yilkye nwnaqile' qa itz'qe'x, chij. —B'a'na'tzun, kutxi'ya ka'yinxtib'a, chiju' tji te.

¹⁹ Atixtoqtzun Moyses toj tx'otx' Madyan, tzaj tma'ntl Qman Dyos te: —Kutanjtl ti'ja Ejipt, qu'n oje che kyimkye' kyajb'iltoq tu'n tkub' b'yo'na kyu'n, chij.

²⁰ Atzunte Moyses xitiq'i'nju' t-xu'jil exju' tk'wal, ex e'jawx tq'o'n ti'j jun b'ur. Anjtzun ti'jtzu' Ejipt, iq'i'ntoqju' ttze Dyos tu'n toj tq'ob'.

²¹ Tzaj tma'ntl Qman Dyos te Moyses: —Ajtzun tpona Ejipt, b'inchamqe'ju'ya e'techlal te lab'te'n twitzju' nimaqkawil, matxi' txinq'o'ne' toklena tu'n tb'inchanteya. Oktzun b'el nch'uẍsa'ne' tanmiju' nimaqkawil tu'n lalun che etz ttzaqpi'n aj Israel.

²² Kxel tma'ntzuntza teju' nimaqkawil: Tnejel nk'walwe' Israel, chi Dyos Manb'aj.

²³ Matxi' txinma'ne' teya tu'n tetz ttzaqpi'na nk'wale' tu'n t-xi' k'ulul nwitze'; mina'jon tajb'ila tu'n tetz ttzaqpi'na, qu'mtzun kb'el nb'yo'ne' tnejel tk'wala, chitzun Dyos Manb'aj, chiku'ya te, chij.

²⁴ Tetzunj ljo'ntoq tb'e Moyses, pon toju' najb'il jatu'n tkyeja' wtan te qonik'an kyuk'i'lju' toj tja, kub' tyek'u'ntib' Qman Dyos twitz Moyses tu'n tkub' tb'yo'n.

²⁵ Atzunte Sepora tzaj tiq'i'n jun ab'j ati twitzte ex eltjon ch'i'n ttxo'w twi' ttz'a'lb'il tal, ok tq'ontzuntz ti'j tqan Moyses ex tma: Axxi'x tu'n tpaja nchmil sela' chik' chij.

²⁶ Tma Sepora ikju' tu'nju' kyechel ti'j kychib'jil. Tu'ntzun ja'lu xitzaqpi'n Moyses tu'n Qman Dyos.

²⁷ Atzunte Dyos ojetoq tzaj tma'n te Aaron kjalu: Kutxi'ya k'lulte Moyses toj chq'ajlaj, chij. Xi'tzun Aarontz, ex knet Moyses tu'n t-xeju' witz te Dyos, ex oktma'tzi'n te jun q'olb'eb'lte.

²⁸ Xitzun tma'n Moyses te Aaron tkyaqilju' ojetoq tma Dyos te tu'n tmante, exqe'ju' techlal tma Qman Dyos te tu'n tb'inchante.

²⁹ E'xi'tzuntz kykab'il Ejipt, b'uyilkyeju' tijwnaq kyxol aj Israel,

³⁰ Xitzun tma'n Aaron kye, tkyaqilju' matxi'toq tma Qman Dyos te Moyses; ex e'tb'incha techlal ojetoq tma Qman Dyos te tu'n tb'inchante, kywitzju' tnam.

³¹ Aye'tzu'n aj Israel xikyoksla'n. Tetzunj kyb'inte qa matxi'toq che tzaj tb'i'n Qman Dyos, exqa matxi'toq tka'yiju' yajb'ilkye, e'kub' tzipetzuntz k'ulul te.