Éxodo 39 - Biblia Mam de Quetzaltenango

B'inchet kyxb'alun pale

¹ E' b'aj b'inchetju' xb'alun tu'n kyajb'en toju' ja xjan kyu'n q'in: morad, kyeq smo'n tk'i' cha'x ex kyeq. Ex ikx b'inchetju' t-xb'alun Aaron tb'anilxi'x kse'nxju' tchaq' Qman Dyos te Moyses.

² Ajb'en q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz tu'n tb'inchetju' ẍa'y.

³ Kub' slik'u'n jte' plaj q'anpwaq tx'no'n tu'n pojb'il, ex eb'ajkub' jon ayelechaqju' kse'n tlamal q'in tu'n tb'ent kychmet kyuk'i'l q'in morad, kyeq smo'n tk'i' cha'x, kyeq ex sed.

⁴ E' b'jo'k q'o'n kab'e' qnij xb'alun ti'j kab'e' ttx'u'kju' ẍa'y.

⁵ Exju' k'alb'ilte ẍa'y ax b'inchb'enteju': tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz kse'nxju' tchaq' Qman Dyos te Moyses.

⁶ E'kub' q'o'n kab'e' ab'j kornalina kyoju' kykb'el q'anpwaqqe', tz'ib'a'nk kyb'i tk'wal Israel kywitz, kse'n b'inchb'ente jun sey.

⁷ E'kub'tzun tq'o'n B'esaleel kyib'aju' kab'e' t-semu'l ẍa'y tu'n kytzaj na'n aj Israel, kse'nx tchaq' Qman Dyos te Moyses.

⁸ Atzunju' tal xb'alun tok ttzitk'u'ju' ẍa'y b'incha'ntoq tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz, kse'nxju' ẍa'y.

⁹ Pintoq, te junaq kab'e' (22) sentimetro twitz toj tkyajel plaj.

¹⁰ Txoli'nk kyaje' txol tb'anil ab'j ti'j, toktoq jun ab'j rub'i, jun krisolito ex jun esmeralda toju' tnejel txol;

¹¹ atzu'n toju' tkab' txol toktoq jun ab'j kranate, jun sapiro ex jun jade;

¹² atzu'n toj toxi'n txol toktoq jun ab'j jasinto, jun akata ex jun amatista;

¹³ atzu'n toj tkyaji'n txol toktoq jun ab'j topasyo, jun kornalina ex jun jaspe. Kykyaqilju' ab'j lu atitoq kykb'el q'anpwaqqe',

¹⁴ kab'lajojtoq (12) kyb'aj, qu'n kab'lajoj (12) kyb'aju' tk'wal Israel; teyile junjun b'iyj b'incha'ntoq kse'n b'incha'na' jun sey.

¹⁵ Kub' kyb'incha'n jte' xpatx'q'anpwaqxi'x te taq'e'lju' tal xb'alun ttzitk'u'ju' ẍa'y.

¹⁶ Ex kub' kb'incha'n kab'e' kykb'elju' ab'j kornalina q'anpwaqqe' ex kab'e' t-ẍkyinju' tal xb'alun ttzitk'u'j ẍa'y q'anpwaqx; ex okkyq'o'n kyi'ju' kab'e' ttxa'n jawl,

¹⁷ kyi'jtzunju' t-ẍkyin lu e'okkyq'o'n xpatx'q'anpwaq.

¹⁸ Aye'tzu'n kab'e' kytxa'n xpatx'q'anpwaq okkyq'o'n kyi'j kab'e' kykb'elju' ab'j ex kyej kyb'incha'n b'a'nxi'x kyib'aju' kab'e' qnij xb'alun twi' t-semu'lju' ẍa'y toju' plaj twitz.

¹⁹ Ex kub' kb'incha'n kab'e'tl t-ẍkyin q'anpwaqx ex okx kq'o'n kyjaq' kab'e' ttxa'nju' tal xb'alun ttzitk'u'ju' ẍa'y toju' plaj kub'l.

²⁰ Kub' kb'incha'n kab'e'tl t-ẍkyin q'anpwaqqe' ex okkyq'o'n toju' plaj twitzxi' kyeju' tznij xb'alun ttx'u'kju' ẍa'y ex toju' plaj kub'l tk'etzju' tz'isb'en tib'aj ch'i'nju' k'alb'ilte ẍa'y.

²¹ Oktzun kmujb'a'n t-ẍkyinju' ẍa'y kyuk'i'l t-ẍkyinju' tal xb'alun tok ttzitk'u'j tuk'i'l jun taq'e'l morad, tu'ntzun tkyejtenju' tal xb'alun tib'aju' k'alb'ilte ẍa'y tu'n lalun tz'el tpa'ntib' ti'j, kse'nxju' tchaq' Qman Dyos te Moyses.

²² Okx kychmo'n pinpa't nxi' tib'ajxi' xb'alun ku'j tuk'i'l tq'imal morad.

²³ Kub'xb'u'tz'i'n ttziju' tqul toj nky'ajchaq kse'n chalek tz'u'n, tu'n lalun txi laqj.

²⁴ Okkyq'o'n kyilb'ilal lob'j kranad kyuk'i'l q'in morad ttxa'nileju' pinpa't, kyeq smo'n tk'i' cha'x, kyeq ex sed chub'i'ntwitz.

^25-26 Ex e'ok kyb'incha'n tal kanpani q'anpwaqile ex b'aj kyxulpi'n kyuk'i'lju' kranad ttziyileju' tpinpa't pale, jun tal kanpani ex jun kranad, juntl tal kanpani ex juntl kranad, se'nxju' tchaq' Qman Dyos te Moyses.

²⁷ E'kub' chmo'n xb'alun sed ku'jqe' te Aaron ex kyeju' tk'wal tu'n jun chmol,

²⁸ ex ikxju' toj kwi' kyuk'i'lju' ẍipb'ilkye exju' kykalsonsiy sed chub'i'ntwitz;

²⁹ ex kyk'alb'il b'incha'n tu'n sed chub'i'ntwitz, q'in morad, kyeq smo'n tk'i' cha'x ex kyeq, kyuk'i'l tb'anil tilb'ilal kyoj kse'nxju' tchaq' Qman Dyos te Moyses.

³⁰ Ex kub' kyb'incha'n plak q'anpwaq, techlalju' kyoklen te pale ex okkytz'ib'a'n yol lu twitz, kse'n jun sey: Xjansa'n twitz Qman Dyos.

³¹ Ok kyk'lo'ntzuntz tu'n jun taq'e'l morad tib'aju' ẍipb'il twi', kse'nxju' tchaq' Qman Dyos te Moyses.

Japunb'aj tb'inchetju' ja xjan

³² E' japunb'aj aq'untl ti'ju' ja xjan exju' Ja te Mujb'ab'ltib'il tuk'i'l Dyos. B'aj kyb'incha'n aj Israel tkyaqilju' aq'untl kse'nx tchaq' Qman Dyos te Moyses,

³³ xikq'o'ntzun ja xjantz te Moyses, exju' Ja te Mujb'ab'ltib'il kyuk'i'l kykyaqilju' kche ajb'el te: e' tzuyb'ilte e' ttz'lamal, e' tqul, e'tqan ex e'tq'uqlil,

³⁴ exju' twi' ja xb'alun ttz'umal rit uk'tza'n tu'n kyeq, exju' tb'anil tz'u'n, exju' xb'alun te aq'pub'l toju' ja xjan,

³⁵ exju' kax k'ub'lteju' yol kyejni b'entti'j kyuk'i'lju' tqul exju' tjpel,

³⁶ exju' mes kyuk'i'lju' kche ajb'el te, exju' wab'j tu'n t-xjanset twitz Qman Dyos,

³⁷ exju' kykb'el kandil q'anpwaq kyuk'i'lju' tkantilil nk'u'mileqe'tl kyuk'i'lju' che ajb'el te, exju' kyaseytil te kq'aq'al kandil,

³⁸ exju' q'olb'eb'l q'anpwaq, exju' aseyt te xjansb'il, exju' sturak k'ok'j exju' xb'alun te ttziju' Ja te Mujb'ab'ltib'il,

³⁹ exju' q'olb'eb'l q'ank'uxb'il tuk'i'lju' tpariyil q'ank'uxb'ilx, exqe'ju' tqul kyuk'i'l kykyaqilju' kche ajb'el te, exju' tkb'el a' te tx'ajb'il tuk'i'lju' tq'uqlil,

⁴⁰ exqe'ju' xb'alun teju' pe'n kyuk'i'lju' tqan ex tq'uqlil, exju' xb'alun te ttziju' pe'n, exqe'ju' aqwil kyuk'i'lju' stak teju' pe'n, ex kykyaqilju' kche ajb'el toju' ja xjan exju' Ja te Mujb'alb'ltib'il,

⁴¹ exqe'ju' xb'alun chemuj tu'n kyajb'en toju' ja xjan exju' t-xb'alun Aaron tb'anilxi'x, ex kxb'alunju' tk'wal te pale.

⁴² B'aj kyb'incha'n aj Israel tkyaqil, kse'nxju' tchaq' Qman Dyos te Moyses,

⁴³ tetzunj tka'yinte Moyses matxi'toq b'ajb'ent kyu'n ikxi'xu', xitqani'n ky'i'wb'il kyib'aj.