Éxodo 37 - Biblia Mam de Quetzaltenango

B'inchet tkaxilju' yol kyejni b'entti'j

¹ Kub' tb'incha'n B'esaleel kax akasya ttzeyil, te jun metr tk'i' lajoj sentimetro (1.10 m.) tnuqub', oxnaq jwe' (65) sentimetro twitz ex oxnaq jwe' (65) sentimetro twe'.

² B'aj tktxu'n tojxi' ex ti'jxi' tu'n q'anpwaq ex oktq'o'n jun qnij tilb'ilal q'anpwaq ttxa'nile.

³ Ex kub' tb'incha'n kyaje' t-ẍkyin q'anpwaqqe' kyi'ju' kyaje' tqan, kakab' junjun plaj.

⁴ Ex kub' tb'incha'n jte' tqul akasyax, e'oktktxu'n tu'n q'anpwaq,

⁵ b'je'x tq'o'ntzuntz kyoju' t-ẍkyin ate'qe'k ttx'u'kju' kax, tu'n tb'ent tiq'et.

⁶ Ex kub' tb'incha'nju' tjpel q'anpwaqxi'x, te jun metr tk'i' lajoj sentimetro (1.10 m.) tnuqub', atzun oxnaq jwe' (65) sentimetro twitz,

⁷ tuk'i'l kab'e' tilb'ilal kyerb'in q'anpwaqqe' b'incha'n tu'n pojb'il, jun junjun ttx'u'k tib'aju' tjpel.

⁸ Aju' tjpel kyuk'i'lju' kyerb'in jun tnejx e'ela' tu'n, kub' tq'o'n jun kyerb'in toj jun plaj, atzu'n juntl toju' jun plajtl.

⁹ Qu'mtzun kyej muje kywitz tziplqe' nche ka'yin tib'aj tjpelju' kax, atzu'n kyxik' kyejten lik'u'n tib'aju' tjpel.

B'inchetju' mes tkb'elu' wab'j tu'n t-xjanset twitz Qman Dyos

¹⁰ Ex kub' tb'incha'n B'esaleel jun mes akasya ttzeyil, te kyajnaq lajoj (90) sentimetro tnuqub', kab'naqjo' (45) sentimetro twitz, atzun oxnaqjo' (65) sentimetro twe'.

¹¹ B'aj tktxu'n tu'n q'anpwaq, ex oktq'o'n jun qnij q'anpwaq te tilb'ilal ttxa'nile.

¹² Tjaq'xi'tzuntlju' tilb'ilal lu oktq'o'n jun qnijtl tilb'ilal q'anpwaqx, wuq sentimetro kxol.

¹³ Ex oktb'incha'n kyaje' t-ẍkyin q'anpwaqqe' kyi'ju' kyaje' tqan,

¹⁴ tjaq'ju' tal tilb'ilal tu'n kb'je'xju' tqul kyoj, tu'ntzun tb'ent tiq'etju' mes.

¹⁵ E'kub' tb'incha'n tqulju' mes akasyaqe' ex eb'jo'k tktxu'n tu'n q'anpwaq.

¹⁶ Ex e'kub' tb'incha'n kykyaqilju' che ajb'el tib'aju' mes q'anpwaqileqe' e'plat, e'pak', e'xar exqe' kop kykb'elju' oyaj a' kywitz.

B'inchetju' q'anpwaq kykb'el kantil

¹⁷ Ex kub' tb'incha'n B'esaleel kykb'el kandil q'anpwaqile b'incha'n tu'n pojb'il: aju' tq'uqlil, tqan, e' tk'o'ẍil, e' tb'echil exju' t-xaq iqi'mile tib',

¹⁸ e'el waqaq tq'ob' ti'ju' tqan oxox junjun plaj.

¹⁹ B'incha'nk oxe' tb'echil xwakyi'n kten ti'jile junjun tq'ob'ju' inche el ti'ju' tqan, kse'n b'ech almendro, kyuk'i'lju' t-xaq ex tb'echil,

²⁰ ex b'incha'nk kyaje' tb'echil xwakyi'n kten ti'ju' tqan, ikxju' kse'n b'ech almendro, kyuk'i'lju' t-xaq ex tb'echil.

²¹ Tjaq'iletzu'n ja inche ela' kakab' tq'ob' ti'ju' tqan, b'incha'nk junjun tb'echil xwakyi'n kten.

²² Jun tnejx e'ela'ju' tb'echil kyuk'i'lju' tq'ob' tuk'i'lju' tqan, q'anpwaqile b'incha'n tu'n pojb'il.

²³ Ex e'kub' tb'incha'n wuq tkantilil ex pitxb'il kantil kyuk'i'lju' tkb'el tza'j, q'anpwaqqe'.

²⁴ Oxnaq kab'lajoj tk'i' nik'jan (72.6) lib'r q'anpwaq b'aj tej tb'inchetju' kykb'el kantil kyuk'i'lju' che ajb'el te.

B'inchetju' q'olb'eb'l tz'e'ysb'il sturak

²⁵ Kub' tb'incha'n B'esaleel q'olb'eb'l te tz'e'ysb'il sturak, akasya ttzeyil. Te kab'naqjo' (45) sentimetrochaq twitz toj tkyajel plaj, atzun kyajnaq lajoj (90) sentimetro twe'. Majx xitiqa'n tib'ju' q'olb'eb'l kyuk'i'lxi' tuk'a.

²⁶ Ex b'aj tktxu'nju' tib'aj tu'n q'anpwaq ex ti'jile tkyajel plaj exqe'tzunju' tuk'a, ex oktq'o'n jun qnij q'anpwaq ttxa'nile te tilb'ilal,

²⁷ ex e'oktq'o'n t-ẍkyin q'anpwaqqe' tjaq'ileju' tilb'ilal, kab'e' toj jun plaj ex kab'e'tl toju' jun plajtl tu'n tb'ent tiq'et.

²⁸ E' b'ajkub' tb'incha'nju' tqul akasyaqe' ex eb'jo'k tktxu'n tu'n q'anpwaq.

B'inchet aseyt te xjansb'il ex sturak

²⁹ Kub' tb'incha'n B'esaleel aseyt xjan te xjansb'il exju' sturak te k'ok'sb'il tb'anilxi'x, kse'n in kb'incha'nju' xjal ax kyaq'unju'.