Éxodo 36 - Biblia Mam de Quetzaltenango

¹ Qu'mtzun a B'esaleel tuk'i'l Aoliab' che b'inchalteju' oje tchaq' Qman Dyos kyuk'i'l kykyaqilju' b'a'n che aq'unan ti'j chukchaq aq'untl, aye' oje txi' tq'o'n Qman Dyos kynab'l ex kyk'atzil tu'n kyb'inchet b'a'nxi'x tkyaqilju' k'ajb'el toju' ja xjan te k'u'lb'il, chi Moyses kye.

Nim oyaj kub' kyq'o'n aj Israel

² E'tzajtzun ttxko'n Moyses B'esaleel tuk'i'l Aoliab' ex kykyaqilju' b'a'n che aq'unan ti'j chukchaq aq'untl, aye' ojetoq tzaj tq'o'n Qman Dyos kynab'l, qu'n ojetoq kyaq'kyib' tu'n kyonin ti'ju' aq'untl lu.

³ Aye'tzu'n aq'unal lu kyk'amju' oyaj te Moyses, aju' matxi'toq tzul kyi'n aj Israel tu'n ttzyet kyaq'unan ti'ju' nojqelan toju' ja xjan. Aye'tzu'n aj Israel kukxtoq ttzaj kyiq'i'n kyoyaju' atl junjun q'ij kse'nxju' nkub' kyq'o'n toj kyanmi.

⁴ Aye'tzu'n aq'unalju' intoq che aq'unan ti'ju' ja xjan kyej ktenb'a'nju' kyaq'un

⁵ e'xi'tzuntz q'malte te Moyses: Nimxi'xte' oyaj matxi' tzul kyu'n xjal kyetwitzju' inojqelan teju' aq'untl oje tchaq' Qman Dyos, chechij.

⁶ Extzun tq'o'n Moyses tqanil kye ichan ex qya toj tkyaqilju' najb'il tu'n lalun tzaj kyiq'i'n txqantl oyaj teju' ja xjan. Ikytzun mqonjtza' tnamju' tu'n mitzaja' kyiq'i'ntlju' kyoyaj,

⁷ Qu'n nimxi'xtoqju' oyaj matxi'toq tzul tu'n tb'inchetju' aq'untl expe' laytoq b'aj.

B'inchetju' ja xjan

⁸ Kykyaqiltzunju' nimxi'xtoq kyojtzqib'l ati kyekwitzju' txqantl aq'unal, kub' kyb'incha'nju' ja xjan. Kub' kb'incha'n tuk'i'l lajoj plaj xb'alun a kq'imalju': sed chub'i'ntwitz, q'in morad, q'in kyaq smo'n tk'i' cha'x ex q'in kyaq, ex ku'x ktz'so'n kab'e' tilb'ilal kyerb'in kyoj.

⁹ Teyile junjun plaj xb'alun kab'lajoj (12) metr tk'i' nik'janju' kwe', atzun kab'e' metrju' kwitz. Kykyaqilju' xb'alun junelni echb'enkye.

¹⁰ Ok ktz'so'n jwe' plaj xb'alun junx, ex ikx kb'incha kyi'ju' jwe'tl.

¹¹ Ok kq'o'ntzun jte' kẍkyintz tu'n q'in morad ttxa'nju' tnejel xb'alun kyeju' jwe' mujb'a'n kten, ex ikx ttxa'nju' b'ajsb'il xb'alun kyeju' jwe'tl.

¹² Kub' kyb'incha'n kab'naqlajoj (50) t-ẍkyinju' tnejel xb'alun kyeju' jwe' mujb'a'n kten, ex kab'naq lajojtl (50) ti'ju' b'ajsb'il xb'alun kyeju' jwe'tl tu'ntzun tb'ent kmujb'et.

¹³ Ex kub' kyb'incha'n kab'naqlajoj (50) tzuyb'ilkye q'anpwaqqe' tu'n kymujb'etju' kab'e' tnej xb'alun. Qu'mtzun jun tnejx e'ela'ju' xb'alun teju' ja xjan.

¹⁴ Ex kub' tb'incha'n B'esaleel junlajoj (11) plaj xb'alun t-smal chib', tu'n tajb'en teju' ja xb'alun te kutxb'ilteju' ja xjan.

¹⁵ Teyile junjun plaj xb'alun oxlajoj metr tk'i' nik'jan (13.50) kynuqub', atzun kab'e' metr kywitz. Kykyaqil juniletoq echb'enkye.

¹⁶ Kub' ttz'so'n jwe' xb'alun te jun tnej ex waqaqtl te jun tnejtl.

¹⁷ Kub'tzun tb'incha'n kab'naqlajoj (50) t-ẍkyintz ttxa'nju' b'ajsb'il xb'alun teju' jun tnej, ex kab'naq lajojtl ti'ju' b'ajsb'il xb'alun teju' jun tnejtl.

¹⁸ Ex kub' tb'incha'n kab'naqlajoj (50) tzuyb'ilkye q'ank'uxb'ilqe' tu'n kmujb'etju' kab'e' tnej xb'alun teju' ja xb'alun.

¹⁹ Kub' tb'incha'n B'esaleel jun plaj ttz'umal rit uk'tza'n tu'n kyaq te twi'ju' ja xb'alun ex juntl tb'anil tz'u'n tu'n tjax tloqb'a'n tib'aj.

²⁰ E kub'tzun tb'incha'n tz'lantz akasya teju' ja xjan ex e'kub' ttxoli'n wa'lile kten.

²¹ Te kyaje' tk'i' nik'jan metrchaq kwe'ju' tz'lan, atzun oxnaq jwe' (65) sentimetro kwitz.

²² Kykyaqilju' tz'lan e'kub' tb'incha'n kakab' kyjuch'ub' tu'n tb'ent ktzyunte kyib'. Kykyaqil ttz'lamalju' ja xjan e'kub' tb'incha'n ikju'.

²³ Winqi'n tz'len e'kub' tb'incha'n teju' jun plaj toj tb'a'nq'ob',

²⁴ ex e'kub'tq'o'n kab'naq (40) kyq'uqlil saqpwaq kyjaq'. Tjaq'iletzun junjun tz'lan atitoq kab'e' kyq'uqlil kyeju' kab'e' tjuch'ub'.

²⁵ Ex winqi'n tz'lan e'kub' tb'incha'n teju' plaj toj tnayaju' ja xjan,

²⁶ kyuk'i'lju' kab'naq (40) kyq'uqlil saqpwaqqe', teyiletzun junjun tz'len okxtq'o'n kakab' kyq'uqlil.

²⁷ Atzu'n toj tkub'ex q'ij teju' ja xjan e'kub' tb'incha'n qaq tz'lan,

²⁸ ex kab'e'tl tz'len teju' kab'e' ttx'u'k tojxju' plaj te tkub'ex q'ij.

²⁹ Aye'ju' tz'lan lu e b'aj muje' twi'xi' jata'ju' tnejel kẍkyin. Ikxtzun tb'inchaju' kyuk'i'lju' kab'e' tz'lan kyeju' kab'e' ttx'u'k.

³⁰ Qu'mtzun atitoq wajxaq tz'lan kyuk'i'l qaqlajoj kq'uqlil saqpwaqqe', kakab' tq'uqlil junjun tz'lan.

³¹ Ex kub' tb'incha'n B'esaleel jwe' tqul akasyax kyeju' tz'lan toj jun plaj teju' ja xjan,

³² ex jwe' teju' jun plajtl, ex jwe'tl tqul kyeju' tz'len te ttze'lti'j toj tkub'exq'ij.

³³ Atzunju' tqul toj nky'ajchaq kub' tb'incha'n tu'n tpon kanunx toj kykab'il plaj te tnuqub'ju' ja xjan toj kynky'ajchaqil kywe'ju' tz'lan.

³⁴ E' b'aj tktxu'ntzun tz'lentz tu'n q'anpwaq, ex e'kub' tb'incha'n kẍkyin q'anpwaqqe'x tu'n kyexju' tqul kyoj ex oktktxu'nju' tqul tu'n q'anpwaq.

³⁵ Ex kub' tb'incha'nju' xb'alun te aq'pub'l kyu'n q'in morad, kyaq smo'n tk'i' cha'x, kyeq ex sed chub'i'ntwitz, ex ku'x ttz'so'n kab'e' tilb'ilal kyerb'in toj.

³⁶ Jaw tyob'a'ntzuntz kyu'n jte' tzuyb'ilte q'anpwaqqe' kyi'j kyaje' tqan akasya, ktxu'nqe' tu'n q'anpwaq a tkub'qe' kyib'aj kyaje' tq'uqlil saqpwaqqe'.

³⁷ Ex kub' tb'incha'n jun plaj xb'alun te ttziju' ja xb'alun tuk'i'l q'in morad, kyaq smo'n tk'i' cha'x, kyeq ex sed chub'i'ntwitz, b'incha'nqe' tb'anil tilb'ilal toj.

³⁸ Ex kub' tb'incha'n jwe' tqan kyuk'i'l tzuyb'ilkye ex kyuk'i'l jwe' tq'uqlil q'ank'uxb'ilqe', eb'aj tktxu'nju' kyilb'ilalju' tqan toj kwi' kyuk'i'lju' kẍkyin tu'n q'anpwaq.