Éxodo 34 - Biblia Mam de Quetzaltenango

Ak'a'j ab'j ttz'lanil kawb'il

¹ Tzaj tma'n Qman Dyos te Moyses: —B'inchanku'ya kab'e' tz'len ab'j ikqe'xju' kse'n tnejel, tu'ntzun kyok ntz'ib'a'ne' yol kwitz, aye'xju' tz'ib'a'nqe'ktoq kwitzju' kab'e' kub' tpa'na.

² Ex b'inchamtib'a qu'n najchi'j b'a'n prim kjawixa twi' witz Sinayi tu'n ttena nwitze'.

³ Mix-a'lo' jun kjawix tuk'i'la, ex mix-a'lo' jun tu'n tten toju' k'ul tk'u'ju' witz, ex mixti' tu'n kpon lq'e rit ex wakx wal t-xeju' witz, chi Dyos.

⁴ Kub'tzun tb'incha'n Moyses kab'e' tz'len ab'j ikqe'xju' kse'nqe' kab'e' tnejel, ex b'a'n prim te juntl q'ij e'xitiq'i'n kab'e' tz'len ab'j twi'ju' witz Sinayi, kse'nxju' ojetoq tchaq' Qman Dyos te.

⁵ Kb'u'ltzun Qman Dyostz toj jun tnej muj twi'ju' witz, ten tuk'i'l Moyses ex tmaju' tb'i.

⁶ Ik'tzuntz twitz Moyses ex tma tuk'i'l tq'ojq'ojel twi' kuw: —¡Ayinweju'ye' Dyos Manb'aj! Ntzaj laqj nk'u'je', ex ati npasense', nim nk'u'jlalile' ex njapun nyole'.

⁷ Inlaqjnk'u'je' kyib'aj kykyaqil wiq kyyajajil xjal ex nkub' nnajsa'ne' taq'wix nkyb'incha'n, e'kypi'sil ex tkyaqilju' kyil; atzunju' ati til intz'e'ysa'ne' twitz, inq'o'ne' tz'e'ysb'il witzb'aj kyib'aju' manb'aj nche b'inchan myab'a'n ex npon kanun kyib'aju' chmanb'aj kye kychman, chi Dyos.

⁸ Atzunte Moyses lwiyxi'x kub' meje, majx ku'punju' tplaj twitz tx'otx', k'ulun te Qman Dyos,

⁹ tmatzuntz: —Nman Dyos, qa axxi'x matxi' nkanb'aju'ye' t-xtalb'ila, ati tu'n t-xi'ya quk'i'le'. Majx pi's qe'ju' xjal lu, b'inchama xtalb'il najsanku'ya qile' exju' qb'inchb'aje' myab'a'n, ex qo tk'moma te ttanama.

Tzajx jumajtlju' chaq'b'il

¹⁰ Atzunte Qman Dyos tma: ¡Kyb'intze' b'a'nxi'x! Kjel b'entti'j jun yol wu'ne' kyuk'i'l tkyaqilju' ttanama Israel. Kche nb'incha'ye' ti'xti' te lab'te'n aju' b'ajxa' b'incheta' toj juntl nintnam toj tkyaqil twitz tx'otx'. Kykyaqiltzunju' tnam nqaku' ta'qe' kyk'etze' kyka'yi'ju' kb'entel wu'ne', qu'n xob'ajilxte' knb'incha'ye' kyuk'i'le'.

¹¹ Japunxtzun kyu'ne' jni'xju' matxi' b'ajx nma'ne' kyeye' ja'lo, kywitzku'tzuntze' che elitza' nxla'ja'ne' amorey, aj Kanaan, itit, peresey, eb'ey ex jeb'usey, chij.

¹² Lalun kyej b'entti'j jun kyyole' kyuk'i'lju' xjal najlqe' ja tu'me'l kche pomilaye' tu'ntzun lalun che kub' tz'aqe' toju' ksb'ub'l.

¹³ Ape' kyb'inchamju'ye', kxitunqe'ku'ju'ye' kq'olb'eb'l, kpa'nqe'ku'ju'ye' kwitzleb' tze xjansa'nqe' kyu'n, chij.

¹⁴ Lalun che k'ulune' twitz juntl dyos, qu'n ayine' Dyos Manb'aj, myab'a'n toj nwitze' tu'n kyk'ulune' te juntl dyos. Qu'n a nb'iju'ye' Dyos Xky'aqlil.

¹⁵ Lalun kyej b'entti'j jun kyyole' kyuk'i'lju' xjal najlqe' toju' tx'otx' lu, qu'n jaku' ajkyxi' k'ulul kye kydyos ex ajtkub' kyq'o'n chojb'il kywitz, jaku'tzun che txoklitzu'ye' kyu'n, jaku' che wane' ti'ju' kyoyaj,

¹⁶ mujqa jaku' che kub' kymujb'a'n kymyal kyuk'i'lju' kyk'wale', ajtzun kyxi' k'ulul kye kydyos jaku' che'x q'i'n kyk'wale' kyu'n tu'n kyk'ulun kywitzju' kydyos.

¹⁷ Lalun che kub' kyb'incha'n kydyose' k'uxb'il, chi Dyos.

Ninq'ij atl junjun ab'q'i

¹⁸ Kyik'sanku'ye' tq'ij wab'j mixti' ttx'amal kse'nx oje nchaq'e' kyeye', wuq q'ij tu'n kywanteye' wab'j lu toju' t-xjawil ab'ib' q'ma'ntl, qu'n a xjawju' kyb'je'tze' Ejipt.

¹⁹ Kykyaqilju' tnejel kyk'wale' weqe'ye', exqe' tnejel kyal kywakyixe', tnejel kyal kyrite' ex kychib'e' qa tmanqe'.

²⁰ Tetzun t-xel tnejel tal b'ur ktzajel kyq'o'ne' jun qpoj tman rit mujqa jun qpoj tman chib' te t-xel. Qatzun min saj kyq'o'ne', kb'el kytoqi'ne' tqulju' tal b'ur. Ex ktzajel kyq'o'ne' jun oyaj te t-xelju' tnejel kyk'wale'. Mix-a'lo' jun tzul nwitze' qa mixti' iq'i'n tu'n.

²¹ Qaq q'ij che aq'unale', tojtzu'n twuqi'n q'ij che ojlale', maskye toj tq'ijlalil awaj awal mujqa ajtjaw b'uyit.

²² Kb'el kyik'sa'n ninq'ij te wuq sman, aju' tq'ij tnejel twitz awal triy, exju' tq'ij twitz awal ajtjapun ab'q'i.

²³ Kykyaqilju' ichan che ul oxmaj toj ab'q'i nwitze' ayine' Dyos Manb'aj nche ajb'en aj Israel weye'.

²⁴ Kywitzku'ye' che elexa' nxla'ja'ne' txqantl nimaqtnam, kxe'l nnimsa'ne' kytx'otx'e'. Mix-a'lo' jun kb'el etzante kytx'otx'e' qama che ul oxmaje' toj ab'q'i nwitze' ayine' Dyos Manb'aj.

²⁵ Ajtkub' kyq'o'ne' alu'mj te chojb'il, lalun kub' kyq'o'ne' tchk'el junx tuk'i'lju' wab'j ati ttx'amal, ex lalun kyej kyk'u'ne' t-xkyejb'len chojb'il te Tq'ij Tzaqpib'l te juntl q'ij.

²⁶ Kxe'l kyiq'i'nju'ye' tnejel twitz awal tb'anilqexi'x kjawil toju' kytx'otx'e', toju' njaye' ayine' Dyos Manb'aj Tdyosa. Lalun ku'x kytzq'ajsa'ne' tchib'jil tal chib' toju' ta'l timi'ẍ ttxu, chi Qman Dyos te Moyses.

Kub' ttz'ib'a'n Moyses kawb'il

²⁷ Tma Qman Dyos te Moyses: Tz'ib'anqe'ku'ju'ya yol lu, qu'n aye' tq'uqlil nyolju'ye' knb'incha'ye' tuk'i'la ex kyuk'i'l aj Israel, chij.

²⁸ Kab'naq (40) q'ij ex kab'naq (40) qonik'an ten Moyses tuk'i'l Qman Dyos, mixti' wan ex mixti' k'wan. Atzuntzu' kub'a' ttz'ib'a'na'ju' yol kyejni b'entti'j, aye'ju' lajoj chaq'b'il kwitzju' tz'len ab'j.

²⁹ Tb'ajlenxi'tzun ja'lu ku'tz Moyses twi' witz Sinayi kyuk'i'lju' kab'e' tz'len ab'j jatz'ib'a'nqe'ka' kawb'il. Tetzunj tkb'u'l mixti' b'i'n tu'n qa intoq qoptz'aju' twitz tu'nju' yolin tuk'i'l Qman Dyos.

³⁰ Tetzunj kyka'yi'nte Aaron kyuk'i'l kykyaqil aj Israel intoq qoptz'aj twitz Moyses, tzaj tchi kyi'j ex min eb'jo'k lq'e tk'etz.

³¹ Atzunte Moyses e'tzaj ttxko'n, tetzunj tzaj lq'e Aaron ex kykyaqilju' nejenel kyxol aj Israel, yolin kyuk'i'l.

³² Yajxi'tzun ch'i'ntl eb'aj tzajlq'eju' aj Israel, xitzun ma'n Moyses tkyaqilju' chaq'b'il kye, aju' tzaj tq'o'n Qman Dyos te twi' witz Sinayi.

³³ Tetzunj tb'aj yolin kyuk'i'l, oktktxu'n twitz tu'n jun su't.

³⁴ Ajtzun tokx Moyses yolil twitz Qman Dyos neltiq'i'n su't ti'j twitz, ajtzun tetz nnoktq'o'n jumajtl. Atzunju' chaq'b'il ntk'mo'n te Qman Dyos nb'ajx tma'n kye aj Israel.

³⁵ Ajtzun kyka'yinte aj Israel twitz Moyses nqoptz'aj, nok tq'o'n Moyses jumajtl su't ti'j twitz, ex neltiq'i'n jumajtl ajtokx yolil tuk'i'l Qman Dyos.