Éxodo 2 - Biblia Mam de Quetzaltenango

Titz'jlen Moyses

¹ Ati jun ichan tyajajil Leb'i axtzu' mjeya' tuk'i'l jun qya ax tyajilju',

² aju' qya lu oktiqa'n twi' jun tal, ex q'aju' tal itz'ji. Tetzunj tok tka'yi'n majxtoq tb'anilxi'x ka'yin, kub' tewa'n oxe' xjaw,

³ tetzunj minti' b'ent tewetl tu'n, tzaj tiq'i'n jun chi'l ch'e'mu'l ex b'jo'kx tnojsa'nju' tk'atxab' tuk'i'l q'ol ti'jile tu'n mi tz'okxa' a' toj, ku'xtzun tq'o'n neẍtzu' toj ex kyej tewa'n kxol ajlaj ttziju' nin a' Nilo;

⁴ juntzun txin tanab'xju' ne'ẍ kyejten najchaqinin tu'n tka'yinte titi' kb'ajel ti'j.

⁵ Yajxi'tzuntel, ku'xju' tmyal nimaqkawil ichil ttziju' nin a', intoqtzun che b'etju' tmajen qya ttziyile a'. Atzu'n tmyal nimaqkawil o'kx t-xi' tka'yi'nju' chi'l atokx kxol ajlaj, xitma'ntzuntz te junju' tmajen tu'n ttzaj tiq'i'n.

⁶ Tetzunj tjaw tjqo'nju' chi'l, ku'x tka'yi'n tku'xtoq jun ne'ẍ toj, inxi'xtoq oq'. Tzajtzun q'aq'an tk'u'j ti'j ex tma: —Kyk'wal aj Eb'reyte' ne'ẍ lu, chij.

⁷ Xi'tzun tma'n tanab'ju' ne'ẍ te tmyal nimaqkawil: —¿Ma jaku' kub' toj twitza tu'n ttzaj ntxko'ne' jun qya aj Eb'rey ch'isalteju' ne'ẍ lu ex tu'n t-xitq'o'n tch'u'? chij.

⁸ —Txka'kna'ya, chiju' tmyal nimaqkawil te. Xi'tzun txintz txkolte ttxuju' ne'ẍ,

⁹ xitzun tma'nju' tmyal nimaqkawil teju' ttxu ne'ẍ: —Ka'yinxpech'i'nju'ya ne'ẍ lu ex q'onxa tch'u', kxe'l nchjo'nwe' teya, chij. Xi'tzun q'i'n ne'ẍ tu'n ttxu ex xitq'o'n tch'u'.

¹⁰ Tetzunj tel ti'j tch'u', xi'tzuntz q'olte teju' tmyal nimaqkawil. Atzu'n tmyal nimaqkawil oktq'o'n te talku'xi'x ex oktq'o'n tb'i, Moyses, qu'n tma: —Toj a' xjatza' wiq'ina'ye', chij.

Etz oq Moyses Ejipt

¹¹ Tetzunj ichantltoq Moyses, jun q'ij ex b'etil kxolju' twnaqil ex oktka'yi'n kuwxi'xju' kyaq'un inkub' q'o'n. Ex til toktoq jun aj Ejipt b'yolte jun aj Eb'rey.

¹² Xika'yintzuntz toj tkyaqil plaj, tetzunj tb'aj tka'yi'n b'a'nxi'x mix-a'lo' jun nka'yin, kub'tzun tb'yo'n aj Ejipttzu' ex ku'x tmqu'n toj tz'awun.

¹³ Tetzun juntl q'ij exb'et jumajtl Moyses, ex e'til kab'e' aj Eb'rey ntoq che q'ojin. Xitma'ntzuntz teju' nb'ujun: —¿Titiqu'n toka b'yolteju' twnaqila? chij.

¹⁴ Atzu'n aj Eb'rey xittzaq'we'n te: —¿Alkye sok q'onteya te nejenel ex ajkawil qib'aje'? ¿Tzun ja'lo ma tajb'ila tu'n nkub' tb'yo'na kse'n tb'inchaya ti'ju' aj Ejipt? chij. Tetzunj tb'inte Moyses ja'lu jawxob', qu'n eltnik' qa matxi'toq tz'el tqanilju' tkamik aj Ejipt.

¹⁵ Tetzunj tb'inte nimaqkawil qa ojetoq kub' tb'yo'n Moyses jun aj Ejipt, tchaq' tu'n tjyet Moyses tu'n tkub' tb'yo'n. Atzunte Moyses ex oq, xi'tzuntz najal toju' jun tnej tx'otx' Madyan. Tetzunj tpon atzu' kub' qe nqayin tk'etz jun xoch.

¹⁶ Atitoqtzun jun ichan Jetro tb'i, pale toj Madyan, ate'toq wuq tmyal. Tojtzunju' q'ij lu e'ponju' tmyal iq'ilo'ktz a' toj xoch tu'n tku'x kynojsa'n kyk'wab'l rit, tu'n kyk'wanju' trit kyman.

¹⁷ Ate'tzun junjuntl k'ik'lel e'pon ex eb'je'l kyxla'ja'n txin ti'ju' xoch. Atzunte Moyses kolon kyi'ju' txin ex jatztiq'i'n a' toj xoch te kyk'wa'ju' rit.

¹⁸ Tetzunj kyponju' txin tk'etzu' kyman, xitqani'n kyman kye: —¿Tiqu'ntzun lwiy ẍe' ule' ja'lo? chij.

¹⁹ Aye'tzunkye xikytzaq'we'n: —Ati jun ichan aj Ejipt maqo tkole' kyeju' txqantl k'ik'lel, ex majatztiq'i'n a' te kyk'wa'ju' qrit, chechij.

²⁰ Xitzun tma'n Jetro kyeju' tmyal: ¿Jatzunta'ju' ichan lu? ¿Tiqu'n min saj kyk'le'ne'? Kukyxi'ye' txkolte tu'n ttzaj wal quk'i'l, chij.

²¹ Kub'tzun toj twitz Moyses tu'n tkyejten tja Jetro. Yajxi'tzuntel xitq'o'n Jetro jun tmyal te t-xu'jil Moyses, Sepora tb'i,

²² itz'ji jun tal q'a, tmatzun Moysestz: Jajchaq xjal qine' toju' tx'otx' min ojtzqi'n wu'ne', qu'mtzun Kerson tb'iju' k'wal k'okyel, chij.

²³ Tetzunj tb'et ab'q'i kyimu' nimaqkawil toj Ejipt. Aye'tzunkye' aj Israel kukxtoq kyajtiju' ex majxtoq nex ch'yonju' yajb'ilkye toj kyk'u'j. Japunju' tq'ojq'ojel kywi' twitz Qman Dyos.

²⁴ Tzajtzun tb'i'n Qman Dyos kykub'sb'il ex tzaj tna'nju' tyol kyej b'entti'j tuk'i'l Ab'raam, Isaak ex Jakob'.

²⁵ Tzaj tka'yi'n Qman Dyos tu'me'l kse'ntoq inche anq'ina' ex tzaj laqj tk'u'j kyi'j.