Éxodo 12 - Biblia Mam de Quetzaltenango

Q'ij te Tzaqpib'l

¹ Yolin Qman Dyos kye Moyses ex Aaron toj Ejipt, tzaj tma'n kye:

² Nim toklenju' xjaw lu kyeye', qu'n a tnejel xjawju' te junjun ab'q'i.

³ Kymanxju'ye' lu kye kykyaqil aj Israel: Toj tlajoji'n q'ij teju' xjaw lu, teyile junjunkye' ktzajel tiqi'n jun qpoj tman rit mujqa jun qpoj tman chib' te junjun ja xjal.

⁴ Qatzun naqjte'x kyb'aju' xjal toj kyja, exqa lay che xkye tu'n tch'yetju' alu'mj, kche walju' tajaw ja junx kyuk'i'lju' tb'esin nqaku' tk'etz ti'j. Kb'ajil kysipa'n kyxol kse'nxju' kyajlal, ex kse'nxju' kb'ajel tu'n junjun.

⁵ Aju' rit mujqa chib' te jun ab'q'iqe', tman ex mixti' ttzakajil,

⁶ teyiletzun junjun aj Israel kb'el tjyo'npun tu'ntzun tkub' kyb'yo'n ajtok qale toj kyajlaljuj (14) tajlalju' xjaw lu.

⁷ Atzu'n tchk'el alu'mj k'okyil kysun ti'j tqul tjpel kyja, ja che wala' ti'ju' alu'mj.

⁸ Atzun qonik'anju' kche wal ti'ju' chib'j k'a'sa'n twitz q'aq' tuk'i'l itzaj k'a ex wab'j mixti' ttx'amal.

⁹ Mixti' jun piẍ chib'j kxel kych'yo'ne' cha'xwit mujqa tzq'ajsa'n toj ta'l. Tkyaqilju' tchib'jil exqe'ju' toj tk'u'j, tqan ex twi', ilti'j tu'n tk'a'sit twitz q'aq',

¹⁰ ex mixti' tu'n tkyej kyk'u'ne' te juntl q'ij. Qatzun atix min xb'aj kyu'ne', ati tu'n tkub' ktz'e'ysa'ne' toj q'aq'.

¹¹ Matxitoqtzun b'jo'k kyoksa'ne' kyxb'alune', e'kyxajab'e' ex tuk'i'lju' kytzeye' toj kyq'ob'e', che wanqe'tzuntze' ojqel ti'ju' alu'mj, qu'n a Q'iju' Te Tzaqpib'l kyeye' wu'ne' ayine' ju' Dyos Manb'aj.

¹² Chin ik'ele' toju' qonik'an lu toj tkyaqil Ejipt, che kb'el nb'yo'ne' tnejel k'wa'lb'aj toj junjun ja, e'tnejel kyal alu'mj, ex ktzajel nq'o'ne' tz'e'ysb'il kywitz kydyos aj Ejipt, ayine' Dyos Manb'aj nchin q'mante.

¹³ Aju' chik' a tajb'enju' tu'n tyek'u'nteju' kyjaye' ja tu'me'l ta'qeye'. Ajtzun wik'e' b'yolkye aj Ejipt, mix-a'lo' junkye' kkyimel, qu'n lwiy kxel nka'yi'nju'ye' chik' tok ti'j tqul tjpel kyjaye' ex majx tqanku' chin ik'ele' tk'etz.

¹⁴ Atzunju' q'ij lu ktzajel kna'ne' kukxju' ex kb'el kyik'sa'ne' tuk'i'l jun ninq'ij te ninb'ilweye'. Jun kawb'ilte' lu tu'n kyik'santeye' kukxju', ex tu'n kb'inchanteju' kyyajajile' che ul.

¹⁵ Wuq q'ij kche wal wab'je' mixti' ttx'amal, qu'mtzun toj tnejel q'ij mixti' tu'n tten ttx'amal wab'j toj kyjaye'. Alkyetzunte mawan wab'j tuk'i'l ttx'amal toju' wuq q'ij lu, mixti' tu'n toktl tajlalju' tnam Israel.

¹⁶ Toju' tnejel q'ij exju' twuqi'n q'ij kyb'u'yi' kyib'e' toj k'u'lb'il xjan. Mixti' tu'n kyaq'unane' kyoju' q'ij lu, naq o'kx tu'n tb'inchet kwaye' teyile junjun.

¹⁷ Aju' tq'ij wab'j mixti' ttx'amal, ajun q'iju' tu'n tkub' kyik'sa'ne', qu'n a q'ij ja'lu ẍeb'je'tz wi'ne' toj Ejipt kykyaqile'. Jun kawb'ilte' tu'n kyik'santeye' kukxju', exqe' kyyajajile' che ul yajxi'tel.

¹⁸ Kche wal wab'je' mixti' ttx'amal te qale toju' q'ij kyajlajoj (14) tajlal tnejel xjaw tu'n tpon b'aj te qale teju' q'ij junaq jun (21) tajlalju' xjaw lu.

¹⁹ Wuq q'ij mixti' tu'n tten ttx'amal wab'j kyjaye'. Alkyetzunte mawan wab'j tuk'i'l ttx'amal, mixti' tu'n ttentl kyxol aj Israel, maskye jun najchaq xjal mujqa aj Israelx.

²⁰ Qu'mtzun lalun txikywan wab'je' tuk'i'l ttx'amal. Jaxjaku' najlqe'ye', ati tu'n kywan wab'je' mixti' ttx'amal, chechiku'ye' kye, chi Dyos kye Moyses ex Aaron.

²¹ Atzunte Moyses e'ttxokju' tijwnaq kyxol aj Israel ex tzaj tma'n kye: Kukyxi'ye' ex kyiq'intze' jun qpoj tman rit mujqa jun tal chib' kxolju' ate' toj kyjaye', ex kb'yonku'ye' tu'ntzun tik'setju' Q'ij Te Tzaqpib'l.

²² Aju' chik' k'elel ti'j, kq'onku'xe' toj jun se'n tzma ex kb'inchantze' jun pchoj k'ul isopo. Kyak'sanku'xe' toju' chik' ex ksunktzuntze' ti'j tqul tjpel kyjaye'. Mix-a'lo' junkye' tu'n tetz toj tja na'mtoq qsqix.

²³ Ajtzun tik' Qman Dyos k'ixb'salkye aj Ejipt tu'n kamik, k'okyil tka'yi'n chik' ti'j tjpel kyjaye', majxtzun tqanku' k'ik'eltz tk'etz kyjaye'. Lay taq'te Qman Dyos anb'il tu'n tokju' kamik kyjaye'.

²⁴ Ilti'j tu'n t-xi' knima'nju'ye' chaq'b'il lu, exqe' kyyajajile' che ul yajxi'tel, qu'n kawb'ilte' tejumajx.

²⁵ Ajtzun kyokxe' toju' tx'otx'ju' kxe'l tq'o'n Qman Dyos kyeye', kse'nxju' tzajni ttziya'n, kb'el kyik'sa'ne' ninq'ij lu kukxju'.

²⁶ Ajtzun t-xi' qani'n kyeye' kyu'n kyk'wale': ¿Ti'tzun toklenju' ninq'ij lu?, Qa chechi.

²⁷ Aye'tzunkye' a kytzaq'wenxju'ye': Jun chojb'ilte' lu nb'inchet te ninb'ilte Qman Dyos toju' Tq'ij Tzaqpib'l, tej tik' k'ixb'salkye aj Ejipt tu'n kamik, ex majx tqanku' ik' ttziyile kyja aj Israel najlqe'toq toj Ejipt, ikytzu'n e'kleta' qwnaqilju'ye' chechiku'ye' kye, chi Moyses kye. E'kub'tzu'n meje aj Israel k'ulul twitz Qman Dyos, majx ku'pun kyplaj twitz tx'otx',

²⁸ kyb'inchatzuntz kse'nxju' tma Qman Dyos te Moyses ex Aaron.

E'kyimu' tnejel k'wa'lb'aj

²⁹ Tetzun tk'u'j aq'b'il ik' Qman Dyos tuk'i'l kamik b'yolkye kykyaqil tnejel k'wa'lb'aj kyxol aj Ejipt. Tzaj qex ti'ju' tnejel tk'wal nimaqkawil ntoq kawin, ex kyi'j tnejel kyk'walju' presi'nqe'toq ex ponb'aj kyi'ju' tnejel kyal alu'mj.

³⁰ Atzunte nimaqkawil kyuk'i'lju' nche kawin tuk'i'l ex kykyaqil aj Ejipt e'jawe' teju' qonik'an lu, nim oq'e'n jaw toj tkyaqil Ejipt. Qu'n mixti' jun ja mixwitti' jun kyimni toj.

³¹ Textzu'n qonik'an lu tchaq'ju' nimaqkawil tu'n kyxi' txokb'aj Moyses ex Aaron, ex xitma'n kye: —Kukyxi'ye' aj Israel, kypa'mil kyib'e' kyi'ju' nwnaqile'. Kukyxi'ye' k'ulul te Dyos Manb'aj kse'nx oje kymaye'.

³² Kyiq'inqe'xe' kyrite' ex kywakyixe' kse'nx kyqanb'etze'. Extzun che kub'sanqe'ye' wib'aje' twitz Dyos, chij.

³³ Aye'tzu'n aj Ejipt oktilil kyu'n tu'n kyb'je'tzu' aj Israel ti'jxi' kytx'otx', qu'n kyxima qa oktoq che b'ajel kykyaqil.

³⁴ Kykyaqiltzu'n aj Israel xikyiq'i'n tq'otjil kywa, na'mxtoq tku'x ttx'amal tuk'i'lxi' ja nxyuq'ita', b'ajkub' kyb'altz'i'n toj kyxb'alun ex b'jaw kyq'o'ntzuntz ti'j kyqul.

³⁵ Ex xikyqani'n ti'xti' q'anpwaq, saqpwaq ex kyxb'alun kye aj Ejipt kse'nx tma Moyses kye.

³⁶ Axte Dyos b'inchante tu'n kyq'onte aj Ejipt tu'n tkyaqil kyk'u'j tkyaqilxju' intoq xikyqani'n aj Israel kye, iktzun tu'me'l ja'lu eb'je'la' ti'xti' kyu'n aj Israel kye aj Ejipt.

E'b'je'tz aj Israel toj Ejipt

³⁷ E'b'je'tztzun aj Israeltz toj Ramses tu'n kypon toju' najb'il Sukot, qapelo oxnaq o'lajmutx' (600,000) kyb'aju' ichan, ex mixti' e'okju' qya ex k'wal toj tajlal.

³⁸ Nim wakx ex rit eb'je'tz kyiq'i'n, ex nim xjal mya aj Israel eb'je'tz kyuk'i'l.

³⁹ Tu'ntzunju' xla'ja'n eb'je'tza' kyu'n aj Ejipt, mixti' ten anb'il kye tu'n kyb'inchante kywa. Kub' kyb'incha'n kywa muqin tu'nju' tq'otjil wab'j mixti' ttx'amal etz kyiq'in toj Ejipt.

⁴⁰ Junk'al junaq lajoj (430) ab'q'i e'najan aj Israel toj Ejipt,

⁴¹ tojxtzu'n q'ij tej tjapun junk'al junaq lajoj (430) ab'q'i, kykyaqilju' ttanam Dyos eb'je'tz toju' tx'otx' lu.

⁴² Tojtzu'n qonik'an lu, kub'ten Qman Dyos xq'uqilkye ttanam tu'n kyetz tiq'i'n toj Ejipt. A qonik'an ja'lu te Qman Dyos, jun qonik'an tu'n tjaw kynimsa'n aj Israel tb'i, ex kyu'nju' kyyajajil toj wiqi'n yajxi'tl.

Kawb'il tib'aju' Tq'ij Tzaqpib'l

⁴³ Tzaj tma'n Qman Dyos kye Moyses ex Aaron: A kawb'il ja'lu ajtkub' kyik'sa'ne' Tq'ij Tzaqpib'l: Mix-a'lo' jun mya aj Israel tu'n tch'yon ti'ju' alu'mj te chojb'il,

⁴⁴ atzu'n lq'o'n majen tu'n pwaq, qa okni techil ti'j tchib'jil, b'a'n tu'n tch'yon ti'j.

⁴⁵ Aye'tzu'n najchaq xjal, qa naq nche b'et mujqa majin, mixti' tu'n kywan ti'ju' alu'mj.

⁴⁶ Noq toj junx ja che wala' ti'j. Mixti' tu'n tetz kyi'n jun piẍ tchib'jilju' alu'mj te chojb'il ti'jxi'ju' ja, ex mixti' tu'n ttoqet jun tb'aqil.

⁴⁷ Kykyaqil aj Israel tu'n kyb'inchante ja'lu.

⁴⁸ Qatzun ati jun xjal mya aj Eb'rey najli kyxole' tajb'il tu'n tik'santeju' Tq'ij Tzaqpib'l te ninb'ilweye' ayine' Dyos Manb'aj, tnejil ati tu'n tok techil ti'j tchib'jil kyuk'i'l kykyaqilju' ichan ate' toj tja, b'a'ntzun tu'n tik'santetzu', k'okyiltzuntz kse'nqe' xjal nche itz'ji toju' tnam lu. Mix-a'lo' jun kch'yol ti'ju' alu'mj lu qa min tok techil ti'j tchib'jil.

⁴⁹ Ax kawb'ilju' kb'inchetel kye xjal axtzu' itz'jna'qe' toju' tnam ex kye najchaq xjal najlqe' kyxole', chechiku'ye' kye, chi Dyos kye.

⁵⁰ Kyb'inchatzu'n aj Israel kse'nx tchaq' Qman Dyos kye Moyses, ex Aaron.

⁵¹ Textzu'n q'ij lu eb'je'tz tiq'i'n Qman Dyos aj Israel toj Ejipt, nk'u'n kyten toj tneji'n.