Éxodo 11 - Biblia Mam de Quetzaltenango

Tqanil tu'n kykyimu' tnejel k'wal

¹ Tzaj tma'ntl Qman Dyos te Moyses: —Atix juntl yajb'il wu'ne' tib'aju' nimaqkawil ex kyib'aj aj Ejipt. Tib'ajxi'tzun ja'lu, myanoq o'kx che xe'ltzaqpi'ne' tu'n nimaqkawil. Qu'n aku'pe' k'eletz xla'jankyeye'.

² Atzun ja'lo q'manxa kye aj Israel, e'ichan ex qya, tu'n t-xikyqani'n ti'xti' q'anpwaq ex saqpwaq kye kyb'esin. Chi Dyos.

³ Ojetoqtzun che ok aj Ejipt b'a'nwnaq tu'n Qman Dyos kye aj Israel. Kykyaqil aj Ejipt exqe' nche kawin tuk'i'l nimaqkawil, kyma qa ate Moyses jun xjal nim toklen.

⁴ Atzunte Moyses xitma'n teju' nimaqkawil: —Chi Dyos Manb'aj kjalu: Chin elixe' tk'u'j aq'b'il kyxol kykyaqil aj Ejipt,

⁵ che kyimelju' tnejel k'wa'lb'aj tojile kyja aj Ejipt, ktzajelx nej wu'ne' ti'j tnejel tk'wal nimaqkawil ju' nkawin, ex kpomil b'aj ti'j tnejel talju' qya majin naq'unan ti'j ab'j cheb'l triy. Ex ikx che kyimelju' tnejel kyal alu'mj.

⁶ Kb'ajel oq'e'n ex sich' toj tkyaqil Ejipt tu'n k'ixk'oj, aj b'ajx tzik'a' junmaj ex lay b'aj jumajtl ikju', chi Dyos.

⁷ Tu'ntzun telkynik'e' qa mya junx kyilwi aj Ejipt kyuk'i'l aj Israel wu'ne' ayine' Dyos Manb'aj, qu'n laype' chiyon jun tx'yan ti'j jun xjal mujqa ti'j jun alu'mj kyxol aj Israel. Chi Dyos.

⁸ Kykyaqiltzu'n nche kawin tuk'i'la lu che b'ju'l nk'etze', che kb'el meje nwitze' majx kku'pumelju' kplaj twitz tx'otx' ex ktzajel kma'n weye': Kutexa kyuk'i'lxi'ju' xjal inche lepenje ti'ja, chiqe'lo weye'. Tb'ajlenxi'tzun ja'lu chin elextzuntze'. Chi Moyses teju' nimaqkawil. Etztzun Moyses twitzju' nimaqkawil, inxi'x tx'u'jin.

⁹ Tzaj tma'ntl Qman Dyos te Moyses: —Che kxe'lxi' b'i'nkye' tu'n nimaqkawil tzmaxi'j ajkyb'inchet txqantl techlal wu'ne' toj Ejipt, chij.

¹⁰ Tkyaqilju' techal lu eb'ent tu'n Moyses ex Aaron twitzju' nimaqkawil, atzunte Qman Dyos matxi'toq kub' tch'uẍsa'n tanmi nimaqkawil, qu'mtzun mixti' eb'je'tz ttzaqpi'n aj Israel toj Ejipt.