Amós 1 - Biblia Mam de Quetzaltenango

Tz'e'ysb'il kywitzju' nimaqtnam nqaku' ta'qe' tk'etz Israel

¹ Atzun tqanil ja'lu tzaj tq'o'n Qman Dyos te Amos, jun k'ik'lel rit toju' tnam Tekoa, tzaj tq'o'n tqanil te ti'ju' tnam Israel, atixtoq kab'e' ab'q'itl tu'n ttzaju' kyejnajnab' toju' tq'ijlalil nimaqkawil Usiy toj Juda, ex toj tq'ijlalil Jerob'oam, tk'wal Joas, nimaqkawil toj Israel.

² Naqa xtb'inchate Qman Dyos tu'n tb'injtzu' toj twi' njulin naku'j q'ankyaq tzmax twi' witz Syon, toj Jerusalen, nche kub' tzqju' k'ul kywa alu'mj kyoj kojb'il ex nkub' tzqij twi' witz Karmelo.

³ Chi Qman Dyos kjalu: Nim txqan myab'a'n matxi' kb'inchaju' xjal te Damask, qu'mtzun lay naq chin ka'yine' kye; qu'n mache okten yajlalkyeju' xjal aj Kalaad, kse'n nxq'iq'et triy tu'n pitxb'il.

⁴ Qu'mtzun k'okyel nq'o'ne' tq'aq'al tja nimaqkawil Asael, ex tu'nxju' q'aq' lu che kb'ajelju' ja te kawb'il te B'en-adad.

⁵ K'okex npa'njuye' tjpel nintnam Damask; ex kb'el nb'ajsa'nju'ye' nkawin toj B'ikat-ab'en exju' nkawin toj B'et-eden, aye'tzu'n aj Sirya che kxe'l q'i'n toj Kyir. Chi Qman Dyos.

⁶ Chi Qman Dyos kjalu: Nim txqan myab'a'n matxi' kb'inchaju' xjal te Kasa ex lay naq chin ka'yine' kyi'j; qu'n majx xikyiq'i'n jun tnam, ex matxikyk'a'yi'n toj Edom naku'j lq'on majen.

⁷ Qu'mtzun k'okyel nq'o'n kq'aq'alju'ye' nimaq tapi te Kasa, ex che kb'ajelju' ja te kawb'il tu'n.

⁸ Kb'el nxitu'nju'ye' nkawin toj Asdod exju' nkawin toj Askalon. ¡Tuk'i'l tkyaqil wipumale' chin okyel tzaqpaje' ti'j Ekron, ex majx che mankulju' pilistey wu'ne'! Chi Qman Dyos.

⁹ Chi Qman Dyos kjalu: Nim txqan myab'a'n matxi' kb'inchaju' xjal aj Tiro ex lay naq chin ka'yine' kyi'j; qu'n xikyq'o'n jun tnam toj tkawb'il Edom, aju' tnam kyejni b'ent jun kyol kyuk'ilju' kyitz'inkyib'.

¹⁰ Qu'mtzun k'okyel nq'o'ne' kq'aq'alju' tapi te Tiro, ex che kb'ajel patju' tja kawb'il tu'nju' q'aq' lu.

¹¹ Chi Qman Dyos kjalu: Nim txqan myab'a'n matxi' kb'inchaju' xjal te Edom ex lay naq chin ka'yine' kyi'j; qu'n e'oklpe kyi'ju' aj Israel tuk'i'l k'uẍtx'e'nb'il, mixti'x tzaj laqj kyk'u'j kyi'ju' kyitz'in. Tzaj ktx'u'jil b'a'nxi'x, ex majx matxi' kq'o'n kq'oj toj kyk'u'j.

¹² Qu'mtzun k'okyel nq'o'ne' tq'aq'alju' tnam Teman, ex che kb'ajel patju' tja kawb'il te B'osra tu'nju' q'aq' lu.

¹³ Chi Qman Dyos kjalu: Nim txqan myab'a'n matxi' kb'inchaju' xjal te Amon ex lay naq chin ka'yine' kyi'j; qu'n b'ajx kplaq'cha'n kyk'u'ju' qya ch'onwi'qe' teju' tnam Kalaad, naqx tu'n ttzyet txqan tx'otx' kyu'n.

¹⁴ Qu'mtzun k'okyel nq'o'ne' kq'aq'alju' nimaqtapi te Rab'a, ex che b'ajel patju' kyja te nimaqkawb'il tu'n q'aq' lu ex kb'ajel sich' toj q'oj naku'j q'ankyaq inxi'x tinun.

¹⁵ Kxe'l q'i'nju' nimaqkawil toj juntl tnam, junx kyuk'i'l kykyaqilju' t-xjal nimaq kyoklen. Chi Qman Dyos.