Tito 2 - Mam de Huehuetenango nueva ortografía

Tu'n qq'onte xnaq'tzb'il tuj tumelxix

¹ Atzun teya, q'onxa ju xnaq'tzb'il kye, aju xnaq'tzb'il minti' tpaltil.

² Q'manxa kye anciano tu'n tten kynab'l ex tu'n tten kychiylal, ex tu'n kyjak'unte kyib', ex tu'n tten kyokslab'l minti' tpaltil, ex tu'n tten kyk'ujlalil axix tok ex tu'n tten kypasens tu'n tik'x kyu'n.

³ Ax ikx q'manxa kye tij xu'j tu'n tten tchiylal Dios kye tuj tkyaqil, ex tu'n mi'n kyok si'mil yol, ex tu'n mi'n kyok k'al q'e'n, noq o'kx tu'n kyq'onte xnaq'tzb'il ti'j ju b'a'n,

⁴ ex tu'n t-xi kyq'o'n tij xu'j xnaq'tzb'il kye qe xu'j q'apojx qe tu'ntzun kyk'ujlante kychmil kyuk'ix kyal,

⁵ ex tu'n kyjak'unte kyib', ex tu'n kyten saq tuj kyanmi, ex tu'n tok kykwentin kyja, ex b'a'n kymod, ex tu'n t-xi kyniman kychmil; tu'ntzun mi'n kyyolin xjal mya b'a'n ti'j tyol Dios.

⁶ Ax ikx q'onxa kynab'l ku'xun tu'n kyjak'unte kyib'.

⁷ Tuj tkyaqil b'inchama b'a'n tu'n toka te jun yek'b'il kye txqantl, q'onxa xnaq'tzb'il cabalxix, ex atwit toklen tyola.

⁸ Aju t-xnaq'tzb'ila minti'wt tpaltil ex minti' tu'n kyyolin xjal ti'j, tu'ntzun ttzaj tch'ixwi aj q'oj kyi'je, ex tu'n mi'n tyolin jun yol mya b'a'n kyi'je.

⁹ Q'onxa kynab'l majen tu'n kynimante kyyol kypatrón, ex tu'n kyb'inchante aju b'a'n tu'n kytzalaj kypatrón kyi'j, ex tu'n mi'n taj kymojtza'n kyyol kypatrón,

¹⁰ ex tu'n mi'n kyelq'an, noq o'kx tu'n tok kykwentin tkyaqil, tu'ntzun tel kynik' xjal ti'j qa tb'anilxix t-xnaq'tzb'il Dios aju Klol qe.

¹¹ Porke ma tzaj tyek'un Dios t-xtalb'il kye kykyaqil xjal tza'n tten tu'n kyklet.

¹² In tq'o'n t-xtalb'il Dios xnaq'tzb'il qe tu'n tkyaj qkolin aju mya b'a'n ex aju achb'il twitz tx'otx' ex tu'n tten qnab'l tuj tq'ijlalil ja'lo, ex tu'n qb'et tuj tumelxix, ex tu'n qniman Dios.

¹³ Ex in tq'o'n xnaq'tzb'il qe tu'n qayon ti'j Jesucrist ok tul, porke jun tzalajb'il ok tjapun jlu. Aju Jesucrist Qdios ma'xix toklen ex Klol qe, ok tyek'unte tib' in qoptz'aj wen.

¹⁴ Xi tq'on tib' Jesucrist tu'n tkyim tu'n tchjet qil tu'n, tu'ntzun qkolpet tu'n tuj tkyaqil mya b'a'n, ex tu'n t-saqix tuj qanmi tu'n, tu'n qok te jun tnam tekuxix ex at-xix qgan tu'n qb'inchante aju b'a'n.

¹⁵ Q'manxa jlu kye okslal, q'onxa kynab'l ex kawinxa qe, atwit tipumal tyola. Miwt jun tz'el ik'un teya.