Sofonías 3 - Mam de Huehuetenango nueva ortografía

Aju il kyb'incha aj Jerusalén ex aju kolpib'l kye

¹ B'ek'b'il twitz tnam Jerusalén, aju tnam tk'i' txi tb'i'n, ttz'ilsan tib' tu'n tb'inchb'en mya b'a'n ex in yajlan kyi'j txqantl xjal ate' tuj.

² Minti' xi tb'i'n tq'ajq'ajel twi Qman, minti' kub' tuj twitz tu'n t-xi kawin, minti' ok qe' tk'u'j ti'j Qman ex minti' aj meltz'aj tuk'il Tdios.

³ Ik kyten qe nejenel ate' tuj ik tza'n qe b'alun in che tzanun; ik kyten qe jwes ate' tuj ik tza'n qe xo'j, te qonik'an minti' in kyaj kyq'o'n tb'aqil kychi' te juntl q'ij.

⁴ Minti' tajb'en kyyol qeju nno'k kyq'on kyib' t-sanjel Dios ate' kyxol, ax in che ok meltz'aj kyi'j kyuk'il; qe pal ate' kyxol in b'aj kytz'ilsa'n tja Dios ex mya tuj tumel in ajb'en tley Qman kyu'n.

⁵ Ax ta' Qman tuj tnam; tz'aqlxixte ex minti' in tb'incha'n mya b'a'n. Teyle te junjun prim in xi tb'incha'n kyi'j xjal ex mlay tz'el ti'j. Atzun qe xjal mya b'a'n minti' in tzaj kych'ixwi ti'j kyb'inchb'en.

⁶ Chi Qman in tma'n: O che kub' nxitune qe nasyon, o che kub' nxitune qe ja ma' kywa'l te kykolb'il kyib', qe cay ate' kyuj o che ok wu'ne ik tza'n jun lugar minti' xjal tuj, mi jun xjal in b'et kyuj. Ma che b'aj xitj qe kytanmi, minti' jun xjal najl kyuj.

⁷ Kub' nximane kyja': Qape jaku che xob' aj Jerusalén nwitze, ex qape jaku kub' tuj kywitz tu'n kyxi nkawine tu'ntzun mi'n tkub' nxitune aju tnam jatum najlqe, ik tza'n kycastiw ma kub' nq'o'ne. Atzun kye ok tilil kyu'n tu'n kyb'inchante tkyaqil txkaj mya b'a'n.

⁸ Tu'ntzun jlu, che ayone wi'je tuj q'ij ok kyoke tuj xjel wu'ne. Aqine Dios in chin q'mante jlu: Ma kub' nximane tu'n kyok nchmo'ne qe nasyon ex qe kawb'il tu'n tkub' nq'o'ne kycastiw tuk'il nimxix nq'oje. Tkyaqil twitz tx'otx' knajel tu'n nq'oje mer ik tza'n q'aq'.

⁹ Tuj tq'ijlalil tzul, wu'ne kch'expetel kyyolin qe nasyon tu'n kyyolin tuj tumelxix, tu'ntzun ntzaj na'ne kyu'n kykyaqil xjal ex tu'n kyajb'en weye mojl kyyol.

¹⁰ Taj jlajxi qe nima tuj Etiopía, jatum kysputun kyib' qe xjal etzan wu'ne, che tzajel kub'sal nwitze ex ktzajel kyi'n oyaj te weye.

¹¹ Aqeye xjal etzan wu'ne, tuj tq'ijlalil tzul mlay tzajtl kych'ixwiye ti'j kyb'inchb'ene tej tjaw kyi'n kyib'e wi'je, ok che elex wi'ne kyxole qeju nno'k kyq'o'n kyib' te ma'xix ex in jaw kyniman kyib', ex mlaytl jaw kyniman kyib'e juntl maj twi' ju witz xjan etzan wu'ne.

¹² Che kyjel nq'o'ne kyxole qe xjal mans ex ch'in kynab'l, ex k'okel qe' kyk'u'j wi'je.

¹³ Qeju che kyjel anq'in kyxol aj Israel mlay kyb'inchatl aju mya tz'aqlxix, mlay che nik'an yol ex mlaytl che sb'un. Che wa'l ex che ojlal ex mi a'l jun k'okel xob'tzan kye.

B'itz te tzalajb'il ti'j Jerusalén

¹⁴ Che b'itzane aqeye aj Sión. Kyq'onx tq'ajq'ajel kywi'ye te tzalajb'il aqeye aj Israel. Che tzalajxe aqeye aj Jerusalén, che tzalajxe tu'n tkyaqil kyanmiye.

¹⁵ Ma tz'el ti'n Qman aju sentens tkub' kyib'aje ex ma che ex tlajo'n qe aj q'oj kyi'je. Ate Qman at kyxole, aju rey kye aj Israel; mlay che xob'tle twitz ju mya b'a'n.

¹⁶ Tuj tq'ijlalil tzul kxel q'met kye aj Jerusalén kyja': Mi'n che xob'e aqeye aj Sión, ex mi'n che kub' numje.

¹⁷ Ate Qman at kyxole aju Kydiose at nimxix tipumal, ex che kletele tu'n. Ktzalajel Qman kyi'je. Kb'el txule' tuk'il tk'ujlalil, ktzalajel kyi'je tuk'il b'itz,

¹⁸ ik tza'n tuj jun ninq'ij. Chi Qman in tma'n: Aqine chin klolte kyeye tuj ju mya b'a'n in xob'tzante kyeye, ex tuj ju ch'ixb'il tkub' kyib'aje.

¹⁹ Tuj tq'ijlalil tzul kb'el nq'o'ne kycastiw qeju in che yajlante kyeye. Wu'ne che kletel qe kox ex che tzajel nchmo'ne qeju o che el tzpet, che jawil nnimsa'ne ex k'elel wi'ne ju ik'b'il kyeye kyu'n xjal; qe xjal tuj tkyaqil twitz tx'otx' che yolil b'a'n kyi'je.

²⁰ Tuj tq'ijlalil tzul che tzajel wi'ne ex che okel nchmo'ne, che tele juntl maj wu'ne tuj txub'txaj; wu'ne che jawil nimsa'ne ex kykyaqil xjal twitz tx'otx' che yolil b'a'n kyi'je. Aqine Dios ma chin q'mante jlu.