Rt 4 - Mam de Huehuetenango nueva ortografía

Tej tmoje' Booz tuk'il Rut

¹ Xi'tzun Booz ex kub' qe' ttzi tlamel tnam jatum nno'k kychmon kyib' xjal. Tk'ulb'aku okx aju xinaq mas at t-xilen Rut tuk'il, aju otoq yolin Booz ti'j. Ex xi tma'n Booz te: —Q'ayn, laq'etza tzalu ex qekuya. Tzajtzun laq'e' xjal at t-xilen Rut tuk'il ex kub' qe'.

² E tzajtzun ttxko'n Booz laj tij xjal te tnam ex xi tma'n kye tu'n kykub' qe' ttxlaj.

³ Tejtzun kykub' qe', xi tma'n Booz te xjal at t-xilen tuk'il: —Ate Noemí aju xi' aj tuj Moab ma kub' t-ximan tu'n t-xi tk'ayin ttx'otx' qtzan Elimelec, aju at qxilen tuk'il.

⁴ Wajb'ile tu'n tb'inteya. Qa at tganiya ti'j tu'n tkyaj tlaq'o'na, q'mantza ja'lo kywitz qe testiw lu ex kywitz qe kytijil xjal te tnam. Tu'nju aya mas at t-xilena tuk'il Elimelec, at toklena ti'j tu'n tkyaj tlaq'o'na ttx'otx'. Qatzun mi'n taja tu'n tkyaj tlaq'o'na q'mantza weye, porke te tib'ajxiya, aqine at woklene ti'j tu'n tkyaj nlaq'o'ne, chi Booz. Xitzun ttzaq'we'n xjal at t-xilen tuk'il: —Jaku kyaj nlaq'o'ne.

⁵ Ax ikx xi tma'ntl Booz te: —Qa ma kyaj tlaq'o'na tx'otx' te Noemí, ax ikx il ti'j tu'n tmoje'ya tuk'il Rut aju meb'a xu'j aj Moab, tu'ntzun mi'n tnaj tb'i qtzan tchmil ti'j tx'otx'.

⁶ Xi ttzaq'we'n xinaq aju at t-xilen Rut tuk'il: —Qa ik ttenju mlay kyaj nlaq'o'nwe tx'otx', ex ok nkyime jaku b'ant tkyaj ten tx'otx' lu te juntl ex mya kye qe nk'wa'le. Qatzun taja tu'n tkyaj tlaq'o'na tx'otx', jaku txi nq'o'ne oklenj teya tu'n tkyaj tlaq'o'na, chi xjal.

⁷ Tuj tq'ijlalil ojtxi attoq jun costumr kyxol aj Israel: Ok t-xi tq'o'n jun xjal toklen te juntl aju at t-xilen tuk'il, ex qa ma moje' jun kyyol ti'j jun kytrat, alkye in xi tq'o'n toklen te juntl, ex qa in xi tk'ayin jun ti'xti, nne'l ti'n jun t-xajab' ex in xi tq'o'n te laq'ol. Atzun jun kyuwsab'l kyyol aj Israel ti'j ju kytrat.

⁸ Atzunte xjal at t-xilen tuk'il Booz xi tma'n: —Laq'onkja. Ex el ti'n jun t-xajab' ex xi tq'o'n te Booz.

⁹ Atzunte Booz xi tma'n kye kytijil xjal ex kye txqantl xjal ate'toq kyuk'il: —Aqeye testiw wi'je, ya ja'lo ma kyaj nlaq'o'ne te Noemí aju kytx'otx' qtzan Elimelec, Quelión ex Mahlón.

¹⁰ Ax ikx testiw qeye wi'je tu'n tjaw wi'ne Rut te nxu'jile, aju meb'a xu'j aj Moab, tu'ntzun mi'n tnaj tb'i Mahlón ti'j ttx'otx' ex tu'n mi'n tnaj tb'i Mahlón kyxol qe terman aju qtzan tchmil Rut, ex tu'n mi'n tnaj tb'i tuj tnam lu. Aqeye testiw wi'je ja'lo, chi Booz.

¹¹ Kykyaqil qe xjal in che b'intoq ti'j, kyuk'ix qe kytijil xjal tzaj kytzaq'we'n: —Ax tok, aqo'ye testiw ti'ja. Ok tpon xu'j lu tuj tjaya, tz'okxwit tu'n Qman ik tza'n te Raquel ex Lea, ex kyi'jtzun qe xu'j lu tzaj xe't kyiyjil aj Israel. Atzun teya tz'okxa jun xinaq ma'xix toklen tuj Efrata, ex che yolinwt xjal b'a'n ti'ja tuj Belén.

¹² Awt Qman tzaj q'onte nim tk'wa'la ti'j xu'j lu, ex chmet-xwit tiyjila ik tza'n tiyjil Farez aju tky'ajal Judá, aju ul itz' ti'j Tamar, che chi xjal.

¹³ Kyja'tzun tten o moje' Booz tuk'il Rut, ex tej tkub' tmojb'an tib' tuk'il, xi tq'o'n Qman amb'il tu'n tok ten tal Rut ex tzaj jun tal xinaq.

¹⁴ Atzun kye xu'j xi kyma'n te Noemí: —Nimanxwit tb'i Qman tu'nju ma tzaj tq'o'n jun tal tchmana tu'n tok kwentina tu'n. Kuchiwt tz'ok te ma' toklen kyxol aj Israel.

¹⁵ Ate q'a lu kq'uqb'alte tk'u'ja ex k'okel k'a'chana tu'n ok ttijina, ex tal tlib'a aju k'ujla'nxixa tu'n, ex noqwit at wuq tala ex maswitlo ma' toklen tlib'a kywitz.

¹⁶ Tzajtzun tpalo'n Noemí tal ne', ok tq'o'n ttzi t-xu'k ex kyaj ten ne' tuj tkwent tu'n tch'iy.

¹⁷ Tejtzun kyke'yinte qe xu'j kyvesin kyib' tuk'il, kyma: —Ma tz'itz'j jun tal Noemí, che chi. Obed tb'i tal ne' ok kyq'o'n. Ate Obed tman Isaí ex tchman David.

Qe t-xe'chel David

¹⁸ Atzun kyb'i t-xe'chel David jlu tzajni qe ti'j Farez: Ate Farez tman Hezrón,

¹⁹ atzunte Hezrón tman Ram, atzunte Ram tman Aminadab,

²⁰ atzunte Aminadab tman Naasón, atzunte Naasón tman Salmón,

²¹ atzunte Salmón tman Booz, atzunte Booz tman Obed,

²² atzunte Obed tman Isaí, atzunte Isaí tman David.