Rt 2 - Mam de Huehuetenango nueva ortografía

Xi' Rut sukwil sebad tuj tkojb'il Booz

¹ Attoq jun xinaq Booz tb'i at t-xilen tuk'il Elimelec aju qtzan tchmil Noemí, ate xinaq lu q'inunxix.

² At jun q'ij xi tma'n Rut te Noemí: —Q'ontza amb'il weye tu'n nxi'ye tuj kojb'il, qapelo at jun xjal jaku tzaj tq'o'n amb'il weye tu'n wok lpe'ye sukwil ti'j. —B'a'n tu'n t-xi'ya wal, chi Noemí te.

³ Xi'tzun Rut tuj kojb'il, ex ok ten sukwilte sebad aju in kyaj naj kyu'n qe majen. Ex tk'ulb'aku, a kanun tuj tkojb'il Booz aju at t-xilen qtzan Elimelec tuk'il.

⁴ Pontzun Booz, tzajnitoq tuj Belén ex e je'x tq'olb'e'n qe tmajen: —Awt Qman ten kyuk'ile, chi Booz kye tmajen. —Awt Qman ky'iwlan teya, che chi majen te Booz.

⁵ Xi tqanin Booz te tcaporal: —¿Alkye tman txin lu?

⁶ Atzunte caporal xi ttzaq'we'n: —Aj Moab te txin lu, aju o tzul junx tuk'il Noemí.

⁷ Ma tzaj tqanin weye tu'n t-xi lpe' sukwil sebad kyi'j qe majen; xtzyet-x tu'n prim may', ex matzun ma kub' ten ch'in ojlal ja'lo.

⁸ Xitzun tma'n Booz te Rut: —Txin, b'intza nej, mi'n txi'ya sukwil sebad tuj tkojb'il juntl xjal. Ax tena tzalu kyuk'il qe nmajene xu'j,

⁹ ex lpexa kyi'j jatum in che aq'nan. Ma txi nma'ne kye nmajene tu'n mi'n kylab't ti'ja. Ok ttzaj txqet ti'j tk'u'ja, b'ix txi'ya k'al a' jatum ate' qe xar tkub'il kyk'a' majen, chi Booz.

¹⁰ Atzunte Rut kub' ẍmeje' ex pon takl tib'aj twitz max twitz tx'otx' te jun yek'b'il te nimb'il twitz Booz, ex xi tma'n te: —¿Tza'n tten ma tb'inchaya xtalb'il weye ex ma tz'ok ten tkwenta wi'je porke aqine stranjer xjal?

¹¹ Atzunte Booz xi ttzaq'we'n: —Ma nb'iye tkyaqilju b'a'n o tb'inchaya ti'j tlib'a atxix tej tkyim tchmila, ex ma kyaj tq'o'na tmana tuk'ix ttxu'ya ex ttanmiya noq tu'n tula najal qxole, maske mi'n ojtzqi'n qo'ye tu'na.

¹² Awt Qman q'onte t-xel teya. Aju Qman aju Qdios aj Israel qo', awttzun q'onte jun oyaj teya ti'j tkyaqilju b'a'n ma tb'inchaya, tu'nju ma tz'ok qe' tk'u'ja ti'j tu'n tkleta, chi Booz.

¹³ Atzunte Rut xi ttzaq'we'n: —Tat, kukxwit tb'inchaya xtalb'il weye. Ma q'uqb'anjtz nk'u'je tu'n tyola, ex ma yolina wuk'ile tuk'il tk'ujlalila, maske mya junx ta' woklene ik tza'n qe tmajena xu'j, chi Rut.

¹⁴ Tej tpon or te wab'l, tzajtzun txko'n Rut tu'n Booz ex xi tma'n te: —Tzaja tzalu, q'inx tpana ex munku'xa tuj vinagr. Kub'tzun qe' Rut kytxlaj majen ex xi tq'o'n Booz ch'in twitz sebad tx'ilsa'maj te. O wa'n Rut tejxi tnoj tk'u'j ex atx kyaj ten tu'n.

¹⁵ Xi'tzun Rut juntl maj sukwil sebad ex xitzun tma'n Booz kye qe tmajen: —B'a'n tu'n t-xi ti'n txin ch'in twitz sebad, aju at kyxol junjun che'l, ex mi'n tz'ok kymayo'ne ti'j.

¹⁶ Ex b'a'n tu'n tel kyxo'ne junjun chyu'j twitz sebad ti'j junjun che'l, tu'ntzun tjaw tchmo'n aju nne'l tz'aq, ex mi'n tz'ok kymayo'ne ti'j, chi Booz.

¹⁷ O sukwin Rut sebad tuj tkojb'il Booz tejxi tex q'ij, ex tkyaqilju otoq chmet tu'n ok ten b'ajulte, ex ch'ixmi kab' arrob twitz el.

¹⁸ Ajtzun Rut tu'n tpon tuj tnam iqan twitz sebad tu'n. Tejtzun tpon, xi tyek'un te tlib' aju otoq chmet tu'n, ax ikx jatz ti'n aju wab'j minti' otoq b'aj tu'n ex xi tq'o'n te Noemí.

¹⁹ Xitzun tqanin Noemí te Rut: —¿Jatum ma txi aja sukwil ja'lo? ¿Jatum ma knet nim twitz sebad tu'na? Ky'iwla'nxwit aju xjal ma tz'onin teya. Xitzun tma'n Rut te tlib' alkye tajwil kojb'il jatum otoq xi aj sukwil. —Aju xinaq tajaw kojb'il jatum ma chin sukwine, Booz tb'i, chi Rut.

²⁰ Ex xitzun tma'n Noemí te: —Awt Qman ky'iwlante xinaq lu. Ate Dios ma tb'incha xtalb'il qe ik tza'n o tb'incha ojtxi kye qtzan qchmil. Ate xinaq lu at t-xilen kyuk'il qtzan qchmil, ex tu'ntzun jlu at toklen qi'j tu'n qok tkwentin.

²¹ Ex xi tma'ntl Rut te tlib': —Ax ikx ma tma Booz weye ax tu'n npone sukwil kytxlaj qe tmajen max okxi tjaw b'aj sebad tuk'ix triw.

²² Xitzun tma'n Noemí te Rut: —Ax b'a'n ikju wal, b'a'n tu'n ttena kyxol qe xu'j tmajen Booz, ex tu'n mi'n t-xi'ya tuj juntl kojb'il, tu'ntzun mi jun tu'n tlab't ti'ja, chi Noemí.

²³ Kyja'tzun, ax xi' Rut sukwil kytxlaj qe tmajen Booz tejxi tjaw b'aj sebad ex triw. Ex axtoq najl tuk'il tlib'.