Números 9 - Mam de Huehuetenango nueva ortografía

Tu'n tik'set Xjan Q'ij

¹ Tuj tnejel xjaw te tkab'in ab'q'i kyetzlen aj Israel tuj Egipto, tzaj yolin Qman tuk'il Moisés tuj tzqij tx'otx' t-xe witz Sinaí ex tma:

² Il ti'j tu'n tkub' kyik'sa'n aj Israel Xjan Q'ij tujxix tq'ijlalil.

³ Ktzyetel kyu'n te qale tuj kyajlaj tajlal xjaw lu, ik tza'nx b'animaj ti'j, ex tu'n tb'ant tkyaqil ti'j ik tza'nx in kyma'n qe xnaq'tzb'il ex qe ley o txi nma'ne teya, chi Qman te Moisés.

⁴ Xitzun tma'n Moisés kye aj Israel tu'n tkub' kyik'sa'n Xjan Q'ij,

⁵ ex kub' kyik'sa'n te qale tuj kyajlaj tajlal tnejel xjaw, tuj tzqij tx'otx' t-xe witz Sinaí. B'inchet tkyaqil kyu'n ik tza'nx otoq tma Qman te Moisés.

⁶ Ex ate'toq junjun xinaq otoq b'aj kytz'ilsan kyib' tu'nju otoq tz'ok kymako'n jun kyimni, ex kyja'tzun minti' tumel tu'n tkub' kyik'san Xjan Q'ij tujx q'ij lu. E je'xtzun tuk'il Moisés ex Aarón tujx q'ij lu,

⁷ ex xi kyma'n kyja': —Tz'il qo'ye tu'nju ma tz'ok qmako'ne jun kyimni. ¿Maj mi'ntzun txi qq'o'ne qoyaje te Qman tuj q'ij lu junx kyuk'il txqantl aj Israel?

⁸ Atzunte Moisés xi ttzaq'we'n: —Che ayone nej alkye ktzajel tma'n Qman kyi'je.

⁹ Tzaj yolin Qman tuk'il Moisés ex tma:

¹⁰ Q'manxa kye aj Israel jlu: Qa at junjun kyeye ex qa junjun kyiyjile, tz'il ate' tu'nju otoq tz'ok kymako'n jun kyimni, ex qa mi a'l tu'nju ate' tuj jun kyb'e najchaq,

¹¹ b'a'n tu'n tkub' kyik'sa'n Xjan Q'ij te qale tuj tkyajlajin tajlal tkab'in xjaw. Kxel kychyo'n tal tman ẍne'l tuk'il itzaj k'a ex pan minti' t-samel tuj tu'n tjaw mal tk'u'j,

¹² ex mi'n kyaj kyq'o'n ch'in chib'j te juntl q'ij ex mi jun tb'aqil kb'el kytoqin. Kb'el kyik'sa'n Xjan Q'ij lu ik tza'nx tkyaqil ley o txi nma'ne.

¹³ Qatzun at jun xjal mya ttz'ilsan tib' ex ax ta' tuj tja ex minti' ma kub' tik'sa'n Xjan Q'ij, k'elex lajet xjal lu, tu'ntzun mi'n ttentl kyxol t-xjalil, tu'nju minti' otoq tzaj tq'o'n toyaj weye tuj q'ij b'animaj ti'j. At til xjal ti'j jlu.

¹⁴ Qatzun at jun stranjer xjal najl kyxole taj tu'n tkub' tik'sa'n Xjan Q'ij te nimb'il weye, il ti'j tu'n tkub' tik'sa'n ik tza'nx tkyaqil xnaq'tzb'il ex ley o txi nma'ne. Ax ley ktel kyxol stranjer xjal ik tza'nx kye aj Israel.

Kub' ten muj tib'aj ja xb'alun te mojb'ab'l tib'il

¹⁵ Tuj q'ij tej tjaw b'incha'n ja xb'alun te mojb'ab'l tib'il, b'i'x o kub' ten muj tlugaril jatum tkub' kax k'ub'l tley Dios. Ok qok yupj, aju muj nno'k ke'yin ik tza'n q'aq', ex kukx tten ok tjawil q'ij.

¹⁶ Kukx o ten tkyaqil maj ikju; te q'ijl in kub' ten muj tib'aj tja Dios, ex te qonik'an nno'k ke'yin muj ik tza'n q'aq'.

¹⁷ Ex oktzun tjaw laq'e' muj tib'aj ja xb'alun te mojb'ab'l tib'il in che ik'tzun laq'e' aj Israel, ex jatum in we' muj, axtzun in che kub' ten aj Israel.

¹⁸ Okxi ttzaj tma'n Qman tu'n kyik' laq'e' aj Israel, in che ik'tzun, ex ok ttzaj tma'n jatum tu'n kywe', axtzun in che we'. Noq jte' q'ij in kub' ten muj tib'aj ja xb'alun te mojb'ab'l tib'il, ax ikx kye aj Israel axtzun in che kub' ten.

¹⁹ Ex ok twe' muj nim q'ij tib'aj ja xb'alun te mojb'ab'l tib'il, ax ikx kye aj Israel in xi kyniman tyol Qman, ex axtzun in che kub' ten.

²⁰ Ex at maj nik'xi q'ij in we' muj tib'aj ja xb'alun te mojb'ab'l tib'il. Ax Qman in q'mante kye tu'n kywe', ex ax in q'mante tu'n kyik' laq'e'.

²¹ At maj o'kx jun qonik'an in we' muj, atzunte prim in jaw laq'e' ex in kub'tzun b'e kyu'n aj Israel. Qa q'ijl ex qa qonik'an, ok tjaw laq'e' muj in che ik'tzun laq'e'.

²² Qatzun kab'e q'ij, qa jun xjaw ex qa jun ab'q'i ma kub' ten muj tib'aj ja xb'alun te mojb'ab'l tib'il, ax ikx kye aj Israel ax in che ten ex minti' in che ik' laq'e'. Ex oktzun tjaw laq'e' muj, in kub'tzun b'e kyu'n.

²³ Okxi ttzaj tma'n Qman tu'n kykub' ten tuj jun lugar, axtzun in che kub' ten, ex okxi ttzaj tma'n Qman tu'n kyik' laq'e', in che ik'tzun laq'e'. Xi kyniman tyol Qman ik tza'nx otoq tzaj tma'n Qman te Moisés.