Números 3 - Mam de Huehuetenango nueva ortografía

Aju tu'n tb'ant kyu'n aj Leví

¹ Atzun qe tiyjil Aarón ex Moisés jlu, aqeju ate'toq tuj tq'ijlalil tej tyolin Qman tuk'il Moisés twi witz Sinaí:

² Atzun kyb'i qe tky'ajal Aarón jlu: Nadab tb'i aju nej tk'wa'l; te tib'ajxi e tzaj Abiú, Eleazar ex Itamar.

³ Atzun qe tky'ajal Aarón o che xjansanjtz ex xi q'o'n kyoklen tu'n kyok te pal.

⁴ Ex ate Nadab tuk'ix Abiú e kyim twitz Qman tuj tzqij tx'otx' t-xe witz Sinaí, porke ajb'en ju q'aq' kyu'n te patb'il storak aju minti' o q'manjtz kye tu'n tajb'en. Tu'nju minti' kyky'ajal o tzaj, kyja'tzun o'kxte Eleazar tuk'ix Itamar e kyaj ten tu'n kyajb'en te pal ttxlaj Aarón aju kyman.

⁵ Tzaj yolin Qman tuk'il Moisés ex tma:

⁶ Txkontza qe tiyjil Leví tu'n kyul laq'e' twitz pal Aarón, tu'n kyonin ti'j tuj taq'un.

⁷ Che ajb'el te Aarón ex kye kykyaqil aj Israel twitz ja xb'alun te mojb'ab'l tib'il ex tu'n kyajb'en tuj tja Dios.

⁸ Ax ikx k'okel kykwentin qe makb'il ate' tuj ja xb'alun te mojb'ab'l tib'il ex che ajb'el kye aj Israel tuj tkyaqil aq'untl tuj tja Dios.

⁹ Pa'n ela qe aj Leví kyi'j qe txqantl aj Israel, tu'ntzun kyajb'en o'kx te Aarón ex kye qe tiyjil.

¹⁰ Atzun oklenj te pal, q'o'n kyaja tuj tq'ab' Aarón ex kye qe tiyjil. Qatzun at jun ma tz'ok tq'on tib' te pal ex mya axix tok tiyjil pal, b'i'x kb'el b'yet.

Etzan qe aj Leví tu'n Qman

¹¹ Tzaj yolintl Qman tuk'il Moisés ex tma:

¹² Ma che jaw nsk'o'ne qe aj Leví kyxol qe aj Israel, te kyxel qe nej kyky'ajal kykyaqil aj Israel. Weye qe aj Leví,

¹³ porke weye kykyaqil qe nej kyky'ajal aj Israel. Tej kynaj qe nej kyky'ajal aj Egipto, b'i'x e je'l npa'ne qe nej kyky'ajal aj Israel te weye, ex qe nej kyal qe alumaj. Kyja'tzun weye qe. Aqine Kymane.

Jaw jun tajlal kyi'j aj Leví

¹⁴ Tzaj yolintl Qman tuk'il Moisés tuj tzqij tx'otx' t-xe witz Sinaí ex tma:

¹⁵ Q'i'n jawa jun tajlal kyi'j kykyaqil xinaq aj Leví tuj k'lojin, teylex junjun tpamili; kxel qe' tajlanjtz kyi'j qeju ma te jun xjaw kyul-len itz'j.

¹⁶ Jawtzun tajlal tu'n Moisés ik tza'nx otoq tma Qman te.

¹⁷ Atzun kyb'i qe tky'ajal Leví jlu: Gersón, Coat ex Merari.

¹⁸ Qe tiyjil Gersón tuj k'lojin kyten, atzun qe jlu: Libni ex Simei.

¹⁹ Qe tiyjil Coat tuj k'lojin kyten, atzun qe jlu: Amram, Izhar, Hebrón ex Uziel.

²⁰ Qe tiyjil Merari tuj k'lojin kyten, atzun qe jlu: Mahli ex Musi. Kykyaqil qe jlu tiyjil Leví qe tuj k'lojin kyten.

²¹ Qe aj Libni ex qe aj Simei, tiyjil Gersón qe.

²² Aju tajlal jaw kyi'j qe kyky'ajal tzajx qe' kyi'j qeju matoq jun xjaw kyul-len itz'j, japun te 7,500 kyb'aj.

²³ Atzun qe jlu e kub' ten tuj tumlal telex q'ij, ti'jxi tja Dios.

²⁴ Aju nejenel kyxol qe tiyjil Gersón, atzun Eliasaf aju tky'ajal Lael.

²⁵ Tuj kykwent qe tiyjil Gersón ta' ja xb'alun te mojb'ab'l tib'il, kyuk'ix qe tz'u'm te maqsib'l ti'j, tuk'ix xb'alun tkub' ttzi ja xb'alun,

²⁶ kyuk'ix qe xb'alun kykub' ttxa'n pe'n, aju tok ti'jele tja Dios ex ti'j altar, tuk'ix xb'alun tkub' jatum tu'n kyokx xjal tuj ttxa'n tpe'n tja Dios, kyuk'ix qeju k'alb'il kye.

²⁷ Qe tiyjil Coat tuj k'lojin kyten, atzun qe jlu: Amram, Izhar, Hebrón ex Uziel.

²⁸ Aju tajlal jaw kyi'j qe kyky'ajal tzajx qe' kyi'j qeju matoq jun xjaw kyul-len itz'j, japun te 8,600 kyb'aj. Atzun qe kyok te kwentil tja Dios,

²⁹ ex atzun e kub' ten tuj tumlal tnayaj q'ij te tja Dios.

³⁰ Aju nejenel kyxol qe tiyjil Coat, atzun Elizafán aju tky'ajal Uziel.

³¹ Tuj kykwent qe jlu ta' ju kax k'ub'l tley Dios, tuk'ix mes, tuk'ix tkub'l kandil, kyuk'ix qe altar, kyuk'ix qe makb'il xjansamaj in che ajb'en tuj k'ulb'il, tuk'ix ju xb'alun tkub'sa'n tuj tmij tja Dios, ex kykyaqil qe makb'il ate' tuj.

³² Aju nejenel ma'xix toklen kyxol aj Leví, atzun Eleazar aju tky'ajal pal Aarón, ex atzun tok te q'malte kyaq'un qeju in che kwentin ti'j tja Dios.

³³ Qe tiyjil Merari tuj k'lojin kyten, atzun qe jlu: Mahli ex Musi.

³⁴ Aju tajlal jaw kyi'j qe kyky'ajal tzajx qe' kyi'j qeju matoq jun xjaw kyul-len itz'j, japun te 6,200 kyb'aj.

³⁵ Aju nejenel kyxol qe tiyjil Merari, atzun Zuriel aju tky'ajal Abihail, ex atzun e kub' ten tuj tumlal tb'anq'ab' q'ij te tja Dios.

³⁶ Tuj kykwent qe tiyjil Merari ta' qe tz'lom te tja Dios, kyuk'ix qe tq'e'lil, kyuk'ix qe tqan, kyuk'ix qe tq'uqb'il ex tkyaqil in ajb'en kyi'j,

³⁷ ex kyuk'ix qe tqan ate' ti'jele ttxa'n pe'n, kyuk'ix qe kyq'uqb'il, kyuk'ix qe stak ex qe taq'al.

³⁸ Atzun e kub' ten Moisés tuk'ix Aarón, kyuk'ix qe tky'ajal Aarón, twitz tja Dios tuj tumlal tjawitz q'ij, twitz ja xb'alun te mojb'ab'l tib'il, ex atzun qe e ok kwentinte tja Dios te kyxel aj Israel. Qatzun at jun xjal mya pal ma tz'okx tuj tja Dios, il ti'j tu'n tkub' b'yet.

³⁹ Tejtzun tjaw tajlal kyu'n Moisés ex Aarón kyi'j kykyaqil k'loj kyiyjil aj Leví ik tza'nx otoq tzaj tma'n Qman, japun jun tajlal te 22,000 xinaq tu'n tkyaqilx, tzajx qe' kyi'j qeju matoq jun xjaw kyul-len itz'j.

Tu'n kykyaj ko'pit qe nej k'wa'lb'aj

⁴⁰ Tzaj tma'n Qman te Moisés kyja': Q'i'n jawa jun tajlal kyi'j qe nej kyky'ajal aj Israel, tzajx qe' tu'na kyi'j qeju ma jun xjaw kyul-len itz'j, tz'ib'an kub'a kyb'i ex ajlama jte' kyb'et.

⁴¹ Q'ontza qe aj Leví te weye te kyxel nej kyky'ajal aj Israel. Ax ikx q'ontza kyalun aj Leví te weye te kyxel nej kyalun aj Israel. Aqine Kymane.

⁴² Jawtzun ti'n Moisés kyajlal nej kyky'ajal aj Israel ik tza'nx otoq tzaj tma'n Qman te,

⁴³ ex kykyaqil xinaq nej k'wa'lb'aj ku'x tz'ib'et kyb'i tzajx qe' kyi'j qeju matoq jun xjaw kyul-len itz'j, japun jun tajlal te 22,273 tu'n tkyaqilx.

⁴⁴ Ax ikx tzaj yolin Qman tuk'il Moisés ex tma:

⁴⁵ Q'ontza qe aj Leví te weye te kyxel nej kyky'ajal aj Israel, ex q'ontza kyalun aj Leví te weye te kyxel kyalun aj Israel, porke weye qe aj Leví. Aqine Kymane.

⁴⁶ Ex aqeju nej kyky'ajal aj Israel at 273 mas kywitz qe aj Leví; kyja'tzun, tu'n kykyaj ko'pj qeju 273 nej kyky'ajal lu,

⁴⁷ qaninxa jwe' saq pwaq ti'j junjun, tza'nx malb'il in ajb'en tuj tja Dios. Aju saq pwaq ch'ixmi mey ons talil junjun.

⁴⁸ Ex q'onxa pwaq te kolpib'l kye te Aarón ex kye qe tky'ajal.

⁴⁹ Jawtzun tchmo'n Moisés pwaq te kolpib'l kye nej kyky'ajal aj Israel, aqeju 273 mas kywitz aj Leví,

⁵⁰ ex o chmet 1,365 saq pwaq, ik tza'nx malb'il in ajb'en tuj tja Dios.

⁵¹ Te tib'ajxi xi tq'o'n Moisés pwaq lu te Aarón ex kye qe tky'ajal, ik tza'nx otoq tzaj tma'n Qman te.