Números 25 - Mam de Huehuetenango nueva ortografía

E k'ulun aj Israel twitz tilb'ilal Baal-peor

¹ Tej kyten aj Israel tuj lugar Sitim, e ok ten qe xinaq yaẍil kyuk'il qe xu'j aj Moab,

² atzun qe xu'j lu e je'x txkonte kye tu'n kyxi' kyuk'il ok t-xi kyq'o'n chojb'il kye kydios. Atzun kye aj Israel ajun qe e wa'n ti'j ju wab'j lu, ex e ok ten k'ulul kywitz kydios aj Moab;

³ kyja'tzun tten e ok ten aj Israel k'ulul twitz tilb'ilal Baal-peor. Tzaj nimxix ttx'u'jil Qman kyi'j aj Israel,

⁴ ex xi tma'n te Moisés kyja': —Chmon oka kykyaqil nejenel kye tnam xjal, ex yob'an jawa qe kywitz kykyaqil xjal, tu'ntzun tchewix nq'oje kyi'j aj Israel, chi Qman.

⁵ Xitzun tma'n Moisés kye qeju kyok te jwes kyxol aj Israel: —Teyle junjun kyeye b'a'n tu'n tkub' kyb'yo'ne qe xinaq ax kyiyjile, aqeju ma che ok lpe' tu'n kyk'ulun twitz tilb'ilal Baal-peor.

⁶ At jun aj Israel pon ti'n jun xu'j aj Madián max tja, ex twitz Moisés ex kywitz kykyaqil aj Israel tb'incha jlu, tej matoq in che oq' aj Israel ttzi ja xb'alun te mojb'ab'l tib'il.

⁷ Atzunte Finees aju tky'ajal Eleazar ex tal tchman pal Aarón, tej ttil jlu jaw we' kyxol aj Israel, xi ti'n jun lans,

⁸ ex xi lpe' ti'j xinaq aj Israel tejxi tpon max tuj tja. Atzun xi t-xayu'n lans tuj kyk'u'j, tza'nx te xinaq aj Israel, ax ikx te xu'j aj Madián. Kyja'tzun tten o we' tx'u'j yab'il, aju in che naj aj Israel tu'n,

⁹ ex otoq che kyimxe 24,000 aj Israel.

¹⁰ Tzajtzun yolin Qman tuk'il Moisés ex tma:

¹¹ —Tu'n Finees ma chewix nq'oje kyi'j aj Israel, porke ikx te tmod ik tza'n weye, minti' in kub' tuj twitz tu'n kyk'ulun aj Israel twitz junxitl dios. Tu'ntzun jlu ma we' nq'oje kyi'j aj Israel.

¹² Kyja'tzun q'manxa te Finees: Kyjel b'ant ti'j jun nyole te tzalajb'il tuk'il.

¹³ Te jumajx kxel nq'o'ne te ex kye tiyjil aju oklenj te pal, porke ma tzaj ta'w tuj tanmi tu'n tlaj mya b'a'n in kyb'incha'n xjal nwitze; ex tu'nju b'a'n ma tb'incha, ma kub' nnajsa'ne kyil aj Israel, chi Qman.

¹⁴ Zimri tb'i aju xinaq aj Israel xi xayu'n lans tuj tk'u'j junx tuk'il xu'j aj Madián; tky'ajal Salu jlu ex atoq tok te nejenel kye jun k'loj tiyjil Simeón.

¹⁵ Atzunju xu'j aj Madián Cozbi tb'i ex tme'jel Zur, aju nejenel kye jun k'loj kyiyjil aj Madián.

¹⁶ Tzaj yolin Qman tuk'il Moisés ex tma:

¹⁷ —Kyok tzoqpaje kyi'j aj Madián ex kyb'yon kub'e qe,

¹⁸ tu'nju o kyajb'e tu'n tkub' kyi'je kyu'n tu'n sb'ub'l, ex o kyb'incha tu'n kyk'ulune twitz tilb'ilal Baal-peor, ik tza'n o tb'incha Cozbi aju tme'jel jun nejenel kye aj Madián, aju kyim tu'n lans tej ttzaj nsama'ne tx'u'j yab'il kyib'aj aj Israel tu'n tlaj e k'ulun twitz tilb'ilal Baal-peor, chi Qman.