Números 24 - Mam de Huehuetenango nueva ortografía

Toxin yol tma Balaam

¹ Tej otoq tz'el tnik' Balaam ti'j qa b'a'n otoq tz'ela tuj twitz Qman tu'n kykub' ky'iwlet aj Israel, ya minti' ok ten q'ijal ik tza'n otoq tb'incha junjun maj, noq o'kx kyja' xi tke'yin tumlal tzqij tx'otx'.

² Tej ttil Balaam qe aj Israel tuj k'lojintoq kyten ik tza'nx kyiyjil, ul T-xew Dios tuk'il,

³ ex xi tma'n Balaam qe yol lu: Atzun tqanil jlu tu'n Balaam aju tky'ajal Beor, aju xinaq nne'l tnik' ti'j tkyaqil,

⁴ aju in tb'i'n tqanil in tzaj tma'n Dios te, in kub' tz'aq twitz tx'otx' ex in til aju in tzaj tyek'un Dios te, aju at tipumal tu'n tb'ant tkyaqil tu'n, ex nne'l tnik' ti'j.

⁵ Aqeye tiyjil Jacob, tb'anilxix che ke'yin qe kyjaye, xb'alun ja; tb'anilxix che ke'yin kynajb'ile, aqeye aj Israel.

⁶ Ik che ke'yin ik tza'n qe chq'ajlaj matij, ik tza'n kyqan awal ttzi nima, ik tza'n kyqan áloes awa'n tu'n Qman, ex qa ik tza'n kyqan wi'ten ttzi a'.

⁷ Ktel nim a' te kyk'a' aj Israel ex te a'lb'il kyawal, mas nim tipumal kyrey ktel ik tza'n te Agag, ex k'okel tkawb'il te ma'xix.

⁸ Ate Dios etz q'inte kye tuj Egipto; at nim kyipun ik tza'n wakẍ te tjaq' k'ul. Che najel qe nasyon kyu'n aqeju in che q'ojin kyi'j. Che najel aj q'oj kyu'n aj Israel, kb'ajel kytoqin kyb'aqil ex che b'ajel kyk'ixb'isa'n tu'n plech.

⁹ Ik kyten aj Israel ik tza'n jun b'alun ex ik tza'n jun ttxu b'alun ok tkub' tan, mi a'l jun b'a'n tjaw k'asunte te. Aqeye aj Israel, ky'iwla'nxwit aju kb'el ky'iwlante kyeye, ex tzajxwit mya b'a'n kyib'aj qeju in che qanin mya b'a'n kyib'aje, chi Balaam.

¹⁰ Tejtzun tb'inte Balac jlu, tzaj nim tq'oj ti'j Balaam, ok ten tz'ajil tq'ab' tu'n tq'oj ex tma: —Ma tzaj ntxko'na tu'n t-xi tqanina mya b'a'n kyib'aj wajq'oje, atzun ja'lo ma b'ant-xi ox maj ma che kub' tky'iwla'na.

¹¹ Taja tjaya; nej otoq txi ntziyane teya tu'n t-xi nq'o'ne nimb'il teya, ex minti' ma taq' Dios amb'il tu'n t-xi nq'o'ne nimb'il teya, chi Balac.

¹² Atzunte Balaam xi ttzaq'we'n: —B'i'x xi nma'ne kye t-sanjela aqeju e pon t-sama'na wuk'ile, nchiye kyja':

¹³ maske tzaj tq'o'n Balac tkyaqil q'an pwaq ex saq pwaq at tuj tja, mlay b'ant tu'n wik'e tib'aj yol ktzajel tma'n Qman weye, misikyer tu'n nb'inchanteye jun b'a'n ex qa mya b'a'n wu'nx wib'e; noq o'kx tu'n t-xi nma'ne aju tzul tma'n Qman weye.

¹⁴ Weye chin ajele tuj ntanmiye, ex na'nxtoq waje, kxel nma'ne teya aju kb'antel kyu'n tnam xjal lu kyi'j qe ttanmila tuj tq'ijlalil tzul.

Tkyajin yol tma Balaam

¹⁵ Oktzun ten Balaam q'malte ju yol tzaj q'ma'n te tu'n Dios, chi kyja': Atzun tqanil jlu tu'n Balaam aju tky'ajal Beor, aju xinaq nne'l tnik' ti'j tkyaqil,

¹⁶ aju in tb'i'n tqanil in tzaj tma'n Dios te, ex ojtzqi'n tu'n aju b'a'n tu'n Dios ma' t-xilen; in kub' tz'aq twitz tx'otx' ex in til aju in tzaj tyek'un Dios te, aju Tajaw Tkyaqil, ex nne'l tnik' ti'j.

¹⁷ Nne'l ch'in nnik'e ti'j aju kb'ajel tuj tq'ijlalil tzul, at jun in xi nke'yine, ex najchaq ta'. At jun che'w kjawil jlet kyxol tiyjil Jacob, jun rey kjawil jlet kyxol aj Israel. Kb'el tpach'u'n kywi' aj Moab ex che najel kykyaqil tiyjil Set tu'n.

¹⁸ Kb'el ti'j Edom tu'n, ex k'elel kytx'otx' aj Seir tu'n, aju aj q'oj ti'j. Atzun tnam Israel k'okel nimxix tipun.

¹⁹ Kjawil jlet jun nejenel kyxol tiyjil Jacob ex che najel tu'n aqeju otoq che kyaj ten tuj tnam, chi Balaam.

²⁰ Ex o til Balaam aju tnam Amalec, ex xi tma'n aju yol tzaj q'ma'n te tu'n Dios, chi kyja': Ate Amalec jun tnam mas ma' toklen kywitz kykyaqil txqantl tnam, ex aju b'ajsb'il te, kb'el xitj te jumajx.

²¹ Ax ikx o til qe aj Ceneo, ex xi tma'n aju yol tzaj q'ma'n te tu'n Dios, chi kyja': Aqeye aj Ceneo, maske kyuwxix tten kyjaye, maske tokx kyjaye tuj pik,

²² ex il ti'j che b'ajel xitj, ex che xel q'i'ne pres kyu'n aj Asiria.

²³ Ax ikx xi tma'n juntl yol tzaj q'ma'n te tu'n Dios: Ay ¿alkye jun kyjel anq'in ok tb'ant jlu tu'n Dios?

²⁴ Che tzajel qe barc ttzi mar te Chipre, ex kb'ajel xitj kytanmi aj Asiria ex kytanmi aj Heber kyu'n, ax ikx kye che najel te jumajx, chi Balaam.

²⁵ Tb'ajlenxi jlu, kub'tzun b'e tu'n Balaam ex aj tja. Ax ikx te Balac xi ti'n tb'e.