Números 2 - Mam de Huehuetenango nueva ortografía

Tza'n tten tu'n kyten aj Israel tuj campament

¹ Tzaj yolin Qman tuk'il Moisés ex Aarón ex xi tma'n kye:

² Qe aj Israel at tu'n kykub' ten najchaqyin ti'jele ja xb'alun te mojb'ab'l tib'il, teyle junjun tjaq' tbander ex tuk'ix juntl bander te junjun k'loj tiyjil.

³ Qe soldad in che b'et tjaq' bander kye tiyjil Judá, atzun che b'el ten tuj tjawitz q'ij, tuj k'lojin kyten. Aju nejenel kyxol, atzun Naasón aju tky'ajal Aminadab,

⁴ ex tza'nx tajlal otoq jaw, japun jun tajlal te 74,600 xinaq aj Judá.

⁵ Kytxlaj che b'el ten qe soldad te tiyjil Isacar, ex aju nejenel kye, atzun Natanael aju tky'ajal Zuar,

⁶ ex tza'nx tajlal otoq jaw, japun jun tajlal te 54,400 xinaq aj Isacar.

⁷ Ax ikx che b'el ten qe soldad te tiyjil Zabulón kytxlaj, ex aju nejenel kyxol, atzun Eliab aju tky'ajal Helón,

⁸ ex tza'nx tajlal otoq jaw, japun jun tajlal te 57,400 xinaq aj Zabulón.

⁹ Kyja'tzun tten, kb'el ten ox k'loj soldad tuj campament te Judá, tuk'il jun tajlal tu'n tkyaqilx te 186,400 xinaq. Atzun qe che b'el nej kywitz aj Israel.

¹⁰ Qe soldad in che b'et tjaq' bander te Rubén, atzun che b'el ten tuj tnayaj q'ij. Aju nejenel kyxol, atzun Elisur aju tky'ajal Sedeur,

¹¹ ex tza'nx tajlal otoq jaw, japun jun tajlal te 46,500 xinaq aj Rubén.

¹² Ex kytxlaj che b'el ten qe soldad te tiyjil Simeón, ex aju nejenel kyxol, atzun Selumiel aju tky'ajal Zurisadai,

¹³ ex tza'nx tajlal otoq jaw, japun jun tajlal te 59,300 xinaq aj Simeón.

¹⁴ Ax ikx che b'el ten qe soldad te tiyjil Gad kytxlaj, ex aju nejenel kyxol, atzun Eliasaf aju tky'ajal Deuel,

¹⁵ ex tza'nx tajlal otoq jaw, japun jun tajlal te 45,650 xinaq aj Gad.

¹⁶ Kyja'tzun tten, kb'el ten ox k'loj soldad tuj campament te Rubén, tuk'il jun tajlal tu'n tkyaqilx te 151,450 xinaq. Atzun qe che xel lpe' te tkab'in k'loj.

¹⁷ Atzun qe aj Leví che xel lpe' kyi'j qaq k'loj aj Israel lu tu'n t-xi kyi'n ja xb'alun te mojb'ab'l tib'il, ex qaq k'lojtl che xel lpe' kyi'j ik tza'nx kyten jatum otoq che kub' ten; txolin kyten ok kyxi b'et ex tjaq' kyex kybander.

¹⁸ Qe soldad in che b'et tjaq' bander te Efraín, atzun che b'el ten tuj telex q'ij tuj k'lojin kyten. Aju nejenel kyxol, atzun Elisama aju tky'ajal Amiud,

¹⁹ ex tza'nx tajlal otoq jaw, japun jun tajlal te 40,500 xinaq aj Efraín.

²⁰ Ex kytxlaj che b'el ten qe soldad te tiyjil Manasés, ex aju nejenel kyxol, atzun Gamaliel aju tky'ajal Pedasur,

²¹ ex tza'nx tajlal otoq jaw, japun jun tajlal te 32,200 xinaq aj Manasés.

²² Ax ikx che b'el ten qe soldad te tiyjil Benjamín kytxlaj, ex aju nejenel kyxol, atzun Abidán aju tky'ajal Gedeoni,

²³ ex tza'nx tajlal otoq jaw, japun jun tajlal te 35,400 xinaq aj Benjamín.

²⁴ Kyja'tzun tten, kb'el ten ox k'loj soldad tuj campament te Efraín, tuk'il jun tajlal tu'n tkyaqilx te 108,100 xinaq. Atzun qe che xel lpe' te toxin k'loj.

²⁵ Qe soldad in che b'et tjaq' bander te Dan, atzun che b'el ten tuj tb'anq'ab' q'ij tuj k'lojin kyten. Aju nejenel kyxol, atzun Ahiezer aju tky'ajal Amisadai,

²⁶ ex tza'nx tajlal otoq jaw, japun jun tajlal te 62,700 xinaq aj Dan.

²⁷ Ex kytxlaj che b'el ten qe soldad te tiyjil Aser. Aju nejenel kyxol, Pagiel aju tky'ajal Ocrán,

²⁸ ex tza'nx tajlal otoq jaw, japun jun tajlal te 41,500 xinaq aj Dan.

²⁹ Ax ikx che b'el ten qe soldad te tiyjil Neftalí kytxlaj. Aju nejenel kyxol, atzun Ahira aju tky'ajal Enán,

³⁰ ex tza'nx tajlal otoq jaw, japun jun tajlal te 53,400 xinaq aj Neftalí.

³¹ Kyja'tzun tten, kb'el ten ox k'loj soldad tuj campament te Dan, tuk'il jun tajlal tu'n tkyaqilx te 157,600 xinaq. Atzun qe che xel lpe' te mankb'il tjaq' kybander.

³² Aju tajlal jaw kyi'j aj Israel tuj k'lojin kyten ik tza'nx kyiyjil, o japun jun tajlal tu'n tkyaqilx te 603,550 xinaq.

³³ Atzun qe aj Leví minti' e ok te tajlal tej tjaw kyajlal aj Israel, ik tza'nx otoq tzaj tma'n Qman te Moisés.

³⁴ Atzun kye aj Israel o kyb'incha tkyaqil ik tza'nx otoq tzaj tma'n Qman te Moisés: Teyle junjun kub' ten tjaq' tex tbander, tuj k'lojin e b'et kyuk'il qe kyex kyiyjil.