Mateo 9 - Mam de Huehuetenango nueva ortografía

Jun xjal tzqijle'n tyab'il b'anix tu'n Jesús

¹ Okxtzun Jesús tuj barc, ik'tz jlajtzi laguna, ul tuj ttanmi.

² Ex ul q'i'n jun xjal twitz Jesús tzqijle'n tyab'il, koẍl twitz tkoẍb'il. Tejtzun tlonte Jesús at kyokslab'l xjal e ul q'inte yab', xi tma'n te xjal tzqijle'n tyab'il: —Qe' tk'u'ja nk'wa'l; qe tila ma che najset.

³ At junjun xnaq'tzal ti'j ley kub' kyximan tuj kyanmi: Ate xjal lu in yolin mya b'a'n ti'j Dios.

⁴ Eltzun tnik' Jesús ti'j kyximb'etz ex xi tma'n kye: —¿Tiqu'n in kub' kyximane mya b'a'n tuj kyanmiye?

⁵ ¿Alkye mas jurat jaku b'ant, apeju tu'n t-xi q'met te xjal lu: Qe tila ma che najset, ex qa aju tu'n t-xi q'met: We'ktza ex b'eta?

⁶ Kxe'ltzun nyek'une kyeye tu'ntzun tel kynik'e ti'j, aqine sk'o'maj qine tu'n Dios tu'n ntene kyuk'il xjal, kyja'tzun at woklene twitz tx'otx' tu'n tnajset kyil xjal, chi Jesús. Xitzun tma'n teju xjal tzqijle'n tyab'il: —We'ktza, q'i'nktz tkoẍb'ila, ex txi'ya tjaya.

⁷ Jawtzun we' xjal ex xi' tja.

⁸ Tejtzun kylonte xjal jlu, e lab'in ti'j, ex xi kyq'o'n chjonte te Dios tu'nju tzaj tq'o'n kyoklen xjal tu'n tb'ant jlu.

Txokb'il te Mateo tu'n Jesús

⁹ Tej tik' Jesús tuj lugar lu, o til Jesús jun xjal Mateo tb'i q'uqltoq ti'j mes tuj ja jatum nne'l peyin pwaq te gobierni, ex xitzun tma'n Jesús te: —Lpe'ka wi'je. Jawtzun we' Mateo ex ok lpe' ti'j.

¹⁰ Okxtzun Jesús tuja ex kub' qe' ti'j mes kyuk'ix t-xnaq'tzb'en. Ex nimku peyil pwaq ex aj il otoq che ul e kub' qe' ti'j mes ttxlaj Jesús.

¹¹ Tejtzun kylonte qe fariseo jlu, xi kyma'n kye t-xnaq'tzb'en Jesús: —Aju Xnaq'tzal kyeye ¿tiqu'n in wa'n kyuk'il peyil pwaq ex kyuk'il aj il?

¹² Tej tb'inte Jesús ju yol lu, xi tma'n kye: —Qe xjal mya yab', mya il ti'j jun q'anal kye, noq o'kx qe xjal yab'.

¹³ Kyxi'ye ex tz'elx kynik'e ti'j ti t-xilen ju yol lu tz'ib'an tuj Tu'jil, chi kyja': Aju wajb'ile kyeye atzun, tu'n tten kyk'ujlalile, ex mya tu'n ttzaj kyq'o'ne jun chojb'il weye, chi tuj Tu'jil. Porke minti' ma chin ule txkol kye xjal tz'aqlxix, noq o'kx ma chin ule txkol kye aj il tu'n tajtz ti'j kyanmi.

Tiqu'n minti' in kub' kyyo'n we'yaj qe t-xnaq'tzb'en Jesús

¹⁴ E ultzun qe t-xnaq'tzb'en Juan tuk'il Jesús ex kyma: —¿Tiqu'n in kub' qyo'ne we'yaj, ax ikx qe fariseo, atzun qe t-xnaq'tzb'ena minti' in kub' kyyo'n we'yaj?

¹⁵ Xi ttzaq'we'n Jesús kye: —¿Jakupe che b'isun qeju otoq che txkonjtz tuj mejeb'le'n atxtoq chmilb'aj kyuk'il? Ex tzul tq'ijlalil tu'n tel q'i'n chmilb'aj kyxol; maxitzun kb'el kyyo'n we'yaj.

¹⁶ Mi a'l jun nno'k q'onte jun xb'uqb'il ak'aj ti'j jun xb'alun ma b'aj; ex qa ma tz'ok tq'o'n, k'elel sb'it'j ju xb'alun b'ajni tu'nju xb'uqb'il ak'aj, ex mas kxel sb'it'j ju xb'alun b'ajni.

¹⁷ Ex mi a'l jun in ku'x q'onte ak'aj vin tuj jun bols tz'u'm ma b'aj; ex qa ma ku'x tq'o'n, che elel sb'it'j qe bols tz'u'm, kb'el qojl vin, ex che najel qe bols tz'u'm. Il ti'j tu'n tku'x q'ot ak'aj vin tuj bols tz'u'm ak'aj; tu'n jlu mlay che naj kykab'il.

Aju tme'jel Jairo ex aju xu'j ok tmako'n t-xb'alun Jesús

¹⁸ Matoq in yolin Jesús ti'j jlu kyuk'il, ul jun xjal nejenel kyxol judiy, kub' ẍmeje' twitz Jesús ex tma: —Ma xkyim nme'jele ja'lo, ex tzaja ex q'onku tq'ab'a tib'aj tu'ntzun tjaw anq'in.

¹⁹ Jawtzun we' Jesús, ok lpe' ti'j kyuk'ix qe t-xnaq'tzb'en.

²⁰ At jun xu'j yab' tu'n ẍwo'j, otoq b'ant-xi kab'laj ab'q'i tyab'tlen, pon laq'e' ti'jxi Jesús, ex ok tmako'n xu'j ttxa'n t-xb'alun Jesús.

²¹ Porke chi xu'j tuj tanmi: Ichaq noq t-xb'alun tz'ok nmako'ne, ok chin b'antele.

²² Ex ajtz meltz'aj Jesús, ok tke'yin ti'j xu'j ex xi tma'n te: —Qe' tk'u'ja nme'jel; tu'n tokslab'la ma kleta, chi Jesús te. Ex b'i'x b'anix xu'j.

²³ Tejtzun tokx Jesús tuj tja nejenel, o til nno'k xux kyu'n xjal ex in che oq' wen ti'j kyimni.

²⁴ Xitzun tma'n Jesús kye: —Kyexe, porke te txin mya kyimni, noq in tan, chi Jesús. Atzun kye xjal noq xi kytze'n.

²⁵ Tejtzun kyetz lajo'n xjal ttxa'n pe'n, okx Jesús tuja, tzaj ttzyu'n Jesús tq'ab' txin ex jawtzun we' txin.

²⁶ Eltzun laq'e' tqanil jlu tuj tkyaqil lugar.

Kab'e xjal moẍ jaqet kywitz tu'n Jesús

²⁷ Tejtzun tik' Jesús tuj lugar lu, e ok lpe' kab'e xjal moẍ ti'j, in che sch'in ex in kyma'n: —Aya Tk'wa'l David, q'aq'antz tk'u'ja qi'je.

²⁸ Tejtzun tpon Jesús tuj jun ja, e pon qe moẍ tuk'il; ex xi tma'n Jesús kye: —¿Mape qe' kyk'u'je wi'je qa jaku b'ant jlu wu'ne? Xitzun kyma'n: —Ma qe' qk'u'je ti'ja, Tat.

²⁹ Oktzun tmako'n Jesús tb'aq' kywitz ex tma: —Tu'nju at kyokslab'le kb'inchetel kyeye aju ma tzaj kyqanine, chi Jesús kye.

³⁰ Jaqettzun kywitz moẍ ex xi tkyuwsa'nxix Jesús kye: —Ten kykwente ti'j tu'n mi'n kyb'inte xjal jlu.

³¹ Tejtzun kyaj qe xjal lu, el tqanil kyu'n ti'j Jesús tuj tkyaqil lugar.

B'ant tyolin jun xjal men tu'n Jesús

³² Matoqx kyaj qe xjal lu, pon q'i'n jun xjal men twitz Jesús, at ju'ẍ tuj tanmi.

³³ Tejtzun tetz lajo'n ju'ẍ tuj tanmi men tu'n Jesús, b'anttzun tyolin men. E lab'in xjal ti'j ex kyma: —B'ajx qila' jun b'inchb'en ik tza'n jlu kyxol aj Israel.

³⁴ Atzun kye fariseo in kyma'n: —Tu'nju nejenel kye ju'ẍ in che etz qe ju'ẍ tuj kyanmi xjal tu'n Jesús.

Tzaj q'aq'an tk'u'j Jesús kyi'j xjal

³⁵ B'aj tb'etin Jesús kyuj kykyaqil tnam ex kyuj kykyaqil aldey, in tq'o'n xnaq'tzb'il kye xjal kyuj ja te k'ulb'il kye judiy, in pakb'an ti'j tqanil b'a'n ti'j tkawb'il Dios, ex in che b'anix xjal tu'n, noq alkyex kyyab'il ex noq alkyex k'ixk'oj tok kyi'j.

³⁶ Tejtzun tke'yinte Jesús nim xjal, tzaj q'aq'an tk'u'j kyi'j; tu'nju otoq che sikt ex in che b'isun, ik kyten ik tza'n qe ẍne'l minti' pastoril kye.

³⁷ Xitzun tma'n Jesús kye t-xnaq'tzb'en: —Ax tok nimxix twitz awal at, atzun qe aq'nal mya nim.

³⁸ Kyja'tzun che kub'sane twitz tajaw awal tu'n kytzaj t-sama'n qe aq'nal chmol twitz awal, chi Jesús kye.