Mateo 8 - Mam de Huehuetenango nueva ortografía

Jun xjal nim tx'a'k ti'j b'anix tu'n Jesús

¹ Tejtzun tku'tz Jesús twi witz, nim xjal e ok lpe' ti'j.

² Ul jun xjal nim tx'a'k ti'j minti' q'anb'il ti'j, kub' ẍmeje' twitz Jesús ex tma: —Tat, qa tajb'ila, jaku chin b'anixe tu'na.

³ Xi tnuqpi'n Jesús tq'ab' ex ok tmako'n ex tma: —Wajb'ile, b'i'x kb'antela. Ex jurat naj el tx'a'k ti'j xjal ex b'anix.

⁴ Xitzun tma'n Jesús te: —Q'o'nka kwent ti'j tu'n mi'n t-xi tma'na te jun xjal; noq o'kx txi'ya, yek'unx tib'a te pal ex q'onxa toyaja ik tza'n in tma'n tley Moisés, tu'ntzun tel kynik' xjal ti'j qa ma b'anixa.

B'anix tmajen capitán aj Roma tu'n Jesús

⁵ Okxtzun Jesús tuj tnam Capernaum, pon jun capitán aj Roma tuk'il, in kub'san twitz

⁶ ex tma: —Tat, at jun nmajene tx'ayl tuj njaye, tzqijle'n tyab'il ex nimxix in chyo'n te.

⁷ Xitzun tma'n Jesús te: —Chin xe'le, ex kb'anixel wu'ne.

⁸ Xi ttzaq'we'n capitán: —Tat, mya b'a'n qine tu'n tokxa tuj njaye; o'kx q'mantza yol ex kb'anixel nmajene.

⁹ Porke ikx weye atine tjaq' tkawb'il juntl, ex ate' soldad tjaq' nkawb'ile. Qa ma txi nma'ne te jun soldad: Txi'ya, in xi'tzun; ex qa ma txi nma'ne te juntl: Tzaja, in tzajtzun; ex qa ma txi nma'ne te nmajene: B'inchama jlu, in b'anttzun tu'n, chi capitán.

¹⁰ Tej tb'inte Jesús tyol capitán, jaw lab'in ti'j ex xi tma'n kye qeju lepch qe'k ti'j: —Ax tok kxel nma'ne kyeye, na'nx twile tokslab'l jun xjal aj Israel ik tza'n tokslab'l xjal lu.

¹¹ Kxel nma'ne kyeye: Che tzajel nimku xjal tuj tjawitz q'ij ex tuj telex q'ij, ex che b'el qe' ti'j mes ttxlaj Abraham tuk'ix Isaac ex Jacob tuj kawb'il in tzaj tuj kya'j.

¹² Atzun kye qeju attoq kyoklen nej ti'j kawb'il, che elex xo'n tuj qlolj; atzun ktzajel oq'el ex kqitx'itx'il t-xe kye' xjal, chi Jesús kye.

¹³ Xitzun tma'n Jesús te capitán: —Txi'ya; ik tza'n ma tokslaya, ikxtzun kb'inchetel teya. Ex ax or b'anix ju tmajen capitán.

B'anix ju xu'j tji' Pedro tu'n Jesús

¹⁴ Pontzun Jesús tja Pedro. Xi tke'yin Jesús yab'toq tu'n kyaq aju xu'j tji' Pedro, tx'ayl twi watb'il.

¹⁵ Ok tmako'n Jesús tq'ab' xu'j, b'i'x ik' kyaq ti'j; jawtzun we' ex ajb'en kye.

Nimku yab' e b'anix tu'n Jesús

¹⁶ Tej tex q'ij pon kyi'n xjal nimku yab' tuk'il Jesús at ju'ẍ tuj kyanmi; ex tu'n tyol Jesús e je'tz qe ju'ẍ tuj kyanmi, ex kykyaqil yab' e b'anix tu'n,

¹⁷ tu'ntzun tjapun aju yol q'ma'maj tu'n Isaías aju t-sanjel Dios chi kyja': Ax el q'inte qyab'il, ex el ti'n k'ixk'oj qi'j, chi Isaías.

O kyajb'e xjal tu'n kyok lpe' ti'j Jesús

¹⁸ Tej tlonte Jesús nim xjal at ti'jele, xi tma'n kye t-xnaq'tzb'en tu'n kyik'x jlajxi laguna.

¹⁹ Ul jun xnaq'tzal ti'j ley ex xi tma'n te Jesús: —Xnaq'tzal, chin okel lpe'ye ti'ja noq jatum ma txi'ya.

²⁰ Xi tma'n Jesús te: —Qe wech at kyjul, ex qe chyu'j at kyq'u'; atzun weye minti' jatum tu'n nkub' tane, aqine sk'o'maj qine tu'n Dios tu'n ntene kyuk'il xjal, chi Jesús te.

²¹ Ex xi tma'n juntl t-xnaq'tzb'en te: —Tat, chin tyoma, nej kyjel nmaqu'ne nmane.

²² Xi tma'n Jesús te: —Lpe'ka wi'je; q'onkja kye kyimni tu'n tku'x kymaqu'n kykyimni.

We' jun nintz kyq'iq' tu'n Jesús

²³ Tejtzun tokx Jesús tuj barc, e ok lpe' qe t-xnaq'tzb'en ti'j.

²⁴ Tzaj jun kyq'iq' nimxix tib'aj laguna, jaw pulin a' ti'j barc. Ex te Jesús in tan.

²⁵ E ultzun laq'e' t-xnaq'tzb'en ttxlaj ex jaw kyk'asun, ex xi kyma'n te: —Tat, qo tkloma porke ch'ix qxi mulq'aje tuj a'.

²⁶ Xitzun tma'n Jesús kye: —¿Tiqu'n in che xob'e aqeye xinaq ch'in kyokslab'le? Jawtzun we' Jesús, xi tmayo'n kyq'iq' tuk'ix a'; ex b'i'x we' tkyaqil.

²⁷ Atzun kye t-xnaq'tzb'en e lab'in ti'j, in kyma'n: —¿Alkyetzun ju xjal lu? Porke tuk'ix kyq'iq' ex a' in xi kyniman tyol.

Kab'e xjal aj Gadara at ju'ẍ tuj kyanmi

²⁸ Tejtzun tpon Jesús jlajxi laguna tuj kytx'otx' xjal aj Gadara, ok noj kab'e xjal twitz, e etz tuj camposant. At ju'ẍ tuj kyanmi ex puro tx'u'j qe, kyja'tzun mi jun xjal in b'et tuj b'e lu.

²⁹ Ex e jaw sch'in qe xjal lu in kyma'n: —¿Ti toklena qi'je, aya Jesús Tk'wa'l Dios? ¿Maj ma tzula tzalu tu'n qyajlanjtz naje tu'na na'nxtoq tpon tq'ijlalil?

³⁰ Ex ate' txqan b'och in che wa'n najchaq, nimku kyb'et.

³¹ E kub'santzun qe ju'ẍ twitz Jesús: —Qa ma qo ex tlajo'na kyuj xjal lu, q'ontza amb'il qeye tu'n qxi'ye kyxol b'och tu'n qokxe kyuj.

³² Xitzun tma'n Jesús kye: —Kyxi'ye. E je'tztzun qe ju'ẍ tuj kyanmi xjal ex e okx kyuj b'och; ex kyxo'n kyib' b'och ttxa'n xaq, e ku'pun tzaq tuj laguna ex b'i'x e naj tuj a'.

³³ Atzun qe kwentil b'och e je'l oq, ex tej kypon tuj tnam xi kytx'olb'a'n tkyaqil, ax ikx xi kyma'n aju otoq b'aj kyi'j qe xjal at ju'ẍ tuj kyanmi,

³⁴ tu'n jlu kykyaqil xjal tuj tnam e je'tz kanil ti'j Jesús; ex tej kylonte, e kub'san twitz Jesús tu'n tex tuj kytanmi.