Mateo 3 - Mam de Huehuetenango nueva ortografía

Aju tpakb'ab'l Juan, aju in che b'yan xjal tu'n tuj a'

¹ Tuj tq'ijlalil lu ul Juan aju in che b'yan xjal tu'n tuj a', o pakb'an tuj Judea tuj lugar tzqij tx'otx',

² in tma'n kye xjal: —Tajtz ti'j kyanmiye, porke ma tzul laq'e' ju kawb'il in tzaj tuj kya'j, chi Juan.

³ Ate Juan o yolin Isaías ti'j, aju t-sanjel Dios. Tma Isaías: In jaw tq'ajq'ajel twi' jun xjal tuj lugar tzqij tx'otx', in tma'n: Kyb'inchame tb'e Qman, kyb'inchame jun tb'e jiqun ti'j.

⁴ Aju t-xb'alun Juan tok, ttzmal chej camey, ex tz'u'm k'alb'il tk'u'j, ex ẍplon twa tuk'ix ta'l kab' tuj tze'.

⁵ Ex e pon xjal tuk'il Juan, in che tzaj tuj Jerusalén ex tuj tkyaqil Judea ex tuj tkyaqil lugar ttzi'yile nima Jordán;

⁶ ex tej tjatz kypa'n kyil, e b'yan tu'n Juan tuj nima Jordán.

⁷ Pero tej tlonte Juan nimku qe fariseo kyuk'ix qe saduceo e pon tuk'il tu'n kyb'yan tuj a', xi tma'n kye: —Aqeye tiyjil q'anti'. ¿Alkye ma q'mante kyeye tu'n kyel oqe twitz ju castiw ma'xix tzul tu'n Dios?

⁸ Kyb'inchame b'a'n, tu'ntzun tyek'unjtz qa otoq tz'ajtz ti'j kyanmiye.

⁹ Ex mi'n kub' kyximane tuj kyanmiye tu'n kymanteye: Tiyjil Abraham qo'ye; porke kxel nma'ne kyeye, jaku b'ant tu'n Dios tu'n kyok qe ab'j lu te tiyjil Abraham.

¹⁰ Aju siwb'il k'uxb'il ya ma pon t-xe tlok' tze'; kyja'tzun tkyaqil tze' minti' in tq'o'n twitz b'a'n, kjawil tx'emit, ex k'okex q'ot tuj q'aq'.

¹¹ Ax tok in che b'yane tuj a' wu'ne tu'nju ma tz'ajtz ti'j kyanmiye; ex aju lepchix ttzaj wi'je, ok che b'yale tu'n tu'n Xewb'aj Xjan ex tu'n q'aq'; ex mas at tipumal nwitze, ex minti' woklene ti'j tu'n t-xi wi'ne t-xajab'.

¹² Tzyu'n xupb'il triw tu'n, ex k'elel t-xupin ttz'isil triw tuj tpe'n; k'okex tk'u'n triw tuj ttx'utx', atzun ttz'isil triw kb'el tpatun tu'n q'aq' mlay yupj.

Tej tb'yan Jesús

¹³ Etztzun Jesús tuj Galilea, ul tuk'il Juan ttzi nima Jordán tu'n tb'yan tu'n Juan.

¹⁴ Minti' kub' tuj twitz Juan tu'n tb'yan Jesús tu'n, ex xi tma'n te: —Aqine il ti'j tu'n nb'yane tu'na; ¿tiqu'n ma tzula wuk'ile tu'n tb'yana wu'ne?

¹⁵ Pero xi ttzaq'we'n Jesús: —E tb'ant ja'lo, tu'ntzun tjapun qu'n tkyaqilju in tma'n Dios. —B'a'n, chi Juan.

¹⁶ Tej tb'yan Jesús, jatz tuj a' ex jaqet ttzi kya'j, ex o til Jesús T-xew Dios ku'tz tuj kya'j ik ke'yin ik tza'n jun paloma, kub'il tib'aj Jesús.

¹⁷ Ex tzaj q'ajt Dios tuj kya'j in tma'n: —Atzun Nk'wa'le jlu k'ujla'nxix wu'ne, in chin tzalaje ti'j.